Panic Grips Ramnagar : ରାମଲୀଳା ମଝିରେ ହାତୀର ଉତ୍ପାତ
ରାମଲୀଳା ପାଇଁ ଆସିଥିବା ହାତୀ ୧୨ ଘଣ୍ଟା ଧରି ଆତଙ୍କ ଖେଳାଇଲା | ହାତୀ ଆକ୍ରମଣରେ ମାହୁନ୍ତ ଗୁରୁତର ଆହତ ହୋଇ ୫୦ଟି ଷ୍ଟିଚ୍ ପଡ଼ିଥିବା ବେଳେ, ଶେଷରେ ବନ ବିଭାଗ ହାତୀଟିକୁ ନିୟନ୍ତ୍ରଣକୁ ଆଣିଥିଲା |
ରାମନଗରରେ ସେହି ସମୟରେ ହଠାତ୍ ଆତଙ୍କ ଖେଳିଯାଇଥିଲା, ଯେତେବେଳେ ରାମଲୀଳା କାର୍ଯ୍ୟକ୍ରମକୁ ଅଣାଯାଇଥିବା ଏକ ହାତୀ ହଠାତ୍ ନିୟନ୍ତ୍ରଣ ହରାଇ ଏଣେତେଣେ ଦୌଡ଼ିବାକୁ ଲାଗିଥିଲା। ହାତୀଟିକୁ ଏପରି ଦୌଡ଼ୁଥିବା ଦେଖି ଲୋକଙ୍କ ମଧ୍ୟରେ ଦଳାଚକଟା ପରିସ୍ଥିତି ସୃଷ୍ଟି ହୋଇଥିଲା | ମାହୁନ୍ତ ହାତୀଟିକୁ ନିୟନ୍ତ୍ରଣ କରିବାକୁ ଚେଷ୍ଟା କରିଥିଲେ, କିନ୍ତୁ ହାତୀଟି ତାଙ୍କୁ କଚାଡ଼ି ଦେଇଥିଲା। ଏଥିରେ ସେ ଗୁରୁତର ଆହତ ହୋଇଥିବା ବେଳେ ତାଙ୍କର ଚିକିତ୍ସା ଡାକ୍ତରଖାନାରେ ଚାଲିଛି | ଏହି ହାତୀଟିକୁ ଆଜମଗଡ଼ରୁ ରାମଲୀଳା କାର୍ଯ୍ୟକ୍ରମ ପାଇଁ ଅଣାଯାଇଥିଲା। ହାତୀଟି ପଞ୍ଚବଟୀ ପଡ଼ିଆରୁ ବାହାରି ରାସ୍ତା ଉପରକୁ ଦୌଡ଼ିବାକୁ ଲାଗିଥିଲା | ପ୍ରାୟ ୧୨ ଘଣ୍ଟା ଧରି ଏଣେତେଣେ ଦୌଡ଼ିବା ପରେ ଥକିଯାଇ ହାତୀଟି ଗୋଟିଏ ସ୍ଥାନରେ ଅଟକି ଯାଇଥିଲା |ଘଟଣାସ୍ଥଳରେ ବନ ବିଭାଗର କର୍ମଚାରୀ ଓ ପୁଲିସ ଫୋର୍ସ ଉପସ୍ଥିତ ଥିଲେ | ଏହା ସହିତ ଗୋରଖପୁରରୁ ମଧ୍ୟ ବନ ବିଭାଗର ଏକ ସ୍ୱତନ୍ତ୍ର ଟିମ୍ ପହଞ୍ଚିଥିଲା | ଶେଷରେ ବିଳମ୍ବିତ ରାତିରେ ହାତୀଟିକୁ ନିୟନ୍ତ୍ରଣକୁ ଅଣାଯାଇଥିଲା |
ସୂଚନା ଅନୁଯାୟୀ, ସକାଳ ପ୍ରାୟ ୧୧ଟା ବେଳେ ମାହୁନ୍ତ ହାତୀକୁ ଖାଇବାକୁ ଦେବା ପାଇଁ ଯାଇଥିବା ସମୟରେ ହଠାତ୍ ହାତୀଟି ନିୟନ୍ତ୍ରଣ ହରାଇ ବସିଥିଲା। ଏହାପରେ ହାତୀଟି ଏଣେତେଣେ ଦୌଡ଼ିବାକୁ ଲାଗିଥିଲା। କିଛି ଲୋକ ହାତୀଟିକୁ ନିୟନ୍ତ୍ରଣ କରିବା ପାଇଁ ତା' ପଛରେ ଦୌଡ଼ିଥିଲେ। କିନ୍ତୁ ଉଗ୍ର ହୋଇଯାଇଥିବା ହାତୀଟି ରାସ୍ତାରେ ଅନେକ ଗଛ ଓ ବିଦ୍ୟୁତ୍ ଖୁଣ୍ଟ ଭାଙ୍ଗି ଦୌଡ଼ିବାକୁ ଲାଗିଥିଲା।
ସୂଚନା ପାଇ ପହଞ୍ଚିଥିବା ପୋଲିସ ୨ କିଲୋମିଟର ଅଞ୍ଚଳକୁ ସମ୍ପୂର୍ଣ୍ଣ ଭାବେ ବନ୍ଦ କରିଦେଇଥିଲା। ବନ ବିଭାଗର ଟିମ୍ ଲଗାତାର ହାତୀଟିକୁ ନିୟନ୍ତ୍ରଣକୁ ଆଣିବାକୁ ଚେଷ୍ଟା କରୁଥିଲା। ଏଭଳି ପରିସ୍ଥିତିରେ ସୁରକ୍ଷା ଦୃଷ୍ଟିରୁ ମାଇକ୍ ଯୋଗେ ଘୋଷଣା କରି ଲୋକମାନଙ୍କୁ ଘର ଭିତରେ ରହିବାକୁ ଅନୁରୋଧ କରାଯାଇଥିଲା।ହାତୀର ଆକ୍ରମଣରେ ଆହତ ହୋଇଥିବା ମାହୁନ୍ତଙ୍କୁ ୫୦ଟି ଷ୍ଟିଚ୍ ପଡ଼ିଛି। ହାତୀଟି ନିୟନ୍ତ୍ରଣହୀନ ହୋଇପଡ଼ିବା କାରଣରୁ ରବିବାର ଦିନ ଲୀଳା ମଧ୍ୟ ପ୍ରଭାବିତ ହୋଇଥିଲା। ଲୀଳାର ମଞ୍ଚସ୍ଥ ହୋଇନଥିବା ବେଳେ କେବଳ ଭଗବାନଙ୍କ ଆରତି କରାଯାଇଥିଲା |
ହାତୀଟିକୁ ଗତ ରବିବାର ବିଳମ୍ବିତ ରାତି ପ୍ରାୟ ୨ଟା ସମୟରେ ବନ ବିଭାଗର ଟିମ୍ ନିୟନ୍ତ୍ରଣକୁ ଆଣିଥିଲା। ଏହାକୁ ରାମନଗର ଅଞ୍ଚଳର ପି.ଏନ୍. ଇଣ୍ଟର କଲେଜ ସମ୍ମୁଖରେ ଥିବା ଏକ ବଗିଚାରେ ରଖାଯାଇଛି। ବଗିଚାଟି ଚାରିପଟୁ ପାଚେରି ଦ୍ୱାରା ଘେରା ହୋଇଛି।ପ୍ରାୟ ୫ ବିଘା ଜମିର ଏହି ବଗିଚାଟି ରାଜ ପରିବାରର ଅଧୀନରେ ରହିଛି। ସ୍ଥାନଟି ସୁରକ୍ଷିତ ଥିବାରୁ ହାତୀଟିକୁ ବଗିଚା ଭିତରେ ରଖାଯାଇଛି। ସେଠାକୁ କାହାକୁ ଯିବାକୁ ଅନୁମତି ଦିଆଯାଉନାହିଁ।
ଏହି ବିଷୟରେ ରାମନଗର ଥାନା ଅଧିକାରୀ ସଞ୍ଜୟ ମିଶ୍ର କହିଛନ୍ତି, ହାତୀଟି ନିୟନ୍ତ୍ରଣ ହରାଇ ବେକାବୁ ହୋଇଯାଇଥିବା ଖବର ମିଳିଥିଲା | ଏହା ପରେ ପୋଲିସ ବିଭାଗ ଓ ବନ ବିଭାଗର ପଶୁ ବିଶେଷଜ୍ଞ ଦଳ ହାତୀଟିକୁ ନିୟନ୍ତ୍ରଣକୁ ଆଣିବା ପାଇଁ ଚେଷ୍ଟା କରିଥିଲେ | ଏହା ସହିତ, ଆହତ ମହାଉତଙ୍କର ଲାଲ ବାହାଦୁର ଶାସ୍ତ୍ରୀ ହସ୍ପିଟାଲରେ ଚିକିତ୍ସା ଚାଲିଛି | ଏହି ହାତୀଟିକୁ ଆଜମଗଡ଼ରୁ ଅଣାଯାଇଥିଲା |