ପ୍ରାଇଭେଟ୍ ପାର୍ଟ ସମେତ ୬ଜାଗାରେ କରେଣ୍ଟ- ସମ୍ପତ୍ତି ପାଇଁ ପତ୍ନୀଙ୍କୁ ନୃଶଂସ ହତ୍ୟା

ବର୍ବରତାର ସୀମା ଟପିଲା। ପତ୍ନୀଙ୍କ ପ୍ରାଇଭେଟ ପାର୍ଟ ସମେତ ୬ ଜାଗାରେ କରେଣ୍ଟ ଲଗାଇ ହତ୍ୟା କଲା ନରପିଶାଚ ସ୍ୱାମୀ। ବାପ ଘର ଅଂଶର ଜମି ବିକିବାକୁ ମନା କରିଦେବାରୁ ଏଭଳି ନୃଶଂସ ହତ୍ୟା କଲା ସ୍ୱାମୀ। ବାପ ଘର ଜମିରେ ନିଜ ଭାଗର ଜମି ନିଜ ପିଲାଙ୍କ ଭବିଷ୍ୟତ ଲାଗି ରଖିବାକୁ ଚାହୁଁଥିଲେ ପତ୍ନୀ। ରାମପୁରରୁ ଆସିଛି ଏଭଳି ଲୋମହର୍ଷଣକାରୀ ଘଟଣା। ସ୍ୱାମୀ ଇସରାର ଓରଫ ଗୁଡ୍ଡୁ ରାକ୍ଷସ ପାଲଟିଗଲା। ପତ୍ନୀ ନସରନିଙ୍କ ଶରୀରର ୬ଟି ଜାଗାରେ କରେଣ୍ଟ ଦେଇ କିଲିବିଲି କରି ମାରିଦେଲା। ବିଳାସପୁର ଥାନା କହିଛି, କରେଣ୍ଟରୁ ମୃତ୍ୟୁର କଥା ପୋଷ୍ଟମର୍ଟମ ରିପୋର୍ଟରେ ପୁଷ୍ଟି ହୋଇଛି। ଅଭିଯୁକ୍ତକୁ ଗିରଫ କରାଯାଇଛି। ଅଗଷ୍ଟ ୧୪ ବିଳମ୍ୱିତ ରାତିର ଘଟଣା। ନସରିନର ବିବାହ ୨୦୧୩ରେ ଇସରାରଙ୍କ ସହ ହୋଇଥିଲା। ନସରିନଙ୍କ ବାପାଙ୍କ ମୃତ୍ୟୁ ହୋଇସାରିଛି। ତାଙ୍କ ସମ୍ପତ୍ତି ୭ ଝିଅଙ୍କ ନାଁରେ ଥିଲା। ବାପାଙ୍କ ସମ୍ପତ୍ତିର ଅଂଶକୁ ବିକି ଟଙ୍କା ଆଣିବାକୁ ନସରିନଙ୍କ ଶ୍ୱଶୁର ଘର ଚାପ ପକାଇଆସୁଥିଲେ। ନସରିନଙ୍କ ୫ ସନ୍ତାନ ଅଛନ୍ତି। ୪ ଝିଅ ଓ ଗୋଟିଏ ପୁଅ। ବାପ ଘର ସମ୍ପତ୍ତିର ନିଜ ସେୟାର ବିକିବାକୁ ନସରିନଙ୍କ ଉପରେ ବାରମ୍ୱାର ଚାପ ପଡ଼ୁଥିଲା। ଅଗଷ୍ଟ ୧୪ ବିଳମ୍ୱିତ ରାତି ୨ଟାରେ ଏହାକୁ ନେଇ ନସରିନ ଓ ଇସରାର ଭିତରେ ଝଗଡ଼ା ହୋଇଥିଲା। ଅଭିଯୋଗ ଅନୁସାରେ ପରିବାର ଲୋକଙ୍କ ସହଯୋଗରେ ନସରିନଙ୍କୁ କରେଣ୍ଟ ଦେଇ ହତ୍ୟା କରିଛି ଇସରାର। ନସରିନଙ୍କ ଦାଦା ଥାନାରେ ଇସରାର, ନସରିନଙ୍କ ଶ୍ୱଶୁର ହନିଫ, ନଣନ୍ଦ ବବ୍ବୋ ଓ ରଫତ, ନଣନ୍ଦେଇ ଇସ୍ତେକାର, ନୁର ଆଲମଙ୍କ ବିରୁଦ୍ଧରେ ଏତଲା ଦେଇଛନ୍ତି। ଘଟଣା ପରେ ଫେରାର୍ ଇସରାରକୁ ପୁଲିସ ରବିବାର ରାତିରେ ଗିରଫ କରିଛି। ଅନ୍ୟମାନେ ପେରାର୍ ହୋଇଯାଇଛନ୍ତି।