Rising water level of river:ବଢୁଛି ଋଷିକୁଲ୍ୟା ନଦୀର ଜଳସ୍ତର,ପ୍ରଶାସନ ବାନ୍ଧିଲେ ନଦୀ ବନ୍ଧ

ଗଞ୍ଜାମ:ଲଗାଣ ବର୍ଷା ପରେ ଋଷିକୁଲ୍ୟା ନଦୀ ଫୁଲି ବିପଦ ସଙ୍କେତ ଉପରେ ପ୍ରବାହିତ ହେଉଛି ବନ୍ୟାଜଳ। ଫଳରେ ଗଞ୍ଜାମ ଜିଲ୍ଲାର ନଦୀକୂଳିଆ ଅଞ୍ଚଳରେ ଦେଖାଦେଇଛି ଭୟ ଓ ଆଶଙ୍କା ।ପୁରୁଷୋତ୍ତମପୁର ଏନଏସିର ୧୧ ନମ୍ବର ୱାର୍ଡ ଋଷିକୁଲ୍ୟା ନଦୀ ନିକଟରେ ଥିବାରୁ ଏଠାରେ ବନ୍ୟାଜଳ ପଶିବା ନେଇ ଲୋକଙ୍କ ମନରେ ଛନକା ସୃଷ୍ଟି ହୋଇଛି । ନଦୀକୂଳିଆ ସାହିରେ ପାଣି ପଶିବା ପରେ ସ୍ଥାନୀୟ ଲୋକଙ୍କ ମଧ୍ୟରେ ବଢିଛି ଚିନ୍ତା। ଖବର ପାଇ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି ଛତ୍ରପୁର ଉପଜିଲ୍ଲାପାଳ ଶିବାଶିଷ ବରାଳ ଏବଂ ସ୍ଥାନୀୟ ତହସିଲଦାର ବିନୋଦ ବେହେରା । ନଦୀର ଜଳସ୍ତର ଓ ପରିସ୍ଥିତି ଉପରେ ପ୍ରଶାସନ ପକ୍ଷରୁ କଡା ନଜର ରଖାଯାଇଛି । ସମ୍ଭାବ୍ୟ ବନ୍ୟା ପରିସ୍ଥିତିକୁ ମୁକାବିଲା ପାଇଁ ଜିଲ୍ଲା ପ୍ରଶାସନ ସଜାଗ ରହିଥିବା ବେଳେ ଓଡ୍ରାଫ୍ ଟିମ୍‌କୁ ମଧ୍ୟ ପ୍ରସ୍ତୁତ ରଖାଯାଇଛି । ଜରୁରୀ ପରିସ୍ଥିତିରେ ଲୋକଙ୍କୁ ଉଦ୍ଧାର ଓ ସୁରକ୍ଷିତ ସ୍ଥାନକୁ ସ୍ଥାନାନ୍ତର ପାଇଁ ପ୍ରସ୍ତୁତ ରହିଛି ପ୍ରଶାସନ । ଏପଟେ ଲୋକଙ୍କୁ ଭୟଭୀତ ନହୋଇ ସତର୍କ ରହିବା ସହ ନଦୀ ଓ ବନ୍ୟାଜଳ ନିକଟକୁ ନଯିବା ପାଇଁ ପ୍ରଶାସନ ପକ୍ଷରୁ ପରାମର୍ଶ ଦେଇଛନ୍ତି,ଛତ୍ରପୁର ଉପ ଜିଲ୍ଲାପାଳ ସୁଭାଶିଷ ବରାଳ |