Salepur Ganesh Puja: ସାଲେପୁର ରାଇସୁଙ୍ଗୁଡାରେ ୨୯ତମ ଗଣେଶ ପୂଜା, ଚାନ୍ଦି ଅଳଙ୍କାରରେ ସଜିଲେ ଗଣାଧିପତି, ଆକର୍ଷଣୀୟ ଆଲୋକମାଳାରେ ଝଲସୁଛି ବଜାର

କଟକ: ସାଲେପୁର ବ୍ଲକ ରାଇସୁଙ୍ଗୁଡା ନେତାଜୀ ସଂଗ୍ରାମୀ କ୍ଲବ ପକ୍ଷରୁ ଚଳିତ ବର୍ଷ ୨୯ତମ ଗଣେଶ ପୂଜା ଧୁମଧାମରେ ପାଳିତ ହେଉଛି। ଚଳିତ ବର୍ଷ ଏହି ପୂଜା ୭ ଦିନ ବ୍ୟାପୀ ଆୟୋଜିତ ହେବ। ପୂଜା ଅବସରରେ ଗଣାଧିପତି ଶ୍ରୀଗଣେଶଙ୍କୁ ସୁନ୍ଦର ଚାନ୍ଦି ଅଳଙ୍କାରରେ ସୁସଜ୍ଜିତ କରାଯାଇଛି। ଏଥିସହ ରାଇସୁଙ୍ଗୁଡା ବଜାରକୁ ଆକର୍ଷଣୀୟ ଆଲୋକମାଳାରେ ସଜାଯାଇଥିବାରୁ ସମଗ୍ର ଅଞ୍ଚଳ ଝଲସି ଉଠିଛି।

ପାରମ୍ପରିକ ରୀତିନୀତି ଓ ବିଧିବିଧାନ ଅନୁଯାୟୀ ପୂଜାର୍ଚ୍ଚନା କରାଯାଉଛି। ବିଦ୍ୱାନ ପଣ୍ଡିତମାନଙ୍କ ମନ୍ତ୍ରୋଚ୍ଚାରଣରେ ସମଗ୍ର ରାଇସୁଙ୍ଗୁଡା ଅଞ୍ଚଳ ଭକ୍ତିମୟ ପରିବେଶରେ ପ୍ରକମ୍ପିତ ହେଉଛି। ଗଣେଶ ପୂଜାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ବେଶ୍ ଉତ୍ସାହ ଓ ଆନନ୍ଦ ପରିଲକ୍ଷିତ ହେଉଛି। ସାତ ଦିନ ଧରି ଚାଲିବାକୁ ଥିବା ଏହି ପୂଜା ଉତ୍ସବରେ ଭକ୍ତ ଓ ଶ୍ରଦ୍ଧାଳୁଙ୍କ ସମାଗମ ହେବା ସହ ବିଭିନ୍ନ ଧାର୍ମିକ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ନେଇ ମଧ୍ୟ ପ୍ରସ୍ତୁତି ଚାଲିଛି।