Mumbai Minors Attack On Couple: ପାର୍କରେ କପଲ୍ଙ୍କୁ ଘେରି ଆକ୍ରମଣ
କୁର୍ଲା ପାର୍କରେ ପ୍ରେମୀଯୁଗଳଙ୍କୁ ନିର୍ମମ ଆକ୍ରମଣ ! ଭାଇରାଲ୍ ଭିଡିଓକୁ ନେଇ ହଇଚଇ, ୮ ନାବାଳକଙ୍କୁ ଅଟକ ରଖିଲା ମୁମ୍ବାଇ ପୋଲିସ।
ମୁମ୍ବାଇର କୁର୍ଲାସ୍ଥିତ ଫିନିକ୍ସ ମଲ୍ (ଫିନିକ୍ସ ମାର୍କେଟ୍ ସିଟି) ନିକଟରେ ଥିବା ଏକ ମ୍ୟୁନିସିପାଲିଟି ପାର୍କରେ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ପାର୍କରେ ଜଣେ ଯୁବକ ଓ ଜଣେ ଯୁବତୀ ଫଟୋ ଉଠାଉଥିବା ସମୟରେ ୮ରୁ ୧୦ ଜଣ ନାବାଳକ ସେମାନଙ୍କ ସହ ଅସଦାଚରଣ କରିବା ସହ ଯୁକ୍ତିତର୍କ କରିଥିଲେ। ପରେ ଯୁବତୀଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି। ଗତକାଲିର ଏହି ଘଟଣା ଘଟିଥିବା ବେଳେ ଯୁବତୀଙ୍କ ଅଭିଯୋଗ ଆଧାରରେ ଘାଟକୋପର ପୋଲିସ ମାମଲା ରୁଜୁ କରିଛି।
ଘଟଣାସ୍ଥଳରେ ଉପସ୍ଥିତ କିଛି ସ୍ଥାନୀୟ ଲୋକ ମୋବାଇଲ୍ରେ ଏହି ଘଟଣାର ଭିଡିଓ ରେକର୍ଡ କରିଥିଲେ। ପରେ ଏହି ଭିଡିଓ ସୋସିଆଲ ମିଡିଆରେ ଭାଇରାଲ୍ ହେବା ସହ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଅଭିଯୋଗ ପରେ ପୋଲିସ ୮ ଜଣ ନାବାଳକଙ୍କୁ ଅଟକ ରଖିଥିବା ସୂଚନା ମିଳିଛି।
ପଥର, ବେଲ୍ଟ ଓ କାଠରେ ଆକ୍ରମଣ
ଅଭିଯୋଗ ଅନୁଯାୟୀ, ନାବାଳକଙ୍କ ଗୋଷ୍ଠୀ ଯୁବକ ଓ ଯୁବତୀଙ୍କୁ ପଥର, ବେଲ୍ଟ ଏବଂ କାଠରେ ଆକ୍ରମଣ କରିଥିଲେ। ଯୁବତୀଙ୍କ ମୁଣ୍ଡରେ ମଧ୍ୟ କାଠରେ ଆଘାତ କରାଯାଇଥିବା ଅଭିଯୋଗ ରହିଛି। ଭାଇରାଲ୍ ଭିଡିଓରେ ଯୁବକଙ୍କୁ ଗୋଇଠା ଓ ମୁଥ ମାରୁଥିବା ଦୃଶ୍ୟ ମଧ୍ୟ ଦେଖିବାକୁ ମିଳୁଛି। ଘଟଣାର ପ୍ରକୃତ କାରଣ ଓ ଆକ୍ରମଣ ପଛରେ ଥିବା ପରିସ୍ଥିତି ସମ୍ପର୍କରେ ସମସ୍ତ ତଥ୍ୟ ଏପର୍ଯ୍ୟନ୍ତ ସାର୍ବଜନୀନ ହୋଇନାହିଁ।
ଅଭିଯୁକ୍ତଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଦାବି
ସାର୍ବଜନୀନ ସ୍ଥାନରେ ଏଭଳି ଆକ୍ରମଣକୁ ନେଇ ସାଧାରଣ ଲୋକଙ୍କ ମଧ୍ୟରେ ରୋଷ ପ୍ରକାଶ ପାଇଛି। ଘଟଣାରେ ସମ୍ପୃକ୍ତ ସମସ୍ତଙ୍କୁ ଚିହ୍ନଟ କରିବା, ଅଞ୍ଚଳର ସିସିଟିଭି ଫୁଟେଜ୍ ଯାଞ୍ଚ କରିବା ଏବଂ ପୀଡ଼ିତ ଯୁବକ-ଯୁବତୀଙ୍କ ସୁରକ୍ଷା ସୁନିଶ୍ଚିତ କରିବାକୁ ପୋଲିସ ନିକଟରେ ଦାବି ହୋଇଛି।ଭବିଷ୍ୟତରେ ଏଭଳି ଘଟଣା ଯେପରି ନ ଘଟେ, ସେଥିପାଇଁ ସାର୍ବଜନୀନ ସ୍ଥାନରେ ପୋଲିସ ପାଟ୍ରୋଲିଂ ବଢ଼ାଇବାକୁ ମଧ୍ୟ ଦାବି କରାଯାଇଛି।
ଘଟଣାକୁ 'ମୁସଲିମ୍ ଗୁଣ୍ଡାଗିରି' କହିଲେ କିରୀଟ ସୋମାୟା
ଏହି ଘଟଣାକୁ ନେଇ ବିଜେପି ନେତା କିରୀଟ ସୋମାୟା ନିଜର ଏକ୍ସ (X) ଆକାଉଣ୍ଟରେ ଭିଡିଓ ପୋଷ୍ଟ କରି ଏହାକୁ 'ମୁସଲିମ୍ ଗୁଣ୍ଡାଗିରି' ବୋଲି ଅଭିହିତ କରିଛନ୍ତି। ସେ ଦାବି କରିଛନ୍ତି ଯେ, ଘାଟକୋପରର ଫିନିକ୍ସ ମଲ୍ ନିକଟରେ ମୁସଲିମ୍ କଟ୍ଟରପନ୍ଥୀମାନେ ହିନ୍ଦୁ ବନ୍ଧୁମାନଙ୍କ ଉପରେ ଆକ୍ରମଣ କରିଛନ୍ତି। ତାଙ୍କ ସୂଚନା ଅନୁଯାୟୀ, ଆଇନ ଉଲ୍ଲଂଘନ ଅଭିଯୋଗରେ ୮ ଜଣ ନାବାଳକଙ୍କ ବିରୋଧରେ BNS ଧାରା ୧୮୯(୨), ୧୮୯(୪), ୧୧୮(୧), ୩୫୨ ଓ ୩୫୧(୨) ଅନୁଯାୟୀ FIR ରୁଜୁ ହୋଇଛି। ଏହାସହ ୫ ଜଣ ନାବାଳକଙ୍କ ଅଭିଭାବକଙ୍କୁ ନୋଟିସ୍ ଜାରି କରାଯାଇଛି।ସୋମାୟା ଆହୁରି କହିଛନ୍ତି ଯେ, ସେ ଅପରାହ୍ନ ୪ଟାରେ ଘଟଣାସ୍ଥଳ ପରିଦର୍ଶନ କରିବେ। ଧର୍ମୀୟ ପରିଚୟକୁ ନେଇ କରାଯାଇଥିବା ଏହି ଦାବିଗୁଡ଼ିକର ସ୍ୱତନ୍ତ୍ର ସରକାରୀ ପୁଷ୍ଟି ଏପର୍ଯ୍ୟନ୍ତ ସାମ୍ନାକୁ ଆସିନାହିଁ। ତେଣୁ ପୋଲିସ ତଦନ୍ତରେ ଘଟଣାର ପ୍ରକୃତ ସତ୍ୟତା ଓ ଆକ୍ରମଣରେ ସମ୍ପୃକ୍ତ ବ୍ୟକ୍ତିଙ୍କ ଭୂମିକା ସ୍ପଷ୍ଟ ହେବା ଜରୁରୀ। ସାର୍ବଜନୀନ ସ୍ଥାନରେ ନାଗରିକଙ୍କ ସୁରକ୍ଷା ଓ ଆଇନଶୃଙ୍ଖଳା ବଜାୟ ରଖିବା ପୋଲିସ ପ୍ରଶାସନର ଗୁରୁତ୍ୱପୂର୍ଣ୍ଣ ଦାୟିତ୍ୱ। ଏହି ଘଟଣାରେ ନିରପେକ୍ଷ ତଦନ୍ତ ସହ ଦୋଷୀଙ୍କ ବିରୋଧରେ ଉପଯୁକ୍ତ ଆଇନଗତ ପଦକ୍ଷେପ ନେବାକୁ ଦାବି ହେଉଛି।
