ମୋଦି–ପୁଟିନ ବୈଠକ: ଯୁଦ୍ଧର ଅନ୍ତ ପାଇଁ ମୋଦିଙ୍କ ଶାନ୍ତି ବାର୍ତ୍ତା

ବିଶ୍କେକ: ରୁଷିଆ–ୟୁକ୍ରେନ ମଧ୍ୟରେ ଦୀର୍ଘଦିନ ଧରି ଚାଲିଥିବା ଯୁଦ୍ଧର ଅନ୍ତ ପାଇଁ ଶାନ୍ତିର ବାର୍ତ୍ତା ଦେଇଛନ୍ତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। କିର୍ଗିଜସ୍ତାନର ରାଜଧାନୀ ବିଶ୍କେକରେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଆଲୋଚନା ବେଳେ ମୋଦି କହିଛନ୍ତି ଯେ, ମାନବତାର ସ୍ୱାର୍ଥ ପାଇଁ ଯୁଦ୍ଧର ଅନ୍ତ ହେବା ଆବଶ୍ୟକ। ଶାଂଘାଇ ସହଯୋଗ ସଂଗଠନ (SCO) ସମ୍ମିଳନୀ ଅବସରରେ ଦୁଇ ନେତାଙ୍କ ମଧ୍ୟରେ ଏହି ଦ୍ୱିପାକ୍ଷିକ ବୈଠକ ହୋଇଥିଲା। ଯୁଦ୍ଧ ଯେତେ ଦିନ ଚାଲିବ, ମାନବତା ସେତେ ପଛକୁ ଯିବ ବୋଲି ମୋଦି ମତ ରଖିଥିଲେ। ତେଣୁ ଅନନ୍ତ ଯୁଦ୍ଧରୁ ଯୁଦ୍ଧର ଅନ୍ତ ଦିଗକୁ ଆଗେଇବା ସହ ଶତ୍ରୁତା ବନ୍ଦ କରିବା ଦିଗରେ ପଦକ୍ଷେପ ନେବା ଆବଶ୍ୟକ ବୋଲି ସେ ଗୁରୁତ୍ୱ ଦେଇଥିଲେ।

ଭାରତ ରୁଷିଆ–ୟୁକ୍ରେନ ଯୁଦ୍ଧ ଶେଷ କରିବାକୁ ହେଉଥିବା ସମସ୍ତ ଶାନ୍ତି ପ୍ରୟାସକୁ ସମର୍ଥନ କରିଆସୁଛି ଏବଂ ଆଗକୁ ମଧ୍ୟ ସମର୍ଥନ କରିବ ବୋଲି ପ୍ରଧାନମନ୍ତ୍ରୀ ସ୍ପଷ୍ଟ କରିଥିଲେ।

ବୈଠକରେ ଭାରତ–ରୁଷିଆ ଦ୍ୱିପାକ୍ଷିକ ସମ୍ପର୍କ, ଅର୍ଥନୈତିକ ସହଯୋଗ ଏବଂ ବିଶ୍ୱସ୍ତରୀୟ ପ୍ରସଙ୍ଗ ଉପରେ ମଧ୍ୟ ଆଲୋଚନା ହୋଇଥିଲା। ଦୁଇ ଦେଶ ମଧ୍ୟରେ ବଢ଼ୁଥିବା ଅର୍ଥନୈତିକ ସମ୍ପର୍କକୁ ମୋଦି ପ୍ରଶଂସା କରିଥିଲେ।ପୁଟିନଙ୍କ ସହ ମୋଦିଙ୍କ ଏହି ବୈଠକ ଏଭଳି ସମୟରେ ହୋଇଛି, ଯେତେବେଳେ ରୁଷିଆ–ୟୁକ୍ରେନ ଯୁଦ୍ଧ ଜାରି ରହିଛି ଏବଂ ବିଶ୍ୱସ୍ତରରେ ଶାନ୍ତି ସ୍ଥାପନ ପାଇଁ କୂଟନୈତିକ ପ୍ରୟାସ ଉପରେ ନଜର ରହିଛି। ଭାରତ ପୁଣିଥରେ ଆଲୋଚନା ଓ କୂଟନୀତି ମାଧ୍ୟମରେ ସମସ୍ୟାର ସମାଧାନ ସପକ୍ଷରେ ନିଜ ଆଭିମୁଖ୍ୟ ସ୍ପଷ୍ଟ କରିଛି।