ଡକାୟତି ଓ ସାଇବର ଠକେଇ ଗ୍ୟାଙ୍ଗର ପର୍ଦ୍ଦାଫାଶ । ମହିଳା ମାଷ୍ଟରମାଇଣ୍ଡଙ୍କ ସମେତ ୬ ଗିରଫ

ଯୋଡ଼ା : ବଡ଼ବିଲରେ ଡକାୟତି ଓ ସାଇବର ଠକେଇ ଗ୍ୟାଙ୍ଗ୍ର ପର୍ଦ୍ଦାଫାଶ ।  କେନ୍ଦୁଝର ଜିଲ୍ଲାର ବଡ଼ବିଲ ଅଞ୍ଚଳରେ ସକ୍ରିୟ ଥିବା ଏକ ଡକାୟତି ଓ ସାଇବର ଠକେଇର ପର୍ଦ୍ଦାଫାଶ କରିଛି ବଡ଼ବିଲ ଥାନା ପୋଲିସ।  ମାମଲାରେ ଜଣେ ମହିଳା ମାଷ୍ଟରମାଇଣ୍ଡଙ୍କ ସମେତ ମୋଟ ୬ ଜଣଙ୍କୁ ଗିରଫ କରାଯାଇଛି। ପୋଲିସର ସୂଚନା ଅନୁସାରେ, ଗିରଫ ମହିଳାଙ୍କର ଝାଡ଼ଖଣ୍ଡର କୁଖ୍ୟାତ ‘ଜାମତାରା ଗ୍ୟାଙ୍ଗ ସହ ସମ୍ପର୍କ ଥିବା ସନ୍ଦେହ କରାଯାଉଛି। ଗତ ଜୁନ୍ ୪ ତାରିଖରେ ରଇଡ଼ା ଛକ ନିକଟରେ ଜଣେ ଟ୍ରକ୍ ଡ୍ରାଇଭରଙ୍କୁ ମାରଣାସ୍ତ୍ର ଦେଖାଇ ମୋବାଇଲ୍ ଫୋନ୍ ଓ ନଗଦ ଟଙ୍କା ଲୁଟ୍ କରାଯାଇଥିଲା। ପରେ ସେହି ଲୁଟ୍ ହୋଇଥିବା ମୋବାଇଲ୍‌ରେ ଥିବା ଅନଲାଇନ୍ ପେମେଣ୍ଟ ଆପ୍ ବ୍ୟବହାର କରି ପୀଡ଼ିତଙ୍କ ବ୍ୟାଙ୍କ ଖାତାରୁ ପ୍ରାୟ ୧ ଲକ୍ଷ ୮୬ ହଜାର ୫୦୦ ଟଙ୍କା ଠକେଇ କରାଯାଇଥିଲା। ଏନେଇ ଜୁଲାଇ ୬ ତାରିଖରେ ବଡ଼ବିଲ ଥାନାରେ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଥିଲା। ତଦନ୍ତରେ ଜଣାପଡ଼ିଥିଲା ଯେ, ବଡ଼ବିଲ ଓ ଯୋଡ଼ା ଅଞ୍ଚଳର ୯ରୁ ୧୦ ଜଣଙ୍କୁ ନେଇ ଗଠିତ ଏକ ଗ୍ୟାଙ୍ଗ୍ ଦୀର୍ଘଦିନ ଧରି ଟ୍ରକ୍ ଚାଳକମାନଙ୍କୁ ଟାର୍ଗେଟ୍ କରି ଚୋରି, ଛିନତାଇ ଓ ଡକାୟତି କରୁଥିଲେ। ବିଶେଷକରି ଟ୍ରକ୍ ଡ୍ରାଇଭରମାନଙ୍କୁ ଟାର୍ଗେଟ୍ କରି ଏହି ଅପରାଧ କରୁଥିଲେ । ଲୁଟ୍ ହୋଇଥିବା ମୋବାଇଲ୍ ଫୋନ୍‌ଗୁଡ଼ିକୁ ଠାକୁରାଣୀ ଅଞ୍ଚଳର ଚନ୍ଦ୍ରାବତୀ ପାତ୍ରଙ୍କୁ ବିକ୍ରି କରାଯାଉଥିଲା। ସେ ସେହି ମୋବାଇଲ୍‌ରେ ଥିବା PhonePe ଓ Google Pay ଭଳି ଆପ୍ ବ୍ୟବହାର କରି ସାଇବର ଠକେଇ ମାଧ୍ୟମରେ ଟଙ୍କା ସ୍ଥାନାନ୍ତର କରୁଥିବା ଅଭିଯୋଗ ରହିଛି।  ଏହି କାରବାରରୁ ସେ ୨୦ରୁ ୩୦ ପ୍ରତିଶତ ପର୍ଯ୍ୟନ୍ତ କମିଶନ ପାଉଥିବା ପୋଲିସ କହିଛି। ଚଢ଼ାଉ ବେଳେ ଚନ୍ଦ୍ରାବତୀଙ୍କ ଘରୁ ୧୨ଟି ମୋବାଇଲ୍ ଫୋନ୍, ୨୬ଟି ବ୍ୟାଙ୍କ ପାସ୍‌ବୁକ୍ ଏବଂ ୨୮ଟି ସିମ୍ କାର୍ଡ ଜବତ କରାଯାଇଛି। ସେହିପରି ଆଜି ଭୋର ସମୟରେ ଯୋଡ଼ା ଅଞ୍ଚଳରେ ଡକାୟତି ଯୋଜନା କରୁଥିବା ବେଳେ ୫ ଜଣ ଅଭିଯୁକ୍ତଙ୍କୁ ମାରଣାସ୍ତ୍ର ସହ ଗିରଫ କରାଯାଇଥିଲା। ପଚରା ଉଚୁରା ପରେ ଚନ୍ଦ୍ରାବତୀକୁ ଗିରଫ କରିଥିଲା ପୋଲିସ । ଗିରଫ ଅଭିଯୁକ୍ତମାନେ ହେଲେ ହଳଧର ନାୟକ, ରୌନକ ପାତ୍ର, ମାନସ ତାନ୍ତି, ଆରବାଜ ଖାନ, ଚନ୍ଦ୍ରାବତୀ ପାତ୍ର ଏବଂ ସୁରଜ ପାଲ ଚୌଧୁରୀ। ସେମାନଙ୍କଠାରୁ ୩ଟି ଖଣ୍ଡା, ଗୋଟିଏ ଛୁରୀ, ୫ଟି ମୁଖା ଓ ୩ ହଜାର ୩ ଶହ ଟଙ୍କା ଜବତ କରାଯାଇଛି। ଏହି ମାମଲାରେ ତଦନ୍ତ ଜାରି ରହିଛି ଏବଂ ଗ୍ୟାଙ୍ଗର ଅନ୍ୟ ସଦସ୍ୟମାନଙ୍କୁ ଧରିବା ପାଇଁ ପୋଲିସର ଚଢ଼ାଉ ଜାରି ଚାଲିଥିବା ବଡ଼ବିଲ ଏସଡିପିଓ ସୂଚନା ଦେଇଛନ୍ତି ।