କୂଳ ଲଙ୍ଘୁଛି ଚିତ୍ରୋତ୍ପଳା, ଗୁଆଳିନାସୀ ନଦୀ ମୁହାଣ ସୁରକ୍ଷାରେ ନାକେଦମ ଜଳସମ୍ପଦ ବିଭାଗ

ସାଲେପୁର: ମହାନଦୀର ଶାଖା ନଦୀ ଚିତ୍ରୋତ୍ପଳାର ପ୍ରବଳ ବନ୍ୟାଜଳ ଯୋଗୁଁ ସାଲେପୁର ବ୍ଲକର ଗୁଆଳିନାସୀ ନଦୀ ମୁହାଣରେ ଗୁରୁତର କ୍ଷୟ ସୃଷ୍ଟି ହୋଇଛି। ନଦୀ କୂଳ ଲଗାତାର ଲଙ୍ଘୁଥିବାରୁ ପରିସ୍ଥିତି ଉଦବେଗଜନକ ହୋଇପଡ଼ିଛି। ଗତ ତିନି ଦିନ ଧରି ଜଳସମ୍ପଦ ବିଭାଗ ଅସ୍ଥାୟୀ ସୁରକ୍ଷା ବ୍ୟବସ୍ଥା କରିବାକୁ ଜୋରଦାର ପ୍ରୟାସ କରୁଥିଲେ ମଧ୍ୟ ପ୍ରବଳ ସ୍ରୋତ ସମସ୍ତ ପ୍ରୟାସକୁ ବିଫଳ କରୁଛି। ବିଭାଗ ପକ୍ଷରୁ ବଲ୍ଲା ବାଡ଼େଇ ବାଲିବସ୍ତା ପକାଇ ଅସ୍ଥାୟୀ ବନ୍ଧ ନିର୍ମାଣ କରାଯାଉଥିଲେ ମଧ୍ୟ ଚିତ୍ରୋତ୍ପଳାର ତୀବ୍ର ସ୍ରୋତ ସବୁକିଛି ଭସାଇ ନେଉଛି। ପ୍ରାୟ ୬୦୦ ମିଟର ପର୍ଯ୍ୟନ୍ତ ନଦୀପଠା ଧସି ନଦୀ ଗର୍ଭରେ ଲୀନ ହୋଇଗଲାଣି। ଗତ ତିନି ଦିନ ଧରି ଜଳସମ୍ପଦ ବିଭାଗର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ରହି ପରିସ୍ଥିତିର ତଦାରଖ କରୁଛନ୍ତି।

ପ୍ରବଳ ଜଳସ୍ରୋତ ଯୋଗୁଁ କାମ କରିବାରେ ଅସୁବିଧା ହେଉଥିଲେ ମଧ୍ୟ ଅସ୍ଥାୟୀ ସୁରକ୍ଷା ବ୍ୟବସ୍ଥା ଜାରି ରହିଛି। ପାଣି କମିବା ପରେ ସ୍ଥାୟୀ ପ୍ରତିରକ୍ଷା କାର୍ଯ୍ୟ ହାତକୁ ନିଆଯିବ ବୋଲି ଜଳସମ୍ପଦ ବିଭାଗର ଅଧୀକ୍ଷଣ ଯନ୍ତ୍ରୀ କହିଛନ୍ତି। ସେପଟେ, ଖବର ପାଇ ସାଲେପୁରର ବିଜେପି ନେତା ଅରିନ୍ଦମ ରାୟ ଘଟଣାସ୍ଥଳରେ ପହଞ୍ଚି ସ୍ଥିତିର ସମୀକ୍ଷା କରିଥିଲେ। ସେ କହିଛନ୍ତି ଯେ, ଗୁଆଳିନାସୀ ନଦୀ ମୁହାଣର ସ୍ଥାୟୀ ସୁରକ୍ଷା ପାଇଁ ସରକାରଙ୍କ ଦୃଷ୍ଟି ଆକର୍ଷଣ କରାଯାଇ ଆବଶ୍ୟକ ପଦକ୍ଷେପ ଗ୍ରହଣ କରାଯିବ। ଏପଟେ ନଦୀ କୂଳ ଧସିବା ଫଳରେ ଏକର ଏକର ପନିପରିବା ଚାଷ ନଦୀ ଗର୍ଭରେ ଲୀନ ହୋଇଯାଇଛି। ଏହାକୁ ନେଇ ସ୍ଥାନୀୟ ଅଞ୍ଚଳବାସୀ ଓ ଚାଷୀମାନେ ଚିନ୍ତାରେ ରହିଛନ୍ତି। ଚାଷୀଙ୍କ କହିବା ଅନୁଯାୟୀ, ସରକରା ଏହି ସମସ୍ୟାର ଶୀଘ୍ର ସ୍ଥାୟୀ ପ୍ରତିକାର ନକଲେ ଆଗାମୀ ଦିନରେ ଆହୁରି ବ୍ୟାପକ କ୍ଷୟକ୍ଷତି ଘଟିବାର ଆଶଙ୍କା ରହିଛି।