ଖଣିଜ ସମ୍ପଦ ଉପରେ ଓଡ଼ିଶାର ଅଧିକାର ଛଡ଼ାଇ ନେବାକୁ କେନ୍ଦ୍ରର ଉଦ୍ୟମ: ରାଜା ସ୍ୱାଇଁ

ଭୁବନେଶ୍ୱର: ଖଣିଜ ସମ୍ପଦ ଉପରେ ଓଡ଼ିଶାର ସାମ୍ବିଧାନିକ ଅଧିକାରକୁ ସୀମିତ କରିବାକୁ କେନ୍ଦ୍ର ସରକାର ଉଦ୍ୟମ କରୁଥିବା ଅଭିଯୋଗ କରିଛି ବିଜେଡି। ଦଳର ବିଧାୟକ ରାଜା ସ୍ୱାଇଁ ଆଜି ସାମ୍ବାଦିକ ସମ୍ମିଳନୀରେ Mines and Minerals (Development and Regulation) Amendment Bill, 2026କୁ ନେଇ କେନ୍ଦ୍ରକୁ ଟାର୍ଗେଟ କରିଛନ୍ତି। ରାଜା ସ୍ୱାଇଁଙ୍କ ଅଭିଯୋଗ ଅନୁସାରେ, ବିଲ୍‌ରେ ଥିବା ପ୍ରସ୍ତାବିତ Section 9D ରାଜ୍ୟ ସରକାରଙ୍କ ଆର୍ଥିକ କ୍ଷମତାକୁ ଦୁର୍ବଳ କରିପାରେ। ଖଣିଜ ସମ୍ପଦ ଏବଂ ଖଣିଜ ବହନକାରୀ ଜମି ଉପରେ ଟିକସ, ସେସ୍ ଓ ଅନ୍ୟାନ୍ୟ ଲେଭି ଲଗାଇବାରେ ରାଜ୍ୟର କ୍ଷମତା ସୀମିତ ହେଲେ ଓଡ଼ିଶା ଆର୍ଥିକ ଭାବେ ବଡ଼ କ୍ଷତି ସହିପାରେ ବୋଲି ସେ କହିଛନ୍ତି। ସେ ଆହୁରି କହିଛନ୍ତି, Mineral Area Development Authority vs Steel Authority of India Ltd. ମାମଲାରେ ସୁପ୍ରିମକୋର୍ଟ ରାଜ୍ୟମାନଙ୍କୁ ଖଣିଜ ସମ୍ପଦ ଉପରେ ଟିକସ ଆଦାୟ କରିବାର ସାମ୍ବିଧାନିକ ଅଧିକାର ସ୍ୱୀକୃତି ଦେଇଛନ୍ତି। ଏହା ସତ୍ତ୍ୱେ ନୂଆ ଆଇନ ମାଧ୍ୟମରେ ସେହି ଅଧିକାରକୁ ନିଷ୍ପ୍ରଭ କରିବାକୁ କେନ୍ଦ୍ର ଉଦ୍ୟମ କରୁଥିବା ସେ ଅଭିଯୋଗ କରିଛନ୍ତି।

ଓଡ଼ିଶାର ଖଣିଜ ସମ୍ପଦରୁ ଦେଶର ଶିଳ୍ପ ଓ ଅର୍ଥନୀତି ବ୍ୟାପକ ଭାବେ ଲାଭବାନ ହେଉଥିବା ବେଳେ ରାଜ୍ୟ ତାହାର ନ୍ୟାୟସଙ୍ଗତ ଅଂଶ ପାଉନାହିଁ ବୋଲି ମଧ୍ୟ ରାଜା ସ୍ୱାଇଁ କହିଛନ୍ତି। ପ୍ରସ୍ତାବିତ ବ୍ୟବସ୍ଥା ଲାଗୁ ହେଲେ ଓଡ଼ିଶା ପ୍ରତିବର୍ଷ ହଜାର ହଜାର କୋଟି ଟଙ୍କାର ସମ୍ଭାବ୍ୟ ରାଜସ୍ୱରୁ ବଞ୍ଚିତ ହୋଇପାରେ ଏବଂ ଏହାର ପ୍ରଭାବ ରାଜ୍ୟର ବିକାଶମୂଳକ କାର୍ଯ୍ୟକ୍ରମ ଉପରେ ପଡ଼ିପାରେ ବୋଲି ସେ ଦାବି କରିଛନ୍ତି।