ମହିଳା କ୍ରିକେଟରଙ୍କୁ କରିଥିଲା ଅସଦାଚରଣ- ବ୍ଲାଇଣ୍ଡ ମର୍ଡର ମାମଲାର ହତ୍ୟାକାରୀ

୧୧ ବର୍ଷ ପୁରୁଣା ମର୍ଡର ମାମଲାର ଖୁଲାସା। ଇନ୍ଦୋର ପୁଲିସ ୧୧ ବର୍ଷ ତଳେ କୃଷ୍ଣା ହତ୍ୟାକାଣ୍ଡ ମାମଲାରେ ଯେଉଁ ୨ ଜଣଙ୍କୁ ଗିରଫ କରିଛି। ସେଥିରେ ଅଛି ଅକିଲ ଓରଫ ନାଇଟ୍ରା। ନାଇଟ୍ରା ଗଲା ବର୍ଷ ଅଷ୍ଟ୍ରେଲିଆ ମହିଳା କ୍ରିକେଟରଙ୍କ ସହ ଅସଦାଚରଣ ମାମଲାରେ ଗିରଫ ହୋଇଥିଲା। ପୁଲିସ ଅନୁସାରେ, ୧୭ ବର୍ଷୀୟା କୃଷ୍ଣାଙ୍କୁ ହତ୍ୟା କରିଥିବା କଥା ସ୍ୱୀକାର କରିଛି ଅକିଲ ଓ ତା ସାଥୀ ଆରିଫ। ୧୧ ବର୍ଷ ତଳର ହତ୍ୟାକାଣ୍ଡ ଯାହାର ଖୁଲାସା ହୋଇନଥିଲା। ଖଜରାନା ଥାନା ଅନ୍ତର୍ଗତ ୨୦୧୫ରେ କୃଷ୍ଣାଙ୍କୁ ହତ୍ୟା କରାଯାଇଥିଲା। ଅଭିଯୁକ୍ତ ଅଜ୍ଞାତ ହେତୁ ପୁଲିସ ଏ କେସ ତୁଟାଇପାରୁନଥିଲା। ଏପ୍ରିଲ ୧୭,୨୦୧୫। ଖଜରାନା ବାଇପାସ ପାଖରେ କୃଷ୍ଣାର ଶବ ମିଳିଥିଲା। ବ୍ଲାଇଣ୍ଡ ମର୍ଡର ହେତୁ ଏ  ମାମଲା ପୁଲିସ ଫାଇଲ ଭିତରେ ଚାପି ହୋଇଯାଇଥିଲା। ମାମଲା ପୁରୁଣା ହୋଇଚାଲିଲା। ହେଲେ ପୁଲିସ ରେକର୍ଡରେ ଏହା ତଦନ୍ତାଧୀନ ବୋଲି ଗଡ଼ିଚାଲିଲା। ଶେଷରେ ଗୁଇନ୍ଦା ସୂଚନା ଓ ଟେକ୍ନିକ ସାକ୍ଷୀ ବଳରେ ପୁଲିସକୁ ଏବେ ଯାଇ ମିଳିଥିଲା ପ୍ରମୁଖ ପ୍ରମାଣ। ତେବେ କେସ୍ ତୁଟିଲା କେମିତି। ମହିଳା କ୍ରିକେଟରଙ୍କୁ ଅସଦାଚରଣ ମାମଲାରେ ଜେଲ୍ ଯିବା ପରେ ଅକିଲ ଜାମିନରେ ବାହାରକୁ ଆସିଥିଲା। ଏହା ପରେ ତା ପୁରୁଣା ସାଥୀ ଆରିଫ ସହ ତାହାର ଝଗଡ଼ା ହୋଇଥିଲା। ଏହି ବିବାଦ ବେଳେ ୧୧ ବର୍ଷ ତଳର ହତ୍ୟାକାଣ୍ଡ ବାବଦରେ ଅକିଲ କହି ବାହାଦୂରୀ ମାରିଥିଲା।  ଏହି ସୂଚନା ପୁଲିସର ଖବରଦାତାଙ୍କ ପାଖରେ ପହଞ୍ଚିଯାଇଥିଲା। ଆଉ ଏହାକୁ ଧରି ପୁଲିସ ଆଗେଇଥିଲା। ପୁରଣା ସାଥୀ ଆରିଫକୁ ଗିରଫ କରି ଜେରା କରିଥିଲା। ଆଉ ତା ପରେ ଦୁହିଁଙ୍କୁ ଗିରଫ କରିଛି। ଘଟଣା ଦିନ ଅକିଲ, ଆରିଫ ଓ ପରଭେଜ୍ ଏ ୩ ଜଣ କୃଷ୍ଣାଙ୍କ ମଟର ସାଇକେଲରେ ଲିଫ୍ଟ ମାଗିଥିଲେ। ଏହା ପରେ କୃଷ୍ଣାଙ୍କୁ ଖଜରାନା ବାଇପାସ ପାଖ ଏକ ଶୂନଶାନ ଜାଗାକୁ ନେଇଥିଲେ। ସେଠାରେ ୩ ଜଣ ଯାକ ନିଶା ସେବନ କରିଥିଲେ। ଏହା ପରେ କୃଷ୍ଣା ପାଖରୁ ଲୁଟପାଟ ଆରମ୍ଭ କଲେ। ଅଭିଯୁକ୍ତମାନେ କୃଷ୍ଣାର ସୁନା ଲକେଟ, ରୂପା ଚେନ୍ ଓ ନଗଦ ଟଙ୍କା ଲୁଟିଲେ। କୃଷ୍ଣା ଏହାକୁ ବିରୋଧ କରିବାରୁ ସେମାନେ କୃଷ୍ଣାର ଗଳାକୁ ଛୁରିରେ କାଟିଦେଲେ। ମର୍ଡର କରିବା ପରେ ପ୍ରମାଣ ନଷ୍ଟ କରିବାକୁ ଯାଇ ମଟରସାଇକେଲ ଓ ଅନ୍ୟ ସାମଗ୍ରୀକୁ ଜାଳିବାକୁ ପ୍ରୟାସ କରିଥିଲେ। ଏହା ପରେ ୩ ଜଣ ଯାକ ଫେରାର୍ ହୋଇଗଲେ। ପୁଲିସ ଅନୁସାରେ, କୃଷ୍ଣା ହତ୍ୟାକାଣ୍ଡରେ ଗିରଫ ଅକିଲ ବିରୁଦ୍ଧରେ ହତ୍ୟା, ଲୁଟ ଭଳି ୧୪ ଅପରାଧିକ ମାମଲା ରୁଜୁ ହୋଇଛି। ଅନ୍ୟ ଅଭିଯୁକ୍ତ ଆରିଫ ବିରୁଦ୍ଧରେ ୩ଟି ଗମ୍ଭୀର ଅପରାଧିକ ମାମଲା ଅଛି।