ବେଲଜିୟମକୁ ୨-୧ରେ ହରାଇ ବିଶ୍ୱକପ୍ ସେମିଫାଇନାଲରେ ସ୍ପେନ୍, ଫ୍ରାନ୍ସ ସହ ହେବ ମହାମୁକାବିଲା

ଚଳିତ ଫିଫା ବିଶ୍ୱକପ୍-୨୦୨୬ର କ୍ୱାର୍ଟରଫାଇନାଲରେ ନିଜର ଦମଦାର ଫର୍ମ ଜାରି ରଖିଛି ସ୍ପେନ୍ ।  ଶୁକ୍ରବାର ଲସ୍ ଆଞ୍ଜେଲେସରେ ଖେଳାଯାଇଥିବା ରୋମାଞ୍ଚକର ମ୍ୟାଚ୍‌ରେ ବେଲଜିୟମକୁ ୨-୧ ଗୋଲ୍‌ରେ ପରାସ୍ତ କରି ସ୍ପେନ୍ ସେମିଫାଇନାଲରେ ପ୍ରବେଶ କରିଛି। ଲସ୍ ଆଞ୍ଜେଲେସରେ ଖେଳାଯାଇଥିବା ରୋମାଞ୍ଚକର କ୍ୱାର୍ଟରଫାଇନାଲରେ ବଦଳ ଖେଳାଳି ମିକେଲ୍ ମେରିନୋ ୮୮ତମ ମିନିଟରେ ବିଜୟସୂଚକ ଗୋଲ୍ ସ୍କୋର କରି ସ୍ପେନ୍‌କୁ ଶେଷ ଚାରିରେ ପହଞ୍ଚାଇଥିଲେ। ଏବେ ସେମିଫାଇନାଲରେ ସ୍ପେନ୍‌ର ମୁକାବିଲା କିଲିଆନ୍ ଏମ୍ବାପ୍ପେଙ୍କ ଫ୍ରାନ୍ସ ସହ ହେବ। ମ୍ୟାଚ୍‌ର ୩୦ତମ ମିନିଟରେ ଫାବିଆନ୍ ରୁଇଜ୍ ଗୋଲ୍ କରି ସ୍ପେନ୍‌କୁ ଅଗ୍ରଣୀ କରିଥିଲେ। କିନ୍ତୁ ୪୧ତମ ମିନିଟରେ ଚାର୍ଲସ୍ ଡି କେଟେଲାରେ ସମତାସୂଚକ ଗୋଲ୍ କରି ବେଲଜିୟମକୁ ମ୍ୟାଚ୍‌କୁ ଫେରାଇ ଆଣିଥିଲେ। ଏହା ଚଳିତ ବିଶ୍ୱକପ୍‌ରେ ସ୍ପେନ୍ ବରଣ କରିଥିବା ପ୍ରଥମ ଗୋଲ୍ ଥିଲା। ଦ୍ୱିତୀୟାର୍ଦ୍ଧରେ ବେଲଜିୟମର ନିୟମିତ ଗୋଲକିପର ଥିବାଉଟ୍ କୋର୍ଟୋଆ ଆହତ ହୋଇ ମାଠ ଛାଡ଼ିବା ପରେ ସେନେ ଲାମେନ୍ସ ଗୋଲ୍‌ପୋଷ୍ଟ ଦାୟିତ୍ୱ ନେଇଥିଲେ। ମ୍ୟାଚ୍ ଅତିରିକ୍ତ ସମୟକୁ ଯିବା ଭଳି ଲାଗୁଥିବା ବେଳେ ୮୮ତମ ମିନିଟରେ ପାଉ କୁବାର୍ସିଙ୍କ ଦୂରପାଳ୍ଲା ସଟ୍‌କୁ ଲାମେନ୍ସ ନିୟନ୍ତ୍ରଣ କରିପାରି ନଥିଲେ। ବଲ୍ ତାଙ୍କ ହାତରୁ ଖସିଯିବା ପରେ ମିକେଲ୍ ମେରିନୋ ରିବାଉଣ୍ଡରେ ଗୋଲ୍ କରି ସ୍ପେନ୍‌କୁ ବିଜୟ ଦେଇଥିଲେ। ଗତ ପ୍ରି-କ୍ୱାର୍ଟରଫାଇନାଲରେ ପର୍ତ୍ତୁଗାଲ୍ ବିପକ୍ଷରେ ମଧ୍ୟ ମେରିନୋ ବିଜୟସୂଚକ ଗୋଲ୍ କରିଥିଲେ। ଲଗାତାର ଦୁଇଟି ନକ୍‌ଆଉଟ୍ ମ୍ୟାଚ୍‌ରେ ନିର୍ଣ୍ଣାୟକ ଗୋଲ୍ କରି ସେ ସ୍ପେନ୍‌ର ବିଜୟର ନାୟକ ପାଲଟିଛନ୍ତି। ୧୮ ବର୍ଷୀୟ ଲାମିନ୍ ୟାମାଲ୍ ଗୋଲ୍ କରିପାରିନଥିଲେ ମଧ୍ୟ ତାଙ୍କ ଚମତ୍କାର ପ୍ରଦର୍ଶନ ପାଇଁ 'ପ୍ଲେୟର ଅଫ୍ ଦି ମ୍ୟାଚ୍' ପୁରସ୍କାର ପାଇଥିଲେ। ତାଙ୍କ ଆକ୍ରମଣାତ୍ମକ ଖେଳ ବେଲଜିୟମର ରକ୍ଷଣଭାଗକୁ ନିରନ୍ତର ଚାପରେ ରଖିଥିଲା। ଉଲ୍ଲେଖଯୋଗ୍ୟ, ମ୍ୟାଚ୍ ପୂର୍ବରୁ ସ୍ପେନ୍ ଚଳିତ ବିଶ୍ୱକପ୍ରେ ଗୋଟିଏ ମଧ୍ୟ ଗୋଲ୍ ବରଣ କରିନଥିଲା। ଏହି ବିଜୟ ସହ ସ୍ପେନ୍ ୨୦୧୦ ପରେ ପ୍ରଥମ ଥର ପାଇଁ ବିଶ୍ୱକପ୍ ସେମିଫାଇନାଲରେ ପହଞ୍ଚିଛି। ଏବେ ଫ୍ରାନ୍ସ ବିପକ୍ଷ ସେମିଫାଇନାଲରେ କିଲିଆନ୍ ଏମ୍ବାପ୍ପେଙ୍କ ଫ୍ରାନ୍ସ ସହ ସ୍ପେନ୍‌ର ହାଇଭୋଲଟେଜ୍ ମୁକାବିଲାକୁ ନେଇ ଫୁଟବଲ୍ ପ୍ରେମୀଙ୍କ ମଧ୍ୟରେ ଉତ୍ସାହ ବଢ଼ିଛି। ଲାମିନ୍ ୟାମାଲ୍ ଓ କିଲିଆନ୍ ଏମ୍ବାପ୍ପେଙ୍କ ଟକ୍କର ଏହି ମ୍ୟାଚ୍‌ର ପ୍ରମୁଖ ଆକର୍ଷଣ ହେବ ବୋଲି ଆଶା କରାଯାଉଛି।