ରାଜସ୍ଥାନ ବସ୍ ଟ୍ରାଜେଡି: ଟ୍ରେଲରକୁ ଧକ୍କା ପରେ ନିଆଁ, ୮ ମୃତ, ଅନେକ ଆହତ

ରାଜସ୍ଥାନ: ଟ୍ରେଲରକୁ ଧକ୍କାଦେଲା ବସ୍, ନିଆଁରେ ପୋଡ଼ି ୮ ମୃତ, ୨୪ରୁ ଅଧିକ ଆହତ । ରାଜସ୍ଥାନ ଦୌସା ଜିଲ୍ଲାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ବୁଧବାର ଭୋରର ସମୟରେ ଦିଲ୍ଲୀ–ମୁମ୍ବାଇ ଏକ୍ସପ୍ରେସୱେରେ ଏକ ଯାତ୍ରୀବାହୀ ବସ୍ ଏବଂ ଟ୍ରକ୍ ମଧ୍ୟରେ ଭୟାବହ ଧକ୍କା ହୋଇଥିଲା। ଋଷିକେଶରୁ ଇନ୍ଦୋର ଯାଉଥିବା ଏକ ଯାତ୍ରୀବାହୀ ସ୍ଲିପର ବସ୍‌ ଆଗରେ ଯାଉଥିବା ଏକ ଟ୍ରେଲରକୁ ପଛପଟୁ ଧକ୍କା ଦେବା ପରେ ଭୟଙ୍କର ଦୁର୍ଘଟଣା ପରେ ଘଟଣାସ୍ଥଳରେ ଜଳିଗଲା ବସ୍ । ଏହି ଦୁର୍ଘଟଣାରେ ୮ ଜଣଙ୍କ ମୃତ୍ୟୁ ଘଟିଥିବାବେଳେ ୨୪ରୁ ଅଧିକ ଯାତ୍ରୀ ଆହତ ହୋଇଛନ୍ତି। ନିଆଁ ଏତେ ତୀବ୍ର ଥିଲା ଯେ କିଛି ସମୟରେ ସମ୍ପୂର୍ଣ୍ଣ ବସ୍‌ଟି ଜଳିଉଠିଥିଲା । କିଛି ମୁହୂର୍ତ୍ତ ମଧ୍ୟରେ ନିଆଁ ସମ୍ପୂର୍ଣ୍ଣ ବସ୍‌କୁ ବ୍ୟାପିଯିବାରୁ ଯାତ୍ରୀମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ଯାତ୍ରୀମାନେ ଭିତରେ ଫସିଯାଇଥିବାରୁ ଉଦ୍ଧାର କାର୍ଯ୍ୟ ଅତ୍ୟନ୍ତ କଷ୍ଟକର ହୋଇପଡ଼ିଥିଲା । ଖବର ପାଇ ସ୍ଥାନୀୟ ପୁଲିସ, ଅଗ୍ନିଶମ ବାହିନୀ ଓ ପ୍ରଶାସନିକ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ସ୍ଥାନୀୟ ଲୋକଙ୍କ ସହଯୋଗରେ ଅନେକ ଯାତ୍ରୀଙ୍କୁ ସୁରକ୍ଷିତ ଭାବେ ବସ୍‌ରୁ ବାହାର କରାଯାଇଥିଲା। ଅଗ୍ନିଶମ ବାହିନୀ କିଛି ସମୟର ପ୍ରୟାସ ପରେ ନିଆଁକୁ ଆୟତ୍ତ କରିଥିଲା। ଆହତମାନଙ୍କୁ ଉଦ୍ଧାର କରି ଦୌସା ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇଛି। ସେମାନଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି। ପୁଲିସ ସୂଚନା ଅନୁସାରେ, ଦୁର୍ଘଟଣାଟି କୋଲୱା ଥାନା ଅନ୍ତର୍ଗତ ଧନାୱଡା ଅଞ୍ଚଳରେ ରାତି ପ୍ରାୟ ୨.୩୦ ସମୟରେ ଘଟିଥିଲା। ବସ୍‌ରେ ପ୍ରାୟ ୩୯ ଜଣ ଯାତ୍ରୀ  ଥିଲେ। ଧକ୍କା ପରେ ବସ୍‌ର ପଛପଟରେ ନିଆଁ ଲାଗିଥିଲା ଏବଂ ତାହା ଦ୍ରୁତ ଗତିରେ ସମଗ୍ର ବସ୍‌କୁ ବ୍ୟାପିଯାଇଥିଲା। ଅନେକ ଯାତ୍ରୀ ଧୂଆଁ ଓ ନିଆଁ ଭିତରେ ଫସିଯାଇଥିଲେ। ପୋଲିସ କହିବା ମୁତାବକ, ବସ୍ ଡ୍ରାଇଭରଙ୍କ ଆଖି ଲାଗିଯିବାରୁ ଦୁର୍ଘଟଣା ହୋଇଥାଇପାରେ । ତଥାପି ଆଖପାଖରେ ଥିବା ସିସିଟିଭି ଫୁଟେଜକୁ ଯାଞ୍ଚ କରାଯାଉଛି । ବସ୍ ଦ୍ରୁତ ଗତିରେ ଆସୁଥିବା ଯୋଗୁଁ ଏଭଳି ଦୁର୍ଘଟଣା ହୋଇଥାଇପାରେ । ସ୍ଥାନୀୟ ଲୋକମାନେ ଦୁର୍ଘଟଣାରେ ପୀଡିତ ଯାତ୍ରୀଙ୍କୁ ଉଦ୍ଧାର କରିଥିଲେ । ଦୌସା ଏସ୍‌ପି ପିୟୁଷ ଦୀକ୍ଷିତ କହିଛନ୍ତି, ୬ ଜଣ ଯାତ୍ରୀ ନିଆଁରେ ପୋଡ଼ି ପ୍ରାଣ ହରାଇଥିବାବେଳେ ୨ ଜଣଙ୍କ ମୃତ୍ୟୁ ମୁଣ୍ଡରେ ଗୁରୁତର ଆଘାତ ଯୋଗୁଁ ହୋଇଛି। ମୃତକଙ୍କ ପରିଚୟ ଚିହ୍ନଟ ପାଇଁ ପ୍ରକ୍ରିୟା ଜାରି ରହିଛି। ଏହି ଦୁର୍ଘଟଣାରେ ବସ୍‌ ଓ ଟ୍ରେଲର ସମ୍ପୂର୍ଣ୍ଣ ଭାବେ ପୋଡ଼ି ନଷ୍ଟ ହୋଇଯାଇଛି। ଫରେନ୍ସିକ୍‌ ଟିମ୍‌ ଘଟଣାସ୍ଥଳରୁ ନମୁନା ସଂଗ୍ରହ କରି ତଦନ୍ତ ଜାରି ରଖିଛି।