Ayushman Bharat: ଆୟୁଷ୍ମାନ ଭାରତକୁ ୮ ବର୍ଷ: ୬୦ କୋଟିରୁ ଅଧିକ ଲୋକଙ୍କୁ ମିଳୁଛି ସ୍ୱାସ୍ଥ୍ୟ ସୁରକ୍ଷା

ନୂଆଦିଲ୍ଲୀ: ଦେଶର ସବୁଠାରୁ ବଡ଼ ସରକାରୀ ଅର୍ଥପୋଷିତ ସ୍ୱାସ୍ଥ୍ୟ ନିଶ୍ଚିତତା ଯୋଜନା ‘ଆୟୁଷ୍ମାନ ଭାରତ–ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା’ (AB-PMJAY) ଆଜି ୮ ବର୍ଷ ପୂରଣ କରିଛି। ୨୦୧୮ ସେପ୍ଟେମ୍ବରରେ ଝାଡ଼ଖଣ୍ଡର ରାଞ୍ଚିରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଯୋଜନାର ଶୁଭାରମ୍ଭ କରିଥିଲେ। ପ୍ରଧାନମନ୍ତ୍ରୀ ମୋଦୀ କହିଛନ୍ତି, ପ୍ରତ୍ୟେକ ଭାରତୀୟଙ୍କୁ ଉତ୍ତମମାନର ଏବଂ ସୁଲଭ ସ୍ୱାସ୍ଥ୍ୟସେବା ଯୋଗାଇବା ଲକ୍ଷ୍ୟରେ ଆୟୁଷ୍ମାନ ଭାରତ ଆରମ୍ଭ ହୋଇଥିଲା। ତାଙ୍କ ଅନୁସାରେ, ଏବେ ୬୦ କୋଟିରୁ ଅଧିକ ଲୋକଙ୍କୁ ବାର୍ଷିକ ୫ ଲକ୍ଷ ଟଙ୍କାର ସ୍ୱାସ୍ଥ୍ୟ କଭର ମିଳୁଛି। ସୂଚନା ଅନୁସାରେ, ଏପର୍ଯ୍ୟନ୍ତ ୪୮ କୋଟି ୫୪ ଲକ୍ଷରୁ ଅଧିକ ଆୟୁଷ୍ମାନ କାର୍ଡ ତିଆରି ହୋଇଛି। ଗତ ୮ ବର୍ଷରେ ପ୍ରାୟ ୧୩ କୋଟି ହିତାଧିକାରୀ ଏହି ଯୋଜନା ଅଧୀନରେ କ୍ୟାଶଲେସ୍ ଚିକିତ୍ସା ସୁବିଧା ନେଇଛନ୍ତି। ଏଥିପାଇଁ ସରକାର ୨ ଲକ୍ଷ କୋଟି ଟଙ୍କାରୁ ଅଧିକ ବ୍ୟୟ କରିଛନ୍ତି। ଯୋଜନା ଅଧୀନରେ ଦେଶର ପ୍ରାୟ ୩୮ ହଜାର ସରକାରୀ ଓ ବେସରକାରୀ ହସ୍ପିଟାଲକୁ ତାଲିକାଭୁକ୍ତ କରାଯାଇଛି। ଏହା ସମସ୍ତ ୩୬ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ କାର୍ଯ୍ୟକାରୀ ହେଉଛି।

କେନ୍ଦ୍ର ସରକାର ଆୟୁଷ୍ମାନ ଭାରତ ଯୋଜନାର ସୁବିଧାକୁ ୭୦ ବର୍ଷ ଓ ତା’ଠାରୁ ଅଧିକ ବୟସର ବରିଷ୍ଠ ନାଗରିକଙ୍କ ପାଇଁ ସମ୍ପ୍ରସାରଣ କରିଛନ୍ତି। ଏହା ସହିତ ଆଶା କର୍ମୀ ଓ ଅଙ୍ଗନୱାଡ଼ି କର୍ମୀଙ୍କ ୩୭ ଲକ୍ଷ ପରିବାରକୁ ମଧ୍ୟ ଏହି ଯୋଜନାର ଲାଭ ଦିଆଯାଇଛି। ଯୋଜନାର ମୁଖ୍ୟ ଲକ୍ଷ୍ୟ ହେଉଛି ଗରିବ, ଆବଶ୍ୟକତାଗ୍ରସ୍ତ ଏବଂ ଦୁର୍ବଳ ବର୍ଗର ଲୋକଙ୍କୁ ଗୁଣାତ୍ମକ ଓ ସୁଲଭ ସ୍ୱାସ୍ଥ୍ୟସେବା ସହ ଆର୍ଥିକ ସୁରକ୍ଷା ଯୋଗାଇବା। ଆୟୁଷ୍ମାନ ଆରୋଗ୍ୟ ମନ୍ଦିରରେ ଏପର୍ଯ୍ୟନ୍ତ ୫୦୦ କୋଟିରୁ ଅଧିକ ପରିଦର୍ଶନ ରେକର୍ଡ କରାଯାଇଛି। ଏହା ତୃଣମୂଳ ସ୍ତରରେ ପ୍ରାଥମିକ ସ୍ୱାସ୍ଥ୍ୟସେବାକୁ ସୁଦୃଢ଼ କରୁଛି। କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣମନ୍ତ୍ରୀ ଜେପି ନଡ୍ଡା ଆୟୁଷ୍ମାନ ଭାରତର ୮ମ ବାର୍ଷିକୀ ଅବସରରେ କହିଛନ୍ତି ଯେ, ଏହି ଯୋଜନା ଦେଶର ଲକ୍ଷ ଲକ୍ଷ ପରିବାର ପାଇଁ ସ୍ୱାସ୍ଥ୍ୟସେବା ପାଇବାର ସୁଯୋଗକୁ ବଦଳାଇଛି। ନଡ୍ଡା କହିଛନ୍ତି, ଗୁଣାତ୍ମକ ସ୍ୱାସ୍ଥ୍ୟସେବା ଓ ଆର୍ଥିକ ସୁରକ୍ଷାର ପ୍ରତିଶ୍ରୁତିକୁ ଏହି ଯୋଜନା ଦେଶର ପରିବାରଗୁଡ଼ିକ ପାଇଁ ବାସ୍ତବ ରୂପ ଦେଉଛି। ୬୦ କୋଟିରୁ ଅଧିକ ଲୋକଙ୍କୁ କଭର କରି ଏହା ବିଶ୍ୱର ସର୍ବବୃହତ୍ ସ୍ୱାସ୍ଥ୍ୟ ନିଶ୍ଚିତତା ଯୋଜନା ଭାବେ ଆଗକୁ ବଢ଼ୁଛି ବୋଲି ସେ କହିଛନ୍ତି।