ପାରାଦୀପରେ ପହଞ୍ଚିଲା ଯୁଦ୍ଧ ପ୍ରଭାବିତ ତୈଳବାହୀ ଜାହାଜ ‘ଏମ୍ଟି ସାନମାର ହେରାଲ୍ଡ’

ପାରାଦୀପ: ପାରାଦୀପରେ ପହଞ୍ଚିଲା ତୈଳବାହୀ ଜାହାଜ ‘ଏମ୍ଟି ସାନମାର ହେରାଲ୍ଡ’। ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ପରିସ୍ଥିତି ମଧ୍ୟରେ ହରମୁଜ୍ ପ୍ରଣାଳୀ ଅତିକ୍ରମ କରି ଅଶୋଧିତ ତୈଳ ବୋଝେଇ ତୈଳବାହୀ ଜାହାଜ ‘ଏମ୍ଟି ସାନମାର ହେରାଲ୍ଡ’ (MT SANMAR HERALD) ସୁରକ୍ଷିତ ଭାବେ ପାରାଦୀପ ବନ୍ଦରରେ ପହଞ୍ଚିଛି । ଜାହାଜଟି ବନ୍ଦରର SPM-I (ସିଙ୍ଗଲ୍ ପଏଣ୍ଟ ମୋରିଂ) ଠାରେ ଅଶୋଧିତ ତୈଳ ଅନଲୋଡ୍ କରି ଇଣ୍ଡିଆନ୍ ଅଏଲ୍ କର୍ପୋରେସନ୍ (IOCL)କୁ ଯୋଗାଇଛି। ସୂଚନା ଅନୁସାରେ, ଜାହାଜଟି ଇରାକର ବାସରାରୁ ବାସରା ମିଡିୟମ୍ ଓ ବାସରା ହେଭି ଗ୍ରେଡ୍ ଅଶୋଧିତ ତୈଳ ଲୋଡ୍ କରିବା ପରେ ମଧ୍ୟପ୍ରାଚ୍ୟର ଅସ୍ଥିର ଯୁଦ୍ଧ ପରିସ୍ଥିତିର ସମ୍ମୁଖୀନ ହୋଇଥିଲା। ହରମୁଜ୍ ପ୍ରଣାଳୀ ଦେଇ ଯାତ୍ରା କରୁଥିବା ବେଳେ ଜାହାଜଟି ଉପରେ ଆକ୍ରମଣ ହୋଇଥିଲା। ଏଥିରେ ଶାର୍ପନେଲ୍ ଆଘାତରେ ଜାହାଜର କିଛି ଅଂଶ କ୍ଷତିଗ୍ରସ୍ତ ହୋଇଥିଲା। ଏଭଳି ଚ୍ୟାଲେଞ୍ଜିଂ ପରିସ୍ଥିତିରେ ଭାରତୀୟ ନୌସେନାର ସମନ୍ୱୟ ଓ ତତ୍ତ୍ୱାବଧାନରେ ଜାହାଜଟି ସୁରକ୍ଷିତ ଭାବେ ହରମୁଜ୍ ପ୍ରଣାଳୀ ଅତିକ୍ରମ କରିବାରେ ସକ୍ଷମ ହୋଇଥିଲା। ପରେ ପ୍ରଣାଳୀ ପୁନଃ ଖୋଲିବା ସହିତ ଜାହାଜଟି ଯାତ୍ରା ପୁନରାରମ୍ଭ କରି ସଫଳତାର ସହ ପାରାଦୀପ ବନ୍ଦରରେ ପହଞ୍ଚିଥିଲା। ସମଗ୍ର ଅଭିଯାନ ସମୟରେ ଜାହାଜର ମାଷ୍ଟର ଓ କ୍ରୁ ସଦସ୍ୟମାନେ ଅସାଧାରଣ ସାହସ, ଧୈର୍ଯ୍ୟ ଓ ସୁରକ୍ଷା ପ୍ରତି ଦୃଢ଼ ପ୍ରତିବଦ୍ଧତାର ପରିଚୟ ଦେଇଥିଲେ। ସବୁଠାରୁ ବଡ଼ କଥା ହେଉଛି, ଏହି ବିପଦପୂର୍ଣ୍ଣ ଯାତ୍ରା ସମୟରେ ଜାହାଜର ସମସ୍ତ ଅଧିକାରୀ ଓ କ୍ରୁ ସଦସ୍ୟ ସୁରକ୍ଷିତ ରହିଥିଲେ। ପାରାଦୀପ ବନ୍ଦରରେ ପହଞ୍ଚିବା ପରେ ବନ୍ଦର କର୍ତ୍ତୃପକ୍ଷ ଓ ହାର୍ବର ମାଷ୍ଟର ଜାହାଜର ମାଷ୍ଟର ଏବଂ କ୍ରୁ ସଦସ୍ୟଙ୍କୁ ପୁଷ୍ପଗୁଚ୍ଛ ଓ ସ୍ମାରକୀ ପ୍ରଦାନ କରି ସେମାନଙ୍କ ସାହସ, କର୍ତ୍ତବ୍ୟନିଷ୍ଠା ଓ ସଫଳ ମିଶନ ପାଇଁ ସମ୍ମାନିତ କରିଥିଲେ।