କରଜଭାରରେ ରାଜ୍ୟ ସରକାର- ଆଇଏଏସ, ଆଇପିଏସ ଓ ଆଇଏଫଏସ କମ୍ କରିବାକୁ ପ୍ରସ୍ତୁତ

କରଜରେ ବୁଡ଼ି ରହିଛି ରାଜ୍ୟ। ସ୍ଥିତି ଏମିତି ଯେ, ରାଜ୍ୟରେ ଆଇଏଏସ, ଆଇପିଏସ ଓ ଆଇଏଫଏସ ସଂଖ୍ୟା ହ୍ରାସ କରିବାକୁ ପ୍ରସ୍ତୁତ ହୋଇଗଲାଣି। ଯେତିକି ସ୍ୱୀକୃତ ସଂଖ୍ୟା ଅଛି, ତାକୁ କମ୍ କରିଦେବାକୁ କେନ୍ଦ୍ରକୁ ପ୍ରସ୍ତାବ ପଠାଇବ। ସରକାରଙ୍କ ଦାବି ଯେ, ବଡ଼ କ୍ୟାଡ଼ର ଉପରେ ବାର୍ଷିକ ପ୍ରାୟ ୨ଶହ କୋଟି ଟଙ୍କା ଖର୍ଚ୍ଚ ହେଉଛି। ଖର୍ଚ୍ଚକୁ ରୋକିବା ଓ ପ୍ରଶାସନିକ ବ୍ୟୟକୁ ମୁକାବିଲା ଲାଗି ହିମାଚଳପ୍ରଦେଶ ସରକାର ଏଭଳି ଚିନ୍ତା କରିଛନ୍ତି। ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ କହିଛନ୍ତି, ଆଇଏଏସ, ଆଇପିଏସ ଓ ଆଇଏଫଏସ ଅଧିକାରୀଙ୍କ ସଂଖ୍ୟା ଯେତିକି ସ୍ୱୀକୃତି ପାଇଛି। ତାଠୁ କମ୍ କରିବାକୁ ଔପଚାରିକ ପ୍ରସ୍ତାବ ପଠାଯିବ। ହିମାଚଳପ୍ରଦେଶ ଉପରେ ୧ଲକ୍ଷ କୋଟି ଟଙ୍କାରୁ ଅଧିକ ଋଣ ଅଛି। ସେଥିଲାଗି ସରକାର ଖର୍ଚ୍ଚ କାଟ୍ ଲାଗି କମ୍ କରିବାକୁ ରାସ୍ତା ଖୋଜୁଛନ୍ତି। ହିମାଚଳପ୍ରଦେଶରେ ଆଇଏଏସ ଅଧିକାରୀଙ୍କ ସ୍ୱୀକୃତ ସଂଖ୍ୟା ୧୫୩ରୁ ହ୍ରାସ କରି ୧୩୦ କରିବାକୁ ପ୍ରସ୍ତାବ ଦିଆଯିବ। ଅର୍ଥାତ୍ କ୍ୟାଡ଼ରରେ ୨୩ ପଦ କମ୍ କରାଯିବ। ଆଇଏଏସ କ୍ୟାଡ଼ରକୁ ଆହୁରି ହ୍ରାସ କରି ୧୦୦ରେ ସୀମିତ କରାଯିବା କଥା। ହେଲେ ଏଥିରେ ଆଇଏଏସ ଗୋଷ୍ଠୀର ଅସନ୍ତୋଷକୁ ଦେଖି ୧୩୦ ଯାଏ ରଖିବାକୁ ପ୍ରସ୍ତାବ ଦିଆଯିବ। ଆଇଏଫଏସରେ ୩୫ ପଦବୀ ହ୍ରାସ ଅର୍ଥାତ୍ ୧୧୮ରୁ ୮୩ କରାଯିବ। ସେହିଭଳି ଆଇପିଏସ କ୍ୟାଡ଼ରରେ ୯୬ ଆଇପିଏସ ପଦରୁ ଆହୁରି ପଦବୀ କମ୍ କରାଯିବ। ମୁଖ୍ୟମନ୍ତ୍ରୀଙ୍କ କହିବା କଥା, ହିମାଚଳକୁ ଏତେ ବଡ଼ ପ୍ରଶାସନିକ ଅଧିକାରୀଙ୍କ ଆବଶ୍ୟକତା ନାହିଁ। କାରଣ ଅନେକ ଅଧିକାରୀଙ୍କ ଦକ୍ଷତାକୁ ସଦୁପଯୋଗ କରାଯାଇପାରୁନି। ସରକାର ଏବେ କେନ୍ଦ୍ରୀୟ ଡେପୁଟେସନ ଲାଗି ପୂର୍ବ ତୁଳନାରେ ଅଧିକ ଅଧିକାରୀଙ୍କୁ ଏନଓସି ଜାରି କରୁଛନ୍ତି। ଆଉ ସେମାନଙ୍କୁ ତତ୍କାଳ ରିଲିଭ୍ କରାଯାଉଛି। ରାଜ୍ୟ ସରକାରଙ୍କ ମୁତାବକ, ପ୍ରତିବର୍ଷ ଜଣେ ଅଧିକାରୀଙ୍କ ପିଛା ୫୦ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହେଉଛି। ଅଧିକାରୀଙ୍କ ଦରମା, ସେମାନଙ୍କ ସପୋର୍ଟ ଷ୍ଟାଫ୍, ସରକାରୀ ଗାଡ଼ି, କ୍ୱାର୍ଟର ଓ ଅନ୍ୟ ସୁବିଧାରେ ଏ ସବୁ ଖର୍ଚ୍ଚ ହେଉଛି। ସରକାର ଖର୍ଚ୍ଚ କାଟ୍ କରି  ସଂଶାଧନକୁ ଅଧିକ ପ୍ରଭାବୀ କରିବାକୁ ଚିନ୍ତା କରିଛନ୍ତି।