Trump Tells Supporters: "ମୁଁ ମୂର୍ଖ ଭଳି କଥା ହେଲେ ବି ତାଳି ମାରିବେ";ଟ୍ରମ୍ପ

ଆମେରିକାର ରାଜନୀତିରେ ନିଜ ବୟାନକୁ ନେଇ ପୁଣି ଚର୍ଚ୍ଚାରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ନିଜ ସମର୍ଥକଙ୍କୁ ସମ୍ବୋଧିତ କରି ସେ କହିଛନ୍ତି, ସେ ଯଦି ସବୁଠାରୁ ମୂର୍ଖ କଥା ମଧ୍ୟ କହିବେ, ତଥାପି ସମର୍ଥକମାନେ ତାଳି ମାରିବେ। ଟେନେସିର କ୍ଲାର୍କସଭିଲ୍‌ରେ ଆୟୋଜିତ ଏକ ରାଲିରେ ଟ୍ରମ୍ପଙ୍କ ଏହି ମନ୍ତବ୍ୟ ପରେ ସଭାସ୍ଥଳରେ ହସ ଓ ତାଳି ଶୁଣିବାକୁ ମିଳିଥିଲା। ରାଲିରେ ସମର୍ଥକଙ୍କ ଭଲପାଇବା ଓ ଉତ୍ସାହ ବିଷୟରେ କହିବାବେଳେ ଟ୍ରମ୍ପ ଏହି ମନ୍ତବ୍ୟ ଦେଇଥିଲେ। ତେବେ ସେ ତୁରନ୍ତ ସ୍ପଷ୍ଟ କରିଥିଲେ ଯେ, ସେ ମୂର୍ଖ କଥା କହନ୍ତି ନାହିଁ; ବରଂ ଯୁକ୍ତିଯୁକ୍ତ ଓ ସାଧାରଣ ବୁଦ୍ଧି ଆଧାରିତ କଥା କହନ୍ତି। ଅକ୍ଟୋବର ୧୦ ତାରିଖ ଶନିବାର, ନାଶଭିଲ୍‌ଠାରୁ ପ୍ରାୟ ୫୦ ମାଇଲ୍‌ ଦୂରରେ ଥିବା ଏଫ୍‌ ଆଣ୍ଡ୍‌ ଏମ୍‌ ବ୍ୟାଙ୍କ ଆରେନାରେ ଏହି ସଭା ହୋଇଥିଲା। ଆଗାମୀ ନଭେମ୍ବର ୩ରେ ମଧ୍ୟବର୍ତ୍ତୀ ନିର୍ବାଚନ ପୂର୍ବରୁ ରିପବ୍ଲିକାନ୍‌ ପ୍ରାର୍ଥୀଙ୍କ ସମର୍ଥନରେ ଟ୍ରମ୍ପ ଏହି ରାଲି କରିଥିଲେ।

ଭାଷଣ ଦେବା ସମୟରେ ଟ୍ରମ୍ପ ପ୍ରଶ୍ନ କରିଥିଲେ, ଯେ ଟେନେସିରେ ବିପୁଳ ଭୋଟ୍‌ ବ୍ୟବଧାନରେ ବିଜୟୀ ହେବାପରେ ସେଠାକୁ ପ୍ରଚାର ପାଇଁ ଯିବାର ଆବଶ୍ୟକତା କ’ଣ ଅଛି ? ତଥାପି ସମର୍ଥକଙ୍କୁ ଧନ୍ୟବାଦ ଦେବାକୁ ସେ ଏଠାକୁ ଆସିଥିବା କହିଥିଲେ। ଭାଷଣରେ ଟ୍ରମ୍ପ ସୀମା ସୁରକ୍ଷା, କମ୍‌ ଟିକସ ଏବଂ ଶକ୍ତିଶାଳୀ ସାମରିକ ବ୍ୟବସ୍ଥା ଉପରେ ଗୁରୁତ୍ୱ ଦେଇଥିଲେ। ଏହା ସହ ୨୦୨୦ ରାଷ୍ଟ୍ରପତି ନିର୍ବାଚନରେ ଅନିୟମିତତା ହୋଇଥିବା ନେଇ ନିଜର ପୂର୍ବ ଦାବିକୁ ପୁଣି ଦୋହରାଇଥିଲେ। ତେବେ ନିର୍ବାଚନ ଚୋରି ହୋଇଥିବା ତାଙ୍କ ଦାବିକୁ ସମର୍ଥନ କରିବା ପାଇଁ ପ୍ରମାଣ ମିଳିନାହିଁ। ରାଲିରେ ସମର୍ଥକଙ୍କ ପ୍ରତିକ୍ରିୟା ଏବଂ ଟ୍ରମ୍ପଙ୍କ ଏହି ମନ୍ତବ୍ୟ ଏବେ ରାଜନୈତିକ ମହଲରେ ଚର୍ଚ୍ଚାରେ ରହିଛି।