ଡ୍ରାଇଭର ପ୍ରେମରେ ପତ୍ନୀ- ସ୍ୱାମୀ ବିଛଣାରେ ବିଷାକ୍ତ ସାପ ଛାଡ଼ି ମର୍ଡର

ବିଷଧର ସାପ ଦ୍ୱାରା ଦଂଶନ କରାଇ ସ୍ୱାମୀକୁ ହତ୍ୟା। ପ୍ରେମିକ ସହ ମିଶି ସ୍ୱାମୀଙ୍କୁ ଏଭଳି ମାରିଛି ପତ୍ନୀ। ମିରଟରେ ସ୍କୁଲ ସଞ୍ଚାଳକ ଅତୁଲ ପାଓ୍ୱାର ହତ୍ୟାକାଣ୍ଡରେ ପତ୍ନୀ ଦାମିନି ଓ ତାଙ୍କ ପ୍ରେମିକ ତୁଷାରଙ୍କ ଷଡ଼ଯନ୍ତ୍ରର ଦିଗକୁ ଖୁଲାସା କରିଛି ପୁଲିସ। ଦାମିନୀ, ପ୍ରେମିକ ତୁଷାର ଓ  ଅନ୍ୟ ଦୁଇ ସାଥୀ ମିଳିମିଶି ମାରିଦେଲେ ଅତୁଲଙ୍କୁ। ଆଗ କ୍ଷୀରରେ ନିଦ ବଟିକା ମିଶାଇଲେ। ପରେ ବିଛଣାରେ ବିଷାକ୍ତ ସାପ ଛାଡ଼ିଦେଲେ। ଆଉ ସାପ କାମୁଡ଼ାରେ ଚାଲିଗଲା ଅତୁଲଙ୍କ ଜୀବନ। ହତ୍ୟା ପଛରେ ୨୦ଲକ୍ଷ ଟଙ୍କାର ବୀମା ରାଶି ହଡ଼ପ ସାଙ୍ଗକୁ ପରକୀୟାପ୍ରୀତି ଥିଲା। ୩୫ ବର୍ଷୀୟ ଅତୁଲ ପତ୍ନୀ ଦାମିନୀ ସହ ହସ୍ତିନାପୁରର ରାମଳୀଳା ମୈଦାନସ୍ଥିତ କୃଷ୍ଣା କିଡସ ପବ୍ଲିକ ସ୍କୁଲକୁ ପରିଚାଳନା କରୁଥିଲେ। ଦୁହେଁ ୨୦୧୯ରେ ପ୍ରେମ ବିବାହ କରିଥିଲେ। ଶୁକ୍ରବାର ସକାଳେ ଅତୁଲଙ୍କୁ ସାପ କାମୁଡ଼ିଛି କହି ହସ୍ତିନାପୁର ସିଏଚସିକୁ ନେଇଥିଲା ଦାମିନୀ। ହେଲେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ। ଘଟଣାସ୍ଥଳରେ ଅତୁଲଙ୍କ ବିଛଣାରୁ ବିଷଧର ସର୍ପ ମିଳିଥିଲା। ସନ୍ଦିଗ୍ଧ ପରିସ୍ଥିତିରେ ପୁଲିସ ଶବକୁ ଜବତ କରି ପୋଷ୍ଟମର୍ଟମ ପାଇଁ ପଠାଇ ତଦନ୍ତ କରିଥିଲା। ତଦନ୍ତରେ ଦାମିନୀର ଫୋନ୍ କଲ ଡିଟେଲ୍ସ ଓ ଟେକ୍ନିକ ସାକ୍ଷୀର ଛାନଭିନ କରିଥିଲା। ଜଣାପଡ଼ିଥିଲା, ସ୍କୁଲ ଡ୍ରାଇଭର ତୁଷାର ଓରଫ ନିକ୍କି ସହ ସେ ନିରନ୍ତର ସମ୍ପର୍କରେ ରହୁଥିଲେ। ଜେରାରେ ତୁଷାର ମାନିଥିଲା ଯେ, ଦାମିନୀଙ୍କ ସହ ତାଙ୍କର ପ୍ରେମସମ୍ପର୍କ ଥିଲା। ଦୁହେଁ ଅତୁଲକୁ ମାରିବାକୁ ଷଡ଼ଯନ୍ତ୍ର ରଚିଥିଲେ। ଯୋଜନା ମୁତାବକ ଗୁରୁବାର ରାତିରେ ଅତୁଲ କ୍ଷୀରରେ ଅଧିକ ମାତ୍ରାରେ ନିଦ ବଟିକା ମିଶାଇଥିଲେ।  ଆଉ ଗଭୀର ନିଦରେ ଶୋଇବା ପରେ ସୋନୁ ଓ ଉଦୟ ସହ କମ୍ୱଳରେ ବିଷାକ୍ତ ସାପ ଛାଡ଼ିଦେଇଥିଲେ। ତୁଷାର ମୋବାଇଲରେ ଡବାରେ ବନ୍ଦ ଥିବା ସାପର ଫଟୋ ବି ଦେଖିଥିଲା ପୁଲିସ। ତୁଷାର କହିଥିଲା, ଅତୁଲ ମରିବା ପରେ ବୀମା ରାଶି ହଡ଼ପ କରିବାର ପ୍ଲାନ୍ ଥିଲା। ସେ ନିଜ ପତ୍ନୀକୁ ଛାଡ଼ପତ୍ର ଦେଇ ଦାମିନୀକୁ ବିବାହ କରିଥାଆନ୍ତା। ପୁଲିସ ତଦନ୍ତରୁ ଏ କଥା ବି ଆସିଛି ଯେ, ଅତୁଲଙ୍କ ନାଁରେ ପ୍ରାୟ ୨୦ଲକ୍ଷ ଟଙ୍କାର ବୀମା ଥିଲା। ବୀମା ରାଶି ମିଳିବା ପରେ ସୋନୁ ଓ ଉଦୟକୁ ୫ଲକ୍ଷ ଟଙ୍କା ମିଳିବ ବୋଲି କଥା ଦିଆଯାଇଥିଲା। ଏହା ବ୍ୟତୀତ ୨୦ ଦିନ ପୂର୍ବରୁ ବି ଅତୁଲଙ୍କୁ ଆର୍ଟିଗା ଗାଡ଼ି ମଡ଼ାଇ ମାରିବାକୁ ପ୍ରୟାସ କରାଯାଇଥିଲା। ହେଲେ ହେଲମେଟ ପିନ୍ଧିଥିବାରୁ ବଞ୍ଚିଯାଇଥିଲେ ଅତୁଲ। ଅତୁଲ ହତ୍ୟାକାଣ୍ଡ ପଛରେ ଆଉ ଏକ ଖୁଲାସା ହୋଇଛି। ଅତୁଲଙ୍କ ବାପା ଅଜୟ ସିଂ କହିଛନ୍ତି, ବିବାହର ୬ ବର୍ଷ ଯାଏ ସବୁ ଠିକ ଥିଲା। ଜ୍ୟୋତିଷଙ୍କ ପରାମର୍ଶରେ ଦାମିନୀ ଅତୁଲଙ୍କୁ ଘରଠୁ ଦୂରେଇ ରହିବାକୁ କହିଥିଲେ। କୁଆଡ଼େ ଜ୍ୟୋତିଷ କହିଥିଲେ,ସେମାନଙ୍କୁ ୪ ବର୍ଷ ଯାଏ ପରିବାରଠୁ ଦୂରେଇ ରହିଲେ ସବୁ ମଙ୍ଗଳ ହେବ। ଦାମିନୀଙ୍କ ଚାପରେ ଅତୁଲ ହସ୍ତିନାପୁରର ଜେ-ବ୍ଲକ କଲୋନୀରେ ନିଜ ସ୍କୁଲ ଆରମ୍ଭ କରିଥିଲେ। ୩ ମାସ ପୂର୍ବରୁ ଗାଁରେ ସପରିବାର ରହୁଥିଲେ ଅତୁଲ।