OAS Officer Arrest: ଅଧସ୍ତନ ମହିଳା କର୍ମଚାରୀଙ୍କ ଅଭିଯୋଗରେ OAS ଅଫିସର ଗିରଫ

ଭୁବନେଶ୍ୱର: ଅଧସ୍ତନ ମହିଳା କର୍ମଚାରୀଙ୍କ ଅଭିଯୋଗକୁ ନେଇ ଅଡୁଆରେ ପଡ଼ିଛନ୍ତି ଓଏଏସ୍ ଅଫିସର। ଭୁବନେଶ୍ୱର ଖାରବେଳନଗର ଥାନା ଅଞ୍ଚଳରେ ଜଣେ ମହିଳା କର୍ମଚାରୀଙ୍କ ଘରେ ରାତିରେ ପଶି ଶାରୀରିକ ନିର୍ଯାତନା ଓ ଦୁଷ୍କର୍ମ ଅଭିଯୋଗରେ ପରିବହନ ବିଭାଗର ଅତିରିକ୍ତ ସଚିବ ତଥା OAS ଅଫିସର ଅରୁଣ କୁମାର ବିଶ୍ୱାଳଙ୍କୁ ପୋଲିସ ଗିରଫ କରିଛି। ସରକାରୀ ରେକର୍ଡ ଅନୁସାରେ ସେ କମର୍ସ ଆଣ୍ଡ ଟ୍ରାନ୍ସପୋର୍ଟ ବିଭାଗର ଅତିରିକ୍ତ ସଚିବ ଭାବେ କାର୍ଯ୍ୟରତ ଥିଲେ। ପୋଲିସ ସୂଚନା ଅନୁସାରେ, ଗୁରୁବାର ବିଳମ୍ବିତ ରାତିରେ ମହିଳା କର୍ମଚାରୀ ରହୁଥିବା ଭଡ଼ା ଘରକୁ ଅରୁଣ ବିଶ୍ୱାଳ ଯାଇଥିଲେ। ସେଠାରେ ଗଣ୍ଡଗୋଳ କରିବା ସହ ଜୋରଜବରଦସ୍ତି ଘରେ ପଶି ତାଙ୍କୁ ଶାରୀରିକ ଭାବେ ଆକ୍ରମଣ କରିଥିବା ମହିଳା ଅଭିଯୋଗ କରିଛନ୍ତି। ଘଟଣା ସମୟରେ ମହିଳା ଜଣକ ପୋଲିସକୁ ଫୋନ୍ କରିଥିବାରୁ PCR ଟିମ୍ ଘଟଣାସ୍ଥଳରେ ପହଞ୍ଚି ଅଫିସରଙ୍କୁ ଥାନାକୁ ନେଇଥିଲା। ପରଦିନ ମହିଳା ଖାରବେଳନଗର ଥାନାରେ ଲିଖିତ ଅଭିଯୋଗ ଦେଇଥିଲେ। ଅଭିଯୋଗ ଆଧାରରେ ପୋଲିସ କେସ୍ ନମ୍ବର ୬୫୭/୨୦୨୬ ରୁଜୁ କରିଛି। ଏଥିରେ BNSର ଧାରା ୬୪(୨)(b), ୧୦୯(୧), ୧୧୫(୨), ୨୯୬, ୩୫୧(୨) ଓ ୩୫୧(୩) ଲାଗିଥିବା ପୋଲିସ ସୂଚନାରୁ ଜଣାପଡ଼ିଛି। ପୋଲିସ ମହିଳାଙ୍କ ବୟାନ ରେକର୍ଡ କରିବା ସହ ଘଟଣାସ୍ଥଳର CCTV ଫୁଟେଜ୍ ଓ ଅନ୍ୟାନ୍ୟ ଡିଜିଟାଲ୍ ପ୍ରମାଣ ସଂଗ୍ରହ କରିଥିବା କୁହାଯାଇଛି। ମହିଳା ଜଣକ ଦୀର୍ଘ କିଛି ମାସ ଧରି ହଇରାଣ ଓ ଧମକର ସମ୍ମୁଖୀନ ହୋଇଥିବା ମଧ୍ୟ ଅଭିଯୋଗ କରିଥିବା ରିପୋର୍ଟରେ ଉଲ୍ଲେଖ ରହିଛି। ତେବେ ଏହି ସମସ୍ତ ଅଭିଯୋଗର ସତ୍ୟତା ପୋଲିସ ତଦନ୍ତ ପରେ ସ୍ପଷ୍ଟ ହେବ। ଅନ୍ୟପଟେ, ଅରୁଣ ବିଶ୍ୱାଳଙ୍କ ପକ୍ଷରୁ ଅଭିଯୋଗକୁ ମିଥ୍ୟା ବୋଲି କୁହାଯାଇଛି। ତାଙ୍କ ଓକିଲ ମଧ୍ୟ ଅଭିଯୋଗ ପଛରେ ଅନ୍ୟ ଉଦ୍ଦେଶ୍ୟ ଥିବା ଦାବି କରିଛନ୍ତି। ପୋଲିସ ଏହି ଘଟଣାରେ ତଦନ୍ତ ଜାରି ରଖିଛି। ଅଭିଯୁକ୍ତଙ୍କୁ ଡାକ୍ତରୀ ପରୀକ୍ଷା ପାଇଁ କ୍ୟାପିଟାଲ୍ ହସ୍ପିଟାଲ୍ ନିଆଯାଇଥିବା ବେଳେ ସେଠାରେ ସେ ଛାତିରେ ଯନ୍ତ୍ରଣା ଅନୁଭବ କରିଥିବାରୁ ନିରୀକ୍ଷଣରେ ରଖାଯାଇଥିବା ରିପୋର୍ଟ ରହିଛି। ମାମଲାରେ ପୋଲିସର ପରବର୍ତ୍ତୀ ତଦନ୍ତ ଓ ଆଇନଗତ ପ୍ରକ୍ରିୟା ଜାରି ରହିଛି। ଏହି ଘଟଣା ରାଜ୍ୟର ସରକାରୀ କାର୍ଯ୍ୟାଳୟରେ ମହିଳା କର୍ମଚାରୀଙ୍କ ସୁରକ୍ଷା ଏବଂ କର୍ମକ୍ଷେତ୍ରରେ ଯୌନ ଉତ୍ପୀଡ଼ନ ସମ୍ପର୍କିତ ବ୍ୟବସ୍ଥାକୁ ନେଇ ମଧ୍ୟ ଚର୍ଚ୍ଚା ସୃଷ୍ଟି କରିଛି।