ଟ୍ରକ୍-କ୍ରୁଜର ମୁହାଁମୁହିଁ ଧକ୍କାରେ ଚାଲିଗଲା  ୬ସାଙ୍ଗଙ୍କ ଜୀବନ, ୩ ଗୁରୁତର :ପିଏମ୍ ମୋଦୀଙ୍କ ଶୋକ

କର୍ଣ୍ଣାଟକ: ଟ୍ରକ୍-କ୍ରୁଜର ମୁହାଁମୁହିଁ ଧକ୍କାରେ ଚାଲିଗଲା  ୬ସାଙ୍ଗଙ୍କ ଜୀବନ, ୩ ଗୁରୁତର । କର୍ଣ୍ଣାଟକର ଉତ୍ତର କନ୍ନଡ଼ ଜିଲ୍ଲାର ୟେଲ୍ଲାପୁର ତାଲୁକା ଅନ୍ତର୍ଗତ ଅରାବାଇଲ ଘାଟିରେ ଏକ ଭୟଙ୍କର ସଡ଼କ ଦୁର୍ଘଟଣା । ଦୁର୍ଘଟଣାରେ ୬ ଜଣଙ୍କର ମୃତ୍ୟୁ ଘଟିଥିବାବେଳେ ୩ ଜଣ ଗୁରୁତର ଆହତ । ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଭୀର ଶୋକ ପ୍ରକାଶ କରିଛନ୍ତି। ସୂଚନା ଅନୁସାରେ, ଧାରୱାଡ଼ରୁ ୯ ଜଣ ସାଙ୍ଗ ଏକ କ୍ରୁଜର ଗାଡ଼ିରେ ଧର୍ମସ୍ଥଳ ଓ ଚିକ୍କମାଗାଳୁରୁ ବୁଲିବାକୁ ଯାଉଥିଲେ। ଗୁରୁବାର ଭୋର ସମୟରେ  ୟେଲ୍ଲାପୁର ତାଲୁକାର ବାଲାଗର ନିକଟ ଅରାବାଇଲ ଘାଟିରେ ବିପରୀତ ଦିଗରୁ ଆସୁଥିବା ଏକ ଟ୍ରକ୍ ସହ କ୍ରୁଜରର ମୁହାଁମୁହିଁ ଧକ୍କା ହୋଇଥିଲା। ଧକ୍କା ଏତେ ଭୟଙ୍କର ଥିଲା ଯେ କ୍ରୁଜରର ସାମ୍ନା ଅଂଶ ସମ୍ପୂର୍ଣ୍ଣ ଚୂରମାର ହୋଇଯାଇଥିଲା। ଫଳରେ ଗାଡ଼ି ଚାଳକଙ୍କ ସମେତ ୬ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା। ଆହତ ୩ ଜଣଙ୍କୁ ସ୍ଥାନୀୟ ଲୋକ ଓ ପୋଲିସ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଥିବାବେଳେ ସେମାନଙ୍କ ଅବସ୍ଥା ସଙ୍କଟାପନ୍ନ ରହିଛି। ମୃତକମାନେ ସମସ୍ତେ ଧାରୱାଡ଼ର ବାସିନ୍ଦା ଏବଂ ଏକ ଅନଲାଇନ୍ ଫୁଡ୍ ଡେଲିଭରି କମ୍ପାନୀରେ ପାର୍ଟ-ଟାଇମ୍ ଡେଲିଭରି ଏକ୍ସିକ୍ୟୁଟିଭ୍ ଭାବେ କାମ କରୁଥିଲେ। ମୃତକଙ୍କ ମଧ୍ୟରେ ଗାଡ଼ି ଚାଳକ ସଞ୍ଜୀବ ଅଙ୍ଗାଡ଼ି, ବସବରାଜ, ଅଭିଷେକ ଇଶ୍ୱର, ଅକ୍ଷୟ, ଅଭିଷେକ ଓ ମଞ୍ଜୁନାଥ ଚୁଲାକି ରହିଛନ୍ତି। ଦୁର୍ଘଟଣା ପରେ ୟେଲ୍ଲାପୁର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ ବ୍ୟବଚ୍ଛେଦ ପାଇଁ ପଠାଇଛି। ଆହତ ଜଣେ ଯାତ୍ରୀଙ୍କ ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ଦୁର୍ଘଟଣାର ପ୍ରକୃତ କାରଣ ନେଇ ତଦନ୍ତ ଆରମ୍ଭ କରିଛି। ଏହି ଦୁଃଖଦ ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଭୀର ଶୋକ ପ୍ରକାଶ କରି କହିଛନ୍ତି ଯେ, ଉତ୍ତର କନ୍ନଡ଼ ଜିଲ୍ଲାର ଏହି ମର୍ମନ୍ତୁଦ ଦୁର୍ଘଟଣା ତାଙ୍କୁ ଗଭୀର ଭାବେ ବ୍ୟଥିତ କରିଛି। ସେ ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ସମବେଦନା ଜଣାଇବା ସହ ଆହତମାନଙ୍କ ଶୀଘ୍ର ସୁସ୍ଥତା କାମନା କରିଛନ୍ତି।