ବହି ୫ଲକ୍ଷ ଅଫର- ମନ୍ତ୍ରୀଙ୍କୁ ବଦନାମ କରୁଛନ୍ତି ସୁପାରୀ ସାମ୍ୱାଦିକ!

ବହି ବିଭ୍ରାଟ ଘଟଣାରେ କ୍ରାଇମବ୍ରାଞ୍ଚ ଖୋଳତାଡ଼ କରୁଛି। ଆଜି ଏସସିଇଆରଟି ଅଫିସରେ ପଶି ଘଣ୍ଟାଚକଟା କରିଛି କ୍ରାଇମବ୍ରାଞ୍ଚ। ଏସସିଇଆରଟିର ପୂର୍ବତନ ନିର୍ଦେଶକ ମନୋଜ ପାଢ଼ୀଙ୍କୁ ବି ଗିରଫ କରିସାରିଛି କ୍ରାଇମବ୍ରାଞ୍ଚ। ହେଲେ ଏ ବିଭ୍ରାଟ ଭିତରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କୁ ବଦନାମ କରିବାକୁ ବଡ଼ ଷଡ଼ଯନ୍ତ୍ର ହୋଇଛି। ତାଙ୍କ ନିର୍ବାଚନମଣ୍ଡଳୀ ଉମରକୋଟର ଜଣେ ସ୍ଥାନୀୟ ସାମ୍ୱାଦିକଙ୍କ ଜରିଆରେ କୁଆଡ଼େ ବହି ବିଭ୍ରାଟ ଘଟଣାକୁ ଚାପିବାକୁ ୫ଲକ୍ଷ ଟଙ୍କା ଅଫର ଦିଆଯାଇଥିଲା ଭୁବନେଶ୍ୱରର ଏକ ଚାନେଲକୁ। ଯେଉଁ ଚାନେଲରେ ସଂପୃକ୍ତ ସାମ୍ୱାଦିକ ଉମରକୋଟ ପ୍ରତିନିଧି ଭାବେ କାମ କରୁଥିଲେ। ଏ କଥା ଉଠୁଛି ପଡ଼ୁଛି। ଆଉ ଏକ ଗଣମାଧ୍ୟମ ସଂସ୍ଥାର ଆଲୋଚନା ଚକ୍ରରେ ଫୋକସ ପ୍ଲସର ସମ୍ପାଦକ ସୁଧାଂଶୁ ରାଉତ ଅତିଥି ଭାବେ ଯାଇ କହୁ କହୁ କହିଦେଇଥିଲେ ଯେ, ବହି ବିଭ୍ରାଟ ଘଟଣାକୁ ଚାପିବାକୁ ତାଙ୍କୁ କୁଆଡ଼େ ଉମରକୋଟ ପ୍ରତିନିଧିଙ୍କ ଜରିଆରେ ୫ଲକ୍ଷ ଟଙ୍କା ଯଚାଯାଇଥିଲା। ହେଲେ ଏ କଥା ଯେ ମିଛ, ତା ପର ଦିନ ସଂପୃକ୍ତ ଉମରକୋଟ ସାମ୍ୱାଦିକ ଫେସବୁକ ଲାଇଭରେ ଆସି ସ୍ପଷ୍ଟିକରଣ ରଖିଥିଲେ। ଏପରିକି ସୁଧାଂଶୁଙ୍କ ଦ୍ୱାରା ଏଭଳି ମିଛ, ମନଗଢ଼ା କଥା ତାଙ୍କର ସାମ୍ୱାଦିକତାର ଗାରିମା ଓ ମର୍ଯ୍ୟାଦାକୁ ହାନି କରିଛି। ସେ ଅନେକ ପ୍ରଶ୍ନବାଣର ଶୀକାର ହେଲେଣି। ସେଥିଲାଗି ସଂପୃକ୍ତ ସାମ୍ୱାଦିକ ଆଉ ଫୋକସ ପ୍ଲସରେ କାମ କରିବେନି କହି ଏ ବିବାଦୀୟ ପ୍ରସଙ୍ଗରୁ ଦୂରେଇ ଯାଇଛନ୍ତି। ଏହା ସହ ସୁଧାଂଶୁ ଓ ସଂପୃକ୍ତ ସ୍ଥାନୀୟ ସାମ୍ୱାଦିକଙ୍କ ଭିତରେ ଅଡ଼ିଓ ବାର୍ତ୍ତାଳାପ ବି ଭାଇରାଲ ହେବାରେ ଲାଗିଛି। ଭାଇରାଲ ଅଡ଼ିଓରେ ସୁଧାଂଶୁ ମାନିଛନ୍ତି ଯେ, ତାଙ୍କ ପାଟିରୁ ଏ କଥା କେମିତି ଭୁଲରେ ବାହାରିପଡ଼ିଲା। ଯାହା ହେବାର କଥା ହୋଇସାରିଛି। ଡରିଲେ ଚଳିବନି। ଉମରକୋଟ ପ୍ରତିନିଧି ବି କହୁଥିବାର ଶୁଣାଯାଉଛି ଯେ, ଏଭଳି ବକ୍ତବ୍ୟ ବିରୁଦ୍ଧରେ ମାନହାନି ମକଦ୍ଦମା କରିବେ ବୋଲି ମନ୍ତ୍ରୀଙ୍କ ସମର୍ଥକ କହୁଛନ୍ତି। ବିଜେଡି ନେତାଏ ଫୋନ କରି ପ୍ରଶଂସା କରୁଛନ୍ତି। ଘରୋଇ ଚାନେଲର ସମ୍ପାଦକଙ୍କ ଏଭଳି ମନଗଢା ଓ ମିଛ କଥାକୁ ନେଇ କାଲି କ୍ୟାପିଟାଲ ଥାନାରେ ଏତଲା ଦିଆଯାଇଛି। ମନ୍ତ୍ରୀଙ୍କ ସ୍ୱଛ ଭାବମୂର୍ତ୍ତି କ୍ଷୁର୍ଣ୍ଣ କରିବା ଅଭିଯୋଗରେ କ୍ୟାପିଟାଲ ଥାନାରେ ଏତଲା ଦେବା ସହ ସଂପୃକ୍ତ ଚାନେଲର ସମ୍ପାଦକଙ୍କ ଗିରଫ ଦାବି ହୋଇଛି। ମନ୍ତ୍ରୀଙ୍କ ପ୍ରାଇଭେଟ ସେକ୍ରେଟାରୀ ବି ଏ ସନ୍ଦର୍ଭରେ ଏତଲା ଦେଇଛନ୍ତି। ଆଉ ଆଜି ବିଜେପି ପକ୍ଷରୁ ପ୍ରେସମିଟ୍‌ କରି ସଂପୃକ୍ତ ଗଣମାଧ୍ୟମର ସମ୍ପାଦକ ସୁପାରୀ ସାମ୍ୱାଦିକତା କରୁଥିବାର ଆରୋପ ଲଦି ବିଜେଡି କେମିତି ଗଣମାଧ୍ୟମକୁ ଅପବ୍ୟବହାର କରୁଛି କହି ବର୍ଷିଛନ୍ତି ବିଜେପି ସାଧାରଣ ସମ୍ପାଦକ ବିରଞ୍ଚି ନାରାୟଣ ତ୍ରିପାଠୀ। କେତେ ନୀଚସ୍ତରକୁ ଜଣେ ସମ୍ପାଦକ ଯାଇପାରନ୍ତି ଆଉ ସାମ୍ୱାଦିକତାକୁ କଳୁଷିତ କରୁଛନ୍ତି। ତାହାର ଭାଇରାଲ ଅଡ଼ିଓ ବି ପ୍ରେସମିଟରେ ଶୁଣାଇଥିଲେ ବିରଞ୍ଚି। ଏହା ଉପରେ ଦୃଷ୍ଟାନ୍ତମୂଳକ ଆକ୍ସନ ଦାବି କରିଛନ୍ତି।