ସ୍ୱାମୀଙ୍କୁ ହତ୍ୟା କରି ବାଥରୁମରେ ପୋତିଲା ପତ୍ନୀ, ୪୫ ଦିନ ପରେ ପର୍ଦ୍ଦାଫାସ

ଆଗ୍ରା: ଉତ୍ତର ପ୍ରଦେଶର ଆଗ୍ରାରେ ଏକ ଚାଞ୍ଚଲ୍ୟକର ହତ୍ୟାକାଣ୍ଡର ପର୍ଦ୍ଦାଫାସ । ଜଣେ ମହିଳା ନିଜ ସ୍ୱାମୀଙ୍କୁ ଯୋଜନାବଦ୍ଧ ଭାବେ ହତ୍ୟା କରିବା ପରେ ମୃତଦେହକୁ ଘରର ବାଥରୁମରେ ପୋତି ଦେଇ ଉପରେ ନୂଆ ଫ୍ଲୋରିଂ କରାଇଥିବା ଅଭିଯୋଗ ହୋଇଛି। ପ୍ରାୟ ୪୫ ଦିନ ଧରି ପରିବାର ଓ ପୋଲିସକୁ ଭୁଆଁବୁଲାଉଥିଲା ମହିଳା ।ପୋଲିସ ସୂଚନା ଅନୁସାରେ, ମୃତକ ସୁରେନ୍ଦ୍ର କୁମାର ଶର୍ମା (୪୪) ନିଜ ପତ୍ନୀ ରୁବୀ ଓ ଦୁଇ ଝିଅ ସହିତ ଆଗ୍ରାର ଦହତୋରା ଅଞ୍ଚଳରେ ରହୁଥିଲେ। ୧୮ ମେ ତାରିଖରୁ ସେ ନିଖୋଜ ଥିଲେ ଏବଂ ୨୬ ମେ ରେ ନିଖୋଜ ମାମଲା ରୁଜୁ ହୋଇଥିଲା। ତଦନ୍ତ ଅନୁଯାୟୀ, ପତ୍ନୀ ରୁବୀ ଖିରିରେ ଅଧିକ ପରିମାଣର ନିଦ ବଟିକା ମିଶାଇ ସ୍ୱାମୀଙ୍କୁ ଖାଇବାକୁ ଦେଇଥିଲେ।  ସେ ଅଚେତ ହେବା ପରେ ସ୍ୱାମୀକୁ ହତ୍ୟା କରି ପରଦିନ ସକାଳେ ସ୍ୱାମୀଙ୍କ ମୃତଦେହକୁ ବାଥରୁମକୁ ନେଇ ଗାତ ଖୋଳି ପୋତି ଦେଇଥିଲେ। ପରେ ଶ୍ରମିକ ଡାକି ବାଥରୁମରେ ନୂଆ ଫ୍ଲୋର ତିଆରି କରାଇଥିଲେ। ଘଟଣା ପରେ ମହିଳା ନିଜ ସ୍ୱାମୀ ଘର ଛାଡ଼ି ଚାଲିଯାଇଥିବା କହି ପରିବାର ଲୋକଙ୍କୁ ବିଶ୍ୱାସ କରାଇଥିଲେ। ନିଖୋଜ ଅଭିଯୋଗ ରୁଜୁ ହେବା ପରେ ମଧ୍ୟ ସେ ପୋଲିସ ସହ ଖୋଜାଖୋଜିରେ ସାମିଲ ହୋଇଥିଲେ ଏବଂ କାନ୍ଦି ନିଜକୁ ନିର୍ଦ୍ଦୋଷ ବୋଲି ଦେଖାଇବାକୁ ଚେଷ୍ଟା କରୁଥିଲେ। ତେବେ ମହିଳାଙ୍କ ଆଚରଣ ଉପରେ ସନ୍ଦେହ ହେବାରୁ ତାଙ୍କ ଦିଅର ପଚରାଉଚରା କରିଥିଲେ। ତଦନ୍ତ ସମୟରେ ପୋଲିସଙ୍କୁ ମଧ୍ୟ ସନ୍ଦେହ ହେବା ପରେ ଘର ଯାଞ୍ଚ କରାଯାଇଥିଲା। ବାଥରୁମରେ ନୂଆ ଟାଇଲ୍ସ ଦେଖି ସନ୍ଦେହ ବଢ଼ିଥିଲା। ଏହାପରେ ପୋଲିସ ଅଧିକ ପଚରାଉଚରା କରିବାରୁ ମହିଳା ସମସ୍ତ ଘଟଣା ସ୍ୱୀକାର କରିଥିଲା । ସେ କହିଛନ୍ତି ଯେ ସ୍ୱାମୀ ମଦ୍ୟପାନ କରି ତାଙ୍କୁ ପ୍ରାୟତଃ ମାଡ଼ ମାରୁଥିଲେ, ଯାହାକୁ କେନ୍ଦ୍ର କରି ସେ ଏହି ଯୋଜନା ଯୋଜନା ଆକାରୀ ହତ୍ୟା କରିଥିଲେ। ପୋଲିସ ବାଥରୁମର ଫ୍ଲୋର ଭାଙ୍ଗି କଙ୍କାଳ ଉଦ୍ଧାର କରିଛି। ପୋଲିସ କଙ୍କାଳକୁ ଫୋରେନସିକ ପରୀକ୍ଷା ପାଇଁ ପଠାଇଛି  । ମହିଳାକୁ ଗିରଫ କରି ମାମଲାରେ ଅନ୍ୟ କେହି ଏହି ଘଟଣାରେ ସାମିଲ ଥିବା ସମ୍ଭାବନା ଉପରେ ତଦନ୍ତ ଚାଲିଛି। ପୋଷ୍ଟମର୍ଟମ ଓ ଫୋରେନସିକ ରିପୋର୍ଟ ପରେ ଅନ୍ୟାନ୍ୟ ପ୍ରମାଣ ଆଧାରରେ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ କରାଯିବ ବୋଲି ପୋଲିସ କହିଛି ।