ବ୍ରାଜିଲ: ରିଓ ଡି ଜେନେରିଓରେ ଆକାଶ ମଝିରେ ଦୁଇ ହେଲିକପ୍ଟର ଧକ୍କା, ୬ ଜଣଙ୍କ ମୃତ୍ୟୁ

ବ୍ରାଜିଲ :  ବ୍ରାଜିଲର ରିଓ ଡି ଜେନେରିଓରେ ଦୁଇ ହେଲିକପ୍ଟର ମୁହାଁମୁହିଁ ଧକ୍କା,୬ ଜଣଙ୍କର ମୃତ୍ୟୁ । ଘଟଣାଟି ରିଓ ଡି ଜେନେରିଓର ପଶ୍ଚିମ ଅଞ୍ଚଳର ରିକ୍ରେଓ ଡୋସ୍ ବାଣ୍ଡେଇରାଣ୍ଟେସ୍ ଉପନଗରରେ ଘଟିଥିଲା।  ଆକାଶ ମଝିରେ ଦୁଇଟି ହେଲିକପ୍ଟର ପରସ୍ପର ସହ ଧକ୍କା ହେବା ପରେ ଉଭୟ ତଳକୁ ଖସିପଡ଼ିଥିଲା । ଏହି ଦୁର୍ଘଟଣାରେ ହେଲିକପ୍ଟର ଦୁଇଟିରେ ଥିବା ସମସ୍ତ ୬ ଜଣଙ୍କର ମୃତ୍ୟୁ ଘଟିଛି ବୋଲି ଅଗ୍ନିଶମ ବିଭାଗ ସୂଚନା ଦେଇଛି । ସମସ୍ତ ମୃତକ ବିମାନର କ୍ରୁ ମେମ୍ବର ଅଟନ୍ତି । ଧକ୍କା ପରେ ଏକ ହେଲିକପ୍ଟର ଇଲେକ୍ଟ୍ରିକ୍ କାର୍ ଡିଲରସିପ୍‌ର ପାର୍କିଂ ସ୍ଥଳରେ ଖସିପଡ଼ି ଭୟଙ୍କର ଅଗ୍ନିକାଣ୍ଡ ସୃଷ୍ଟି କରିଥିଲା। ଏଥିରେ ଅତିକମରେ ୨୦ଟି ଗାଡ଼ି ଜଳିଯାଇଥିଲା। ଅନ୍ୟ ହେଲିକପ୍ଟରଟି ଓଲଟି ପଡ଼ିଥିଲେ ମଧ୍ୟ ସେଥିରେ ନିଆଁ ଲାଗିନଥିଲା। ସୋସିଆଲ୍ ମିଡିଆରେ ଭାଇରାଲ୍ ଭିଡିଓରେ ଅନେକ ଗାଡ଼ି ଜଳୁଥିବା ଏବଂ କଳା ଧୂଆଁ ଆକାଶକୁ ଉଠୁଥିବା ଦେଖିବାକୁ ମିଳିଛି। ଦୁର୍ଘଟଣାର କାରଣ ଜାଣିବା ପାଇଁ ତଦନ୍ତ ଆରମ୍ଭ ହୋଇଛି। ତେବେ ଦୁର୍ଘଟଣାର ସଠିକ୍ କାରଣ ଏଯାଏଁ ଜଣାପଡିନାହିଁ । ରିଓ ଡି ଜେନେରିଓର ଉପ-ମେୟର ଏଡୁଆର୍ଡୋ କାଭାଲିଏରେ କହିଛନ୍ତି ଯେ, ହେଲିକପ୍ଟର ମଧ୍ୟରୁ ଗୋଟିଏରେ ବିଦେଶୀ ନାଗରିକ ମଧ୍ୟ ଥିଲେ। ତେବେ ସେମାନଙ୍କ ପରିଚୟ ସମ୍ପର୍କରେ ଏପର୍ଯ୍ୟନ୍ତ କୌଣସି ସୂଚନା ଦିଆଯାଇନାହିଁ। ଅଗ୍ନିଶମ ବିଭାଗର ଅଧିକାରୀମାନଙ୍କ କହିବା ଅନୁସାରେ, ଇଲେକ୍ଟ୍ରିକ୍ ଗାଡ଼ିର ଲିଥିୟମ୍-ଆୟନ୍ ବ୍ୟାଟେରିରେ ନିଆଁ ଲାଗିବାରୁ ଅଗ୍ନି ନିୟନ୍ତ୍ରଣ କରିବା ଅତ୍ୟନ୍ତ କଠିନ ହୋଇଥିଲା। ଏପରି ନିଆଁ ଲିଭାଇବା ପାଇଁ ସାଧାରଣ ଗାଡ଼ି ତୁଳନାରେ ତିନିରୁ ଚାରି ଗୁଣ ଅଧିକ ପାଣି ଆବଶ୍ୟକ ହୋଇଥାଏ। ଦୁର୍ଘଟଣାଗ୍ରସ୍ତ ହେଲିକପ୍ଟର ଏୟାରବସ୍ H125 ଏବଂ ଦ୍ବିତୀୟଟି 206B ଜେଟ ରେଞ୍ଜର ଥିଲା । ଦୁର୍ଘଟଣା ରବିବାର ସକାଳ ୮.୯୫ରେ ହୋଇଥିବା ଜଣାପଡିଛି ।