Soumya Murder Case: ବାଲିଅନ୍ତା ସୌମ୍ୟ ହତ୍ୟା ମାମଲା: କ୍ରାଇମବ୍ରାଞ୍ଚରେ ହାଜର ହେଲେ ବାପା ଓ ସାଙ୍ଗ, ତଦନ୍ତକାରୀ ଅଫିସର ବଦଳାଇବାକୁ ଦାବି

ଭୁବନେଶ୍ୱର: ବାଲିଅନ୍ତା ସୌମ୍ୟଙ୍କୁ ପିଟିପିଟି ହତ୍ୟା ମାମଲାରେ ଆସିଛି ନୂଆ ମୋଡ଼। ଏହି ମାମଲାରେ ସୌମ୍ୟଙ୍କ ବାପା ଓ ତାଙ୍କ ସାଙ୍ଗ ନିଶିକାନ୍ତ ମହାନ୍ତି କ୍ରାଇମବ୍ରାଞ୍ଚରେ ହାଜର ହୋଇଛନ୍ତି।

ମାମଲାରେ ପ୍ରାଥମିକ ଚାର୍ଜସିଟ୍ ଦାଖଲ ହୋଇସାରିଥିବା ବେଳେ ତଦନ୍ତ ପ୍ରକ୍ରିୟାକୁ ନେଇ ଆପତ୍ତି ଉଠାଇଛନ୍ତି ସୌମ୍ୟଙ୍କ ପରିବାର। ତଦନ୍ତକାରୀ ଅଫିସରଙ୍କ ତଦନ୍ତ ଉପରେ ପ୍ରଶ୍ନ ଉଠାଇ ତାଙ୍କୁ ପରିବର୍ତ୍ତନ କରିବାକୁ କ୍ରାଇମବ୍ରାଞ୍ଚ ଡିଆଇଜିଙ୍କୁ ଭେଟି ଜଣାଇଛନ୍ତି ସୌମ୍ୟଙ୍କ ବାପା। ତଦନ୍ତକାରୀ ଅଫିସରଙ୍କ ତଦନ୍ତକୁ ଚ୍ୟାଲେଞ୍ଜ କରିବା ସହ ଆବଶ୍ୟକ ପଡ଼ିଲେ କୋର୍ଟରେ ଅଭିଯୋଗ କରିବେ ବୋଲି ସୌମ୍ୟଙ୍କ ବାପା କହିଛନ୍ତି। ଏହାସହ ମାମଲାରେ ଅପରାଧିକ ଷଡ଼ଯନ୍ତ୍ର ଏବଂ ଭିଡ଼ ହିଂସା ସମ୍ପର୍କିତ ଦଫା ଲଗାଇ ତଦନ୍ତ କରିବାକୁ ପୋଲିସକୁ ପୁଣିଥରେ ଅବଗତ କରାଯାଇଛି। ସୌମ୍ୟ ହତ୍ୟା ମାମଲା ସହ ଜଡ଼ିତ କିଛି ନୂଆ ତଥ୍ୟ ଏଡିଜି ଦୟାଲ ଗଙ୍ଗୱାରଙ୍କ ନିକଟରେ ଦାଖଲ କରାଯାଇଥିବା ସୌମ୍ୟଙ୍କ ବାପା ସୂଚନା ଦେଇଛନ୍ତି। ଅନ୍ୟପଟେ, ଘଟଣା ଦିନ ଘଟଣାସ୍ଥଳରେ ଉପସ୍ଥିତ ରହି ନୀରବ ଦର୍ଶକ ସାଜିଥିବା କିଛି ପୋଲିସ କର୍ମଚାରୀଙ୍କ ବିରୋଧରେ କାହିଁକି କାର୍ଯ୍ୟାନୁଷ୍ଠାନ ନିଆଯାଇନାହିଁ, ସେନେଇ ମଧ୍ୟ କ୍ରାଇମବ୍ରାଞ୍ଚ ନିକଟରେ ଅଭିଯୋଗ କରିଛନ୍ତି ସୌମ୍ୟଙ୍କ ବାପା। ମାମଲାର ତଦନ୍ତ କେଉଁ ଦିଗକୁ ଯାଉଛି ଏବଂ ପରିବାରର ଦାବି ଉପରେ କ୍ରାଇମବ୍ରାଞ୍ଚ କି ପଦକ୍ଷେପ ନେଉଛି, ତାହା ଉପରେ ଏବେ ନଜର ରହିଛି।