ଇରାନରେ ଖାମେନେଇଙ୍କ ଅନ୍ତିମ ସଂସ୍କାର, ୬ ତାରିଖ ଯାଏ ଚାଲିବ ଶୋକ ଯାତ୍ରା

ତେହେରାନ: ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲ୍ଲୀ ଖାମେନେଇଙ୍କ ଅନ୍ତିମ ସଂସ୍କାର କାର୍ଯ୍ୟକ୍ରମ ଶୁକ୍ରବାର  ଆରମ୍ଭ ହୋଇଛି। ସପ୍ତାହବ୍ୟାପୀ ଏହି ଶୋକ କାର୍ଯ୍ୟକ୍ରମରେ ତେହେରାନ ସମେତ ଇରାନର ବିଭିନ୍ନ ସହରରେ ଶ୍ରଦ୍ଧାଞ୍ଜଳି ସଭା ଓ ଶୋକ ଯାତ୍ରାର ଆୟୋଜନ କରାଯାଇଛି। ସରକାରୀ ସୂଚନା ଅନୁସାରେ, ଜୁଲାଇ ୬ ପର୍ଯ୍ୟନ୍ତ ଶୋକ ସଭା ଚାଲିବା ପରେ ୯ରେ ତାଙ୍କ ଜନ୍ମସ୍ଥାନ ମଶହଦର ଇମାମ ରେଜା ଶ୍ରାଇନରେ ତାଙ୍କୁ ସମାଧି ଦିଆଯିବ। ଶୁକ୍ରବାର ତେହେରାନର ପ୍ରସିଦ୍ଧ ଗ୍ରାଣ୍ଡ ମୋସଲ୍ଲା ମସଜିଦରେ ଇରାନର ଜାତୀୟ ପତାକାରେ ଆବୃତ ଖାମେନେଇଙ୍କ ପାର୍ଥିବ ଶରୀରକୁ ସର୍ବସାଧାରଣଙ୍କ ଶେଷ ଦର୍ଶନ ପାଇଁ ରଖାଯାଇଛି। ହଜାର ହଜାର ଶୋକାକୁଳ ଲୋକ ସେଠାରେ ପହଞ୍ଚି ତାଙ୍କୁ ଶେଷ ଶ୍ରଦ୍ଧାଞ୍ଜଳି ଜଣାଇଛନ୍ତି। ଶନିବାର ଅନୁଷ୍ଠିତ ହେବାକୁ ଥିବା ସରକାରୀ ଶେଷକୃତ୍ୟରେ ବହୁ ଶୀର୍ଷ ନେତା, ଧାର୍ମିକ ଗୁରୁ ଓ ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ସମେତ ଚୀନ୍, ଆଫଗାନିସ୍ତାନ ଓ ଆଖପାଖର ପ୍ରାୟ ୩୦ଟି ଦେଶର ପ୍ରତିନିଧି ଏଥିରେ ଯୋଗଦେବେ। ଏହି କାର୍ଯ୍ୟକ୍ରମରେ ପ୍ରାୟ ୧.୫ ରୁ ୨ କୋଟି ଲୋକ ସାମିଲ ହେବାର ସମ୍ଭାବନା ରହିଛି, ଯାହା ଦେଶ ଇତିହାସର ସବୁଠାରୁ ବଡ଼ ଶେଷକୃତ୍ୟ ହେବ। ଇରାନ ସରକାରଙ୍କ କହିବା ଅନୁସାରେ, ଜୁଲାଇ ୬ରେ ତେହେରାନରେ ପ୍ରାୟ ୧୦ କିଲୋମିଟର ଦୀର୍ଘ ଶୋକ ଶୋଭାଯାତ୍ରା ଆୟୋଜନ କରାଯିବ। ଏହାପରେ ଖାମେନେଇଙ୍କ ପାର୍ଥିବ ଶରୀରକୁ କୋମ ସହର ଏବଂ ଇରାକର ପବିତ୍ର ଶିଆ ସହର ନଜଫ ଓ କର୍ବଲାକୁ ନିଆଯିବ। ଶେଷରେ ଜୁଲାଇ ୯ରେ ମଶହଦରେ ଧାର୍ମିକ ରୀତିନୀତି ଅନୁଯାୟୀ ସମାଧି ଦିଆଯିବ। ରିପୋର୍ଟ ଅନୁଯାୟୀ, ଫେବୃଆରୀ ୨୮ରେ ଆମେରିକା ଓ ଇସ୍ରାଏଲର ମିଳିତ ଏୟାର ଷ୍ଟ୍ରାଇକ୍‌ରେ ଖାମେନେଇଙ୍କ ମୃତ୍ୟୁ ହୋଇଥିବା ଦାବି କରାଯାଇଛି। ତାଙ୍କ ସହ ପରିବାରର କିଛି ସଦସ୍ୟ ମଧ୍ୟ ପ୍ରାଣ ହରାଇଥିବା କୁହାଯାଇଛି। ଯୁଦ୍ଧ ପରିସ୍ଥିତି ଯୋଗୁଁ ପୂର୍ବରୁ ମାର୍ଚ୍ଚ ମାସରେ ହେବାକୁ ଥିବା ୮୬ ବର୍ଷ ବୟସରେ ପ୍ରାଣ ହରାଇଥିବା ଖେମିନିଙ୍କ ଅନ୍ତିମ ସଂସ୍କାରକୁ ସ୍ଥଗିତ ରଖାଯାଇଥିଲା। ବର୍ତ୍ତମାନ ଇରାନ ଓ ଆମେରିକା ମଧ୍ୟରେ ଏକ ଅସ୍ଥାୟୀ ଯୁଦ୍ଧବିରତି ଚାଲିଥିବା ବେଳେ ଏହି ଅନ୍ତିମ ସଂସ୍କାର ହେବାକୁ ଯାଉଛି। ଏପଟେ ଇରାନର ସଂସଦ ବାଚସ୍ପତି ମହମ୍ମଦ ବାଘେର ଗାଲିବାଫ୍ ଦେଶବାସୀଙ୍କୁ ବହୁ ସଂଖ୍ୟାରେ ଶୋକ ଯାତ୍ରାରେ ସାମିଲ ହେବାକୁ ଆହ୍ୱାନ ଜଣାଇଛନ୍ତି। ଏଥିପାଇଁ ସରକାର ତେହେରାନ, କୁମ୍ ଏବଂ ମସାଦ୍ ସହରରେ ସରକାରୀ ଛୁଟି ଘୋଷଣା କରିଛନ୍ତି। ସୁରକ୍ଷା ଦୃଷ୍ଟିରୁ ସହରର କେନ୍ଦ୍ରାଞ୍ଚଳରେ ଗାଡ଼ି ଚଳାଚଳ ଉପରେ କଟକଣା ଲଗାଯାଇଛି ଏବଂ ଆକାଶମାର୍ଗକୁ ମଧ୍ୟ ଆଂଶିକ ବନ୍ଦ କରାଯାଇଛି। ଶୋକ କାର୍ଯ୍ୟକ୍ରମ ସମୟରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିବା ବେଳେ ଭିଡ଼ ନିୟନ୍ତ୍ରଣ ପାଇଁ ମଧ୍ୟ ସ୍ୱତନ୍ତ୍ର ବ୍ୟବସ୍ଥା କରାଯାଇଛି। ବିଶାଳ ଜନସମାଗମକୁ ଦୃଷ୍ଟିରେ ରଖି ସରକାର ସମସ୍ତ ପ୍ରସ୍ତୁତି ସମ୍ପୂର୍ଣ୍ଣ କରିଥିବା ସୂଚନା ମିଳିଛି। । ତେବେ ସୁରକ୍ଷା ଗ୍ୟାରେଣ୍ଟି ନଥିବାରୁ ଖେମିନିଙ୍କ ପୁଅ ତଥା ନୂଆ ସର୍ବୋଚ୍ଚ ନେତା ମୋଜତାବା ଖେମିନି ଏହି ସାଧାରଣ ସଭାରେ ସାମ୍ନାକୁ ଆସିବାର ସମ୍ଭାବନା କମ୍ ବୋଲି ଭାରତରେ ଥିବା ଇରାନର ପ୍ରତିନିଧି ଆୟାତୋଲ୍ଲା ହାକିମ ଇଲାହୀ ସୂଚନା ଦେଇଛନ୍ତି। ତେହେରାନରେ ତିନି ଦିନ ଶ୍ରଦ୍ଧାଞ୍ଜଳି ପାଇଁ ରଖାଯିବା ପରେ ଖେମିନିଙ୍କ ଶରୀରକୁ ଇରାକର ପବିତ୍ର ସହର ନଜାଫ୍ ଓ କରବଲା ନିଆଯିବ ଏବଂ ଶେଷରେ ଜୁଲାଇ ୯ ତାରିଖରେ ତାଙ୍କ ଜନ୍ମସ୍ଥାନ ମସାଦର ଇମାମ ରେଜା ଦରଗାହରେ କବର ଦିଆଯିବ। ଖାମନେଇଙ୍କ ଦୀର୍ଘ ଶାସନକାଳରେ ଇରାନର ରାଜନୈତିକ ଓ ଧାର୍ମିକ ଢାଞ୍ଚାରେ ବଡ଼ ପ୍ରଭାବ ପଡ଼ିଥିଲା । ତାଙ୍କ ଅନ୍ତିମ ସଂସ୍କାରକୁ ନେଇ ଦେଶ ଓ ବିଦେଶରେ ଗଭୀର ଶୋକ ପ୍ରକାଶ ପାଇଛି ।