ମର୍ସିଡିଜ ଦୁର୍ଘଟଣା: ମଦ୍ୟପାନ କରି ଗାଡ଼ି ଚଳାଇବା ଅଭିଯୋଗରେ ଆଇନ ଛାତ୍ର ଗିରଫ

ଭୁବନେଶ୍ୱର: ଗତକାଲି ରାତିରେ ଘଟିଥିବା ମର୍ସିଡିଜ କାର ଦୁର୍ଘଟଣାରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିବା ବେଳେ କାର ଚଳାଉଥିବା ଯୁବକଙ୍କୁ ପୋଲିସ ଗିରଫ କରିଛି। ଗିରଫ ଯୁବକ ଜୟଦେବ ବିହାର ଅଞ୍ଚଳର ସୋମ୍ୟ ରଞ୍ଜନ ଏବଂ ସେ ଏକ ଘରୋଇ ବିଶ୍ୱବିଦ୍ୟାଳୟର ଆଇନ ଛାତ୍ର ବୋଲି ସୂଚନା ମିଳିଛି। ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ସୋମ୍ୟ ରଞ୍ଜନ ମଦ୍ୟପାନ କରି ଗାଡ଼ି ଚଳାଉଥିଲେ। ଦୁର୍ଘଟଣା ପରେ ସ୍ଥାନୀୟ ଲୋକମାନେ ତାଙ୍କୁ ଘେରି ଯାଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରିଥିଲା। ପରେ ମେଡିକାଲ ପରୀକ୍ଷାରେ ସେ ମଦ୍ୟପାନ କରିଥିବା ସ୍ପଷ୍ଟ ହୋଇଥିଲା। ଏହି ଘଟଣାକୁ ନେଇ ପୋଲିସ ସୋମ୍ୟ ରଞ୍ଜନଙ୍କ ବିରୋଧରେ 'କଲ୍‌ପେବଲ୍ ହୋମିସାଇଡ୍' (ମୃତ୍ୟୁ ପାଇଁ ଦାୟୀ ଅପରାଧ) ସମେତ ମଦ୍ୟପାନ କରି ଗାଡ଼ି ଚଳାଇବା ଭଳି ସଙ୍ଗୀନ ଦଫାରେ ମାମଲା ରୁଜୁ କରି ଗିରଫ କରିଛି। ପରେ ତାଙ୍କୁ କୋର୍ଟ ଚାଲାଣ କରାଯାଇଛି।

ଏହି ଘଟଣା ପରେ ପୋଲିସ କମିଶନର ଏସ୍. ଦେବଦତ୍ତ ସିଂହ ଅଭିଭାବକମାନଙ୍କୁ ସତର୍କ କରାଇ କହିଛନ୍ତି ଯେ, ପିଲାମାନଙ୍କୁ ଦାମୀ ଗାଡ଼ି ଦେବା ପୂର୍ବରୁ ସେମାନଙ୍କର ଦାୟିତ୍ୱବୋଧ ଏବଂ ଟ୍ରାଫିକ୍ ନିୟମ ପ୍ରତି ସଚେତନତାକୁ ଆଦି ବିଷୟରେ ନିଶ୍ଚିତ କରିବା ଆବଶ୍ୟକ।

ଏଥି ସହ ରାଜଧାନି ଭୁବନେଶ୍ବରରୁ ଆସିଛି ସାଂଘାତିକ ତଥ୍ୟ । ୨୦୨୫ ମସିହାରେ ମଦ୍ୟପାନ କରି ଗାଡ଼ି ଚଳାଇବା ଅଭିଯୋଗରେ ୯୨୫ଟି ଗାଡ଼ି ଜବତ କରାଯାଇ କୋର୍ଟ ଚାଲାଣ କରାଯାଇଥିଲା। କିନ୍ତୁ ୨୦୨୬ ମସିହାର ପ୍ରଥମ ୬ ମାସ ମଧ୍ୟରେ ଏଭଳି ମାମଲାରେ ୧୬୩୨ଟି ଗାଡ଼ି ଜବତ ହେବା ସହ ସମ୍ପୃକ୍ତ ଚାଳକମାନଙ୍କୁ ଗିରଫ କରାଯାଇଛି। ତେବେ, ପୋଲିସର କଡ଼ା ଯାଞ୍ଚ ସତ୍ତ୍ୱେ ମଦ୍ୟପାନ କରି ଗାଡ଼ି ଚଳାଇବା ଘଟଣା ବଢ଼ୁଥିବାରୁ ଏହା ସଡ଼କ ସୁରକ୍ଷା ପାଇଁ ଗୁରୁତର ଚିନ୍ତାର ବିଷୟ ପାଲଟିଛି।