SAMALESWARI MAA: ମହାଳୟାରେ ମା’ ସମଲେଶ୍ୱରୀଙ୍କ ଧବଳମୁଖୀ ବେଶ, ଦର୍ଶନ ପାଇଁ ଭକ୍ତଙ୍କ ପ୍ରବଳ ଭିଡ଼

ବରଗଡ: ପବିତ୍ର ମହାଳୟା ତିଥିରେ ବରଗଡର ଅଧିଷ୍ଠାତ୍ରି ଦେବୀ ମା’ ସମଲେଶ୍ୱରୀଙ୍କ ଧବଳମୁଖୀ ବେଶ ଦର୍ଶନ କଲେ ଭକ୍ତ। ମା’ଙ୍କ ଏହି ଦିବ୍ୟ ବେଶ ଦର୍ଶନ ପାଇଁ ମନ୍ଦିରରେ ଲାଗିଛି ଭକ୍ତଙ୍କ ଲମ୍ବା ଧାଡ଼ି। ଗଙ୍ଗାଦେବୀଙ୍କ ବେଶରେ ମା’ଙ୍କ ଦର୍ଶନ କଲେ ଗଙ୍ଗାସ୍ନାନର ପୁଣ୍ୟ ମିଳିବା ସହ କୋଟି ଜନ୍ମର ପୁଣ୍ୟ ଅର୍ଜନ ହୁଏ ବୋଲି ଭକ୍ତଙ୍କ ମଧ୍ୟରେ ରହିଛି ଅଗାଢ଼ ବିଶ୍ୱାସ। ପ୍ରତିବର୍ଷ ମହାଳୟା ତିଥିରେ ମା’ ସମଲେଶ୍ୱରୀ ଧବଳମୁଖୀ ବେଶରେ ଭକ୍ତଙ୍କୁ ଦର୍ଶନ ଦେଇଥାନ୍ତି। ଏହି ପବିତ୍ର ଦିନକୁ ଅପେକ୍ଷା କରି ରହିଥାନ୍ତି ଅନେକ ଶ୍ରଦ୍ଧାଳୁ। ଆଜି ମା’ଙ୍କ ଦର୍ଶନ କରି ଭକ୍ତମାନେ ନିଜ ପରିବାର ସହ ସମଗ୍ର ଜୀବଜଗତର ମଙ୍ଗଳ କାମନା କରିଛନ୍ତି। ଏଥିସହ ମାନସିକ ପୂରଣ ପାଇଁ ମା’ଙ୍କ ନିକଟରେ ଦୀପ ପ୍ରଜ୍ୱଳନ କରି ଆଶୀର୍ବାଦ ଭିକ୍ଷା କରିଛନ୍ତି।

ଆଜି ହେଉଛି ପିତୃପକ୍ଷର ଶେଷ ଦିବସ। ଧାର୍ମିକ ବିଶ୍ୱାସ ଅନୁଯାୟୀ, ପିତୃପକ୍ଷରେ ପୂର୍ବପୁରୁଷମାନେ ମର୍ତ୍ତ୍ୟଲୋକକୁ ଆସି ନିଜ ବନ୍ଧୁ ପରିଜନଙ୍କଠାରୁ ଅନ୍ନ ଓ ପିଣ୍ଡଦାନ ଗ୍ରହଣ କରିଥାନ୍ତି ଏବଂ ମହାଳୟା ଦିନ ପୁନର୍ବାର ପିତୃଲୋକକୁ ଫେରିଯାଆନ୍ତି ବୋଲି ବିଶ୍ୱାସ ରହିଛି। ଏହି ଅବସରରେ ମା’ ସମଲେଶ୍ୱରୀଙ୍କ ଧବଳମୁଖୀ ବେଶ ଦର୍ଶନ କଲେ ପିତୃଋଣରୁ ମୁକ୍ତି ମିଳିବା ସହ ପୁଣ୍ୟ ଲାଭ ହୁଏ ବୋଲି ଶ୍ରଦ୍ଧାଳୁଙ୍କ ଆସ୍ଥା ରହିଛି। ଅନ୍ୟପଟେ ମା’ଙ୍କ ଶାରଦୀୟ ପୂଜା ପାଇଁ ମନ୍ଦିରରେ ଆରମ୍ଭ ହୋଇଛି ପ୍ରସ୍ତୁତି। ମହାଳୟା ଅବସରରେ କଳସ ଶୋଭାଯାତ୍ରା ଆୟୋଜନ କରାଯାଉଥିବା ବେଳେ ଆସନ୍ତାକାଲିଠାରୁ ମା’ଙ୍କ ପୀଠରେ ନବଦିନାତ୍ମକ ଶାରଦୀୟ ପୂଜା ଆରମ୍ଭ ହେବ। ଏଥିପାଇଁ ମନ୍ଦିର କମିଟି ପକ୍ଷରୁ ଭକ୍ତଙ୍କ ସୁବିଧାଜନକ ଦର୍ଶନ ନିମନ୍ତେ ବ୍ୟାପକ ବ୍ୟବସ୍ଥା କରାଯାଇଛି। ମା’ଙ୍କ ଧବଳମୁଖୀ ବେଶ ଦର୍ଶନ ଓ ଶାରଦୀୟ ପୂଜାକୁ ନେଇ ସମଗ୍ର ଅଞ୍ଚଳରେ ଭକ୍ତିମୟ ପରିବେଶ ସୃଷ୍ଟି ହୋଇଛି। ମା’ଙ୍କ ଆଶୀର୍ବାଦ ଲାଭ କରିବା ପାଇଁ ମନ୍ଦିରରେ ଶ୍ରଦ୍ଧାଳୁଙ୍କ ସମାଗମ ଜାରି ରହିଛି।