Vigilance Raid Exposes Assets: ୭ ହଜାର ଦରମାରୁ ୭ଟା ପ୍ଲଟ୍ ! ଭିଜିଲାନ୍ସ ରେଡ୍‌ରେ ବଡ଼ ଖୁଲାସା

ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଓଡ଼ିଶା ଭିଜିଲାନ୍ସର ବଡ଼ ଧରଣର ଚଢ଼ାଉ। ସୁନ୍ଦରଗଡ଼ର ଉପନିର୍ଦ୍ଦେଶକ, ମୃତ୍ତିକା ସଂରକ୍ଷଣ-ତଥା-ପ୍ରକଳ୍ପ ନିର୍ଦ୍ଦେଶକ, ୱାଟରସେଡ୍ ପ୍ରସନ୍ନ କୁମାର ପାତ୍ରଙ୍କ ସହ ସମ୍ପୃକ୍ତ ୮ଟି ସ୍ଥାନରେ ଶୁକ୍ରବାର ଏକକାଳୀନ ଚଢ଼ାଉ କରାଯାଇଛି। ଚଢ଼ାଉ ସମୟରେ ୪ଟି ଦୁଇମହଲା ଘର, ଗୋଟିଏ ଫ୍ଲାଟ୍, ୭ଟି ମୂଲ୍ୟବାନ ପ୍ଲଟ୍ ସମେତ ସୁନା, ନଗଦ ଟଙ୍କା ଓ ବ୍ୟାଙ୍କ ଜମା ସମ୍ପର୍କିତ ତଥ୍ୟ ସାମ୍ନାକୁ ଆସିଛି । ଭିଜିଲାନ୍ସର ଜଣେ ଅତିରିକ୍ତ ଏସ୍‌ପି, ୪ ଜଣ ଡିଏସ୍‌ପି, ୧୩ ଜଣ ଇନ୍ସପେକ୍ଟର, ୫ ଜଣ ଏଏସ୍‌ଆଇ ଓ ଅନ୍ୟ କର୍ମଚାରୀ ଏହି ଚଢ଼ାଉରେ ସାମିଲ ହୋଇଛନ୍ତି । ଭୁବନେଶ୍ୱର, ସୁନ୍ଦରଗଡ଼ ଓ କଟକର ୮ଟି ସ୍ଥାନରେ ଏହି ତଲାସି ଜାରି ରହିଛି ।ପ୍ରାଥମିକ ସୂଚନା ଅନୁଯାୟୀ, ଭୁବନେଶ୍ୱରର ମଞ୍ଚନାଥ ଭିଲା, ଫେଜ୍-୨ରେ ପ୍ରାୟ ୨,୪୦୦ ବର୍ଗଫୁଟ୍ ଆୟତନର ୩ଟି ଦୁଇମହଲା ଘର ଠାବ ହୋଇଛି। ବାଲିଅନ୍ତାରେ ପ୍ରାୟ ୩,୦୦୦ ବର୍ଗଫୁଟ୍‌ର ଆଉ ଏକ ଦୁଇମହଲା ଘର ଏବଂ ନୟାପଲ୍ଲୀରେ ପ୍ରାୟ ୧,୧୫୦ ବର୍ଗଫୁଟ୍‌ର ଗୋଟିଏ ୩-ବିଏଚ୍‌କେ ଫ୍ଲାଟ୍ ଚିହ୍ନଟ ହୋଇଛି । ଏଥିସହ ଭୁବନେଶ୍ୱର ଉପକଣ୍ଠରେ ୭ଟି ମୂଲ୍ୟବାନ ପ୍ଲଟ୍ ଠାବ ହୋଇଥିବା ବେଳେ ଏହାର ପଞ୍ଜୀକୃତ ବିକ୍ରୟ ଦଲିଲ ମୂଲ୍ୟ ପ୍ରାୟ ୧ କୋଟି ଟଙ୍କା ବୋଲି ଜଣାପଡ଼ିଛି। ଏହାର ପ୍ରକୃତ ବଜାର ମୂଲ୍ୟ ଅଧିକ ହୋଇପାରେ। ସମ୍ପତ୍ତିଗୁଡ଼ିକର ମାପ ଓ ମୂଲ୍ୟାୟନ ଭିଜିଲାନ୍ସର ବୈଷୟିକ ଟିମ୍ କରୁଛି।ତଲାସି ସମୟରେ ପ୍ରାୟ ୨୧୧ ଗ୍ରାମ୍ ସୁନା, ୧.୨୯ ଲକ୍ଷ ଟଙ୍କା ନଗଦ, ପ୍ରାୟ ୧ କୋଟି ଟଙ୍କାର ବ୍ୟାଙ୍କ ଜମା ଏବଂ ୩ଟି ଦୁଇଚକିଆ ଯାନ ସମ୍ପର୍କିତ ତଥ୍ୟ ମିଳିଛି। ପ୍ରସନ୍ନ କୁମାର ପାତ୍ର ୧୯ ଡିସେମ୍ବର ୧୯୯୫ରେ ମାସିକ ୭,୦୦୦ ଟଙ୍କା ପ୍ରାରମ୍ଭିକ ଦରମାରେ କନିଷ୍ଠ ମୃତ୍ତିକା ସଂରକ୍ଷଣ ଅଧିକାରୀ ଭାବେ ସରକାରୀ ଚାକିରିରେ ଯୋଗ ଦେଇଥିଲେ। ପରବର୍ତ୍ତୀ ସମୟରେ ବିଭିନ୍ନ ଜିଲ୍ଲାରେ କାର୍ଯ୍ୟ କରି ୨୦୨୪ରେ ଉପନିର୍ଦ୍ଦେଶକ ପଦକୁ ପଦୋନ୍ନତି ପାଇଥିଲେ। ୨୦୨୫ ଏପ୍ରିଲ୍‌ରୁ ସେ ସୁନ୍ଦରଗଡ଼ରେ କାର୍ଯ୍ୟରତ ଅଛନ୍ତି।ବର୍ତ୍ତମାନ ଭିଜିଲାନ୍ସର ତଦନ୍ତ ଜାରି ରହିଛି। ସମସ୍ତ ସମ୍ପତ୍ତିର ମୂଲ୍ୟାୟନ ଓ ଆୟର ଉତ୍ସ ଯାଞ୍ଚ ପରେ ହିଁ ଆୟ ବହିର୍ଭୂତ ସମ୍ପତ୍ତିର ପ୍ରକୃତ ପରିମାଣ ସ୍ପଷ୍ଟ ହେବ। ପୋଲିସ ଏହି ଘଟଣାର ତଦନ୍ତ ଜାରି ରଖିଛି।