Nursing Job Scam : ନିଯୁକ୍ତି ମେଳାରେ ଠକାମିର ସଙ୍ଗୀନ ଅଭିଯୋଗ: ଦିଲ୍ଲୀରେ ICU ନର୍ସିଂ ଚାକିରି ନାଁରେ ପାଟଣାର ଯୁବତୀଙ୍କୁ ନିର୍ଯାତନା

ପାଟଣା: ରୋଜଗାର ଓ ଭଲ ଭବିଷ୍ୟତର ସ୍ବପ୍ନ ଦେଖାଇ ଯୁବପିଢ଼ିଙ୍କୁ ଜାଲରେ ଫସାଯାଉଥିବା ନେଇ ଏକ ଚାଞ୍ଚଲ୍ୟକର ଅଭିଯୋଗ ସାମ୍ନାକୁ ଆସିଛି। ପାଟଣାର ପୂଜା କୁମାରୀ ନାମ୍ନୀ ଜଣେ ଯୁବତୀ ଦିଲ୍ଲୀରେ ICU ନର୍ସିଂ ଚାକିରି ନାଁରେ ଗୁରୁତର ଶୋଷଣ ଓ ନିର୍ଯାତନାର ଶିକାର ହୋଇଥିବା ଅଭିଯୋଗ କରିଛନ୍ତି।

​ନିଯୁକ୍ତି ମେଳାରୁ ଆରମ୍ଭ ହୋଇଥିଲା ସ୍ବପ୍ନ

ଅଗଷ୍ଟ ୧୯ ରୁ ୨୩ ମଧ୍ୟରେ ପାଟଣାର ଜ୍ଞାନ ଭବନଠାରେ ଆୟୋଜିତ ହୋଇଥିବା ବିଶାଳ ରୋଜଗାର ମେଳାରେ ପୂଜା ଅଂଶଗ୍ରହଣ କରିଥିଲେ। ସେଠାରେ ତାଙ୍କୁ ମାସିକ ପ୍ରାୟ ₹୪୮,୦୦୦ ଟଙ୍କା ଦରମାରେ ଜଣେ ICU ନର୍ସ ଭାବେ ନିଯୁକ୍ତି ପତ୍ର ପ୍ରଦାନ କରାଯାଇଥିଲା। ବିଶେଷ କଥା ହେଉଛି, ଅଗଷ୍ଟ ୨୩ ତାରିଖରେ ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀଙ୍କ ହାତରୁ ସେ ଏହି ନିଯୁକ୍ତି ପତ୍ର ଗ୍ରହଣ କରିଥିଲେ। ଚାକିରି ପାଇବା ପରେ ଏକ ନୂଆ ଆଶା ନେଇ ସେ ଦିଲ୍ଲୀ ଯାତ୍ରା କରିଥିଲେ। 

​ଦିଲ୍ଲୀରେ ଆରମ୍ଭ ହେଲା ଭୟାନକ କାହାଣୀ

ପୂଜାଙ୍କ ଅଭିଯୋଗ ଅନୁଯାୟୀ, ଦିଲ୍ଲୀ ପହଞ୍ଚିବା ପରେ ତାଙ୍କୁ କୌଣସି ହସ୍ପିଟାଲ କିମ୍ବା ମେଡିକାଲରେ କାମ ଦିଆଯାଇନଥିଲା। ବରଂ ତାଙ୍କୁ ଏକ ଅଜଣା ହଷ୍ଟେଲକୁ ନିଆଯାଇ ବନ୍ଧକ ରଖାଯାଇଥିଲା।

​ସେଠାରେ ଯୁବକ ଓ ଯୁବତୀମାନଙ୍କୁ ଏକାଠି ରଖାଯାଉଥିଲା। ଅଭିଯୋଗ ଅନୁସାରେ, ଯୁବତୀମାନଙ୍କୁ ଭିଡିଓ କଲ୍ ମାଧ୍ୟମରେ ଅନ୍ୟ ପୁରୁଷମାନଙ୍କୁ ଦେଖାଯାଉଥିଲା। ଯେଉଁମାନଙ୍କୁ ପସନ୍ଦ କରାଯାଉଥିଲା, ସେମାନଙ୍କୁ ୨୪ ଘଣ୍ଟା ପାଇଁ ବାହାରକୁ ପଠାଯାଉଥିଲା। ଏହି ଅସାମାଜିକ ଓ ଅସଦ୍ ବ୍ୟବସାୟରେ ସହଯୋଗ କରିବାକୁ ମନା କରିବାରୁ ପୂଜାଙ୍କୁ ଅମାନୁଷିକ ନିର୍ଯାତନା ଦିଆଯାଇଥିଲା। ତାଙ୍କୁ ଖାଇବାକୁ ନଦେଇ ଶୌଚାଳୟ ସଫା କରିବାକୁ ବାଧ୍ୟ କରାଯାଉଥିଲା। ଏପରିକି ତାଙ୍କୁ ବିଦେଶ ପଠାଇବା ପାଇଁ ପ୍ରସ୍ତୁତି ଚାଲିଥିବା ସେ ଅଭିଯୋଗ କରିଛନ୍ତି। 

​କୌଶଳକ୍ରମେ ଖସି ଆସିଲେ ପାଟଣା

ଏଭଳି ପରିସ୍ଥିତି ଭିତରୁ ପୂଜା କୌଶଳକ୍ରମେ ନିଜ ଜୀବନ ବଞ୍ଚାଇ ଦିଲ୍ଲୀରୁ ଖସି ଆସିବାରେ ସଫଳ ହୋଇଥିଲେ ଏବଂ ପାଟଣା ଫେରିଆସିଥିଲେ। ଏବେ ସେ ଘଟିଥିବା ସମସ୍ତ ଘଟଣା ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ଭେଟି ନ୍ୟାୟ ଭିକ୍ଷା କରିବାକୁ ଚେଷ୍ଟା କରୁଛନ୍ତି।

​ସରକାରୀ ରୋଜଗାର ମେଳା ଉପରେ ପ୍ରଶ୍ନବାଚୀ

ସରକାରୀ ସ୍ତରରେ ଆୟୋଜିତ ଏକ ବଡ଼ ନିଯୁକ୍ତି ମେଳାରେ ଚୟନ ହୋଇଥିବା ଯୁବତୀଙ୍କ ସହ ଏପରି ଘଟଣା ଘଟିବା ସମଗ୍ର ବ୍ୟବସ୍ଥା ଉପରେ ଗମ୍ଭୀର ପ୍ରଶ୍ନବାଚୀ ସୃଷ୍ଟି କରିଛି। ଏହି ମେଳାରେ ହଜାର ହଜାର ଯୁବକ-ଯୁବତୀଙ୍କୁ ନିଯୁକ୍ତି ଦିଆଯାଇଥିବା ଦାବି କରାଯାଇଥିଲା। ପୂଜାଙ୍କ ଏହି ଗୁରୁତର ଅଭିଯୋଗ ପରେ ପ୍ରଶାସନ ଓ ପୋଲିସ ଏହାର ନିରପେକ୍ଷ ତଦନ୍ତ କରି ପ୍ରକୃତ ସତ୍ୟତା ସାମ୍ନାକୁ ଆଣିବା ସହ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ଜରୁରୀ ହୋଇପଡ଼ିଛି।