କର୍ତ୍ତବ୍ୟ କରିବାକୁ ଯାଇ ବାସନ୍ଦ ଅଭିଯୋଗ, ନ୍ୟାୟ ପାଇଁ ଏସପିଙ୍କ ଦ୍ୱାରସ୍ଥ ଆଶାକର୍ମୀ

ଗଜପତି: ନିଜ କର୍ତ୍ତବ୍ୟ କରିବାକୁ ଯାଇ ନିଜ ସମ୍ପ୍ରଦାୟରୁ ବାସନ୍ଦ ହେଲେ ଆଶାକର୍ମୀ । ଗଜପତି ଜିଲ୍ଲା ରାୟଗଡ଼ ବ୍ଲକ ଜିରାଙ୍ଗ ଗାଁରେ ଜଣେ ଆଶାକର୍ମୀଙ୍କୁ ନେଇ ବିବାଦ ଦେଖାଦେଇଛି। ନିଜ କର୍ତ୍ତବ୍ୟ ପାଳନ କରିବାକୁ ଯାଇ ନିଜ ସମ୍ପ୍ରଦାୟ ପକ୍ଷରୁ ବାସନ୍ଦ ଓ ଜରିମାନାର ଶିକାର ହୋଇଥିବା ଅଭିଯୋଗ କରିଛନ୍ତି ଜିରାଙ୍ଗ ଖ୍ରୀଷ୍ଟିଆନ ସାହିର ଆଶାକର୍ମୀ ସୁନନ୍ଦିନୀ ମିଶାଲ। ଅଭିଯୋଗ ଅନୁସାରେ, ଗତ ଜୁନ୍‌ ୧୨ ତାରିଖରେ ଜିରାଙ୍ଗ ଗ୍ରାମର ଖ୍ରୀଷ୍ଟିଆନ ସାହିରେ ରହୁଥିବା ଜଣେ ଅନ୍ୟ ଧର୍ମର ପରିବାରର ସ୍ୱାସ୍ଥ୍ୟ ସମସ୍ୟା ବୁଝିବା ସହ ଓଆରଏସ୍‌ ପ୍ୟାକେଟ ଦେବା ପାଇଁ ସୁନନ୍ଦିନୀ ଯାଇଥିଲେ। ଏହାକୁ ନେଇ ଜିରାଙ୍ଗ ଗ୍ରାମ ଖ୍ରୀଷ୍ଟିୟାନ ସାହିରେ କିଛି ଲୋକ ସୁନନ୍ଦିନୀ ଓ ତାଙ୍କ ପରିବାରକୁ ଗାଁ ଚର୍ଚ୍ଚକୁ ଡାକିଥିଲେ। ସେଠାରେ ଚର୍ଚ୍ଚ ମଣ୍ଡଳୀ ସଦସ୍ୟଙ୍କ ଉପସ୍ଥିତିରେ ପରିବାରକୁ ୫ ହଜାର ଟଙ୍କା ଜରିମାନା ଦେବାକୁ କୁହାଯାଇଥିବା ସୁନନ୍ଦିନୀ ଅଭିଯୋଗ କରିଛନ୍ତି। ସେହିପରି ଭବିଷ୍ୟତରେ ଅନ୍ୟ ଧର୍ମର ଲୋକଙ୍କୁ କୌଣସି ସେବା ଯୋଗାଇଲେ ପରିବାରକୁ ସମ୍ପ୍ରଦାୟରୁ ବାସନ୍ଦ କରାଯିବ ବୋଲି ଧମକ ଦିଆଯାଇଥିବା ମଧ୍ୟ ସେ ଅଭିଯୋଗ କରିଛନ୍ତି। ବାସନ୍ଦ ଭୟରେ ପରିବାର ୫ ହଜାର ଟଙ୍କା ଜରିମାନା ଦେଇଥିବା କହିଛନ୍ତି ସୁନନ୍ଦିନୀ। ତେବେ ଜଣେ ଆଶାକର୍ମୀ ଭାବେ ସ୍ୱାସ୍ଥ୍ୟସେବା ଯୋଗାଇବା ତାଙ୍କର କର୍ତ୍ତବ୍ୟ ଏବଂ ଏଥିରେ କୌଣସି ଜାତି କିମ୍ବା ଧର୍ମର ଭେଦଭାବ ନଥିବା ସେ କହିଛନ୍ତି। ତେଣୁ ମଣ୍ଡଳୀ ସଦସ୍ୟଙ୍କ ଭୟରେ ସୁନନ୍ଦିନୀ ପ୍ରଥମେ ଜିରାଙ୍ଗ ଫାଣ୍ଡିରେ ଲିଖିତ ଅଭିଯୋଗ କରିଥିଲେ। କିନ୍ତୁ ପୋଲିସ ପକ୍ଷରୁ କୌଣସି ପଦକ୍ଷେପ ନ ନେବାରୁ ଗଜପତି ଏସ୍ପିଙ୍କ ଦ୍ୱାରସ୍ଥ ହୋଇଛନ୍ତି ଆଶାକର୍ମୀ ସୁନନ୍ଦିନୀ ।