୧୦ ବର୍ଷ ପରେ ଗାଁକୁ ଫେରିଲେ ଦୁବାଇରେ ବନ୍ଧା ପଡ଼ିଥିବା ହସ୍ତା ମହାନନ୍ଦ

ଟିଟିଲାଗଡ଼: ଦୀର୍ଘ ୧୦ ବର୍ଷ ପରେ ନିଜ ଜନ୍ମମାଟିକୁ ଫେରିଛନ୍ତି ବଲାଙ୍ଗୀର ଜିଲ୍ଲା ଟିଟିଲାଗଡ଼ ଥାନା ଅନ୍ତର୍ଗତ ଯଗୁଆ ଗାଁର ହସ୍ତା ମହାନନ୍ଦ (ଓରଫ ବିଶି)। ପରିବାରର ଅଭିଯୋଗ ଅନୁସାରେ, ମୁମ୍ବାଇରୁ ଦୁବାଇକୁ ତାଙ୍କୁ ନିଆଯାଇଥିଲା, ସେଠାରେ ବର୍ଷକାଳ ଧରି ଅଟକି ରହିଥିଲେ। ବିଭିନ୍ନ ସ୍ତରର ପ୍ରଶାସନିକ ପ୍ରୟାସ, ସମାଜସେବୀଙ୍କ ହସ୍ତକ୍ଷେପ ଏବଂ କେନ୍ଦ୍ର ସରକାରଙ୍କ ସହଯୋଗ ପରେ ସେ ଭାରତକୁ ଫେରି ନିଜ ଗାଁରେ ପହଞ୍ଚିଛନ୍ତି। ସୂଚନା ଅନୁସାରେ, ହସ୍ତା ମହାନନ୍ଦ ବୁରାବନ୍ଦ ଗାଁର ପ୍ରେମା ମହାନନ୍ଦଙ୍କୁ ପ୍ରେମ ବିବାହ କରିଥିଲେ। ବିବାହ ପରେ ଉଭୟେ ମୁମ୍ବାଇରେ ଶ୍ରମିକ ଭାବେ କାମ କରୁଥିଲେ। ପରେ ସେମାନଙ୍କର ତିନି ଝିଅ ଜନ୍ମ ହେବା ପରେ ଝିଅମାନଙ୍କୁ ଗାଁରେ ବୃଦ୍ଧ ମାତାପିତାଙ୍କ ପାଖରେ ଛାଡ଼ି ପୁଣି ମୁମ୍ବାଇ ଫେରିଥିଲେ। ପରିବାରର ଅଭିଯୋଗ ଅନୁଯାୟୀ, ମୁମ୍ବାଇରେ ଥିବା ସମୟରେ ସେଠାରେ ଜଣେ ସଂଖ୍ୟାଲଘୁ ପରିବାରର ହାତରେ ନିଜ ସ୍ତ୍ରୀ ହସ୍ତା ମହାନନ୍ଦକୁ ଟେକିଦେଇଥିଲା ସ୍ବାମୀ ପ୍ରେମା। ପରେ ହସ୍ତାଙ୍କୁ ମୁମ୍ବାଇରୁ ଦୁବାଇକୁ ନେଇଯାଇଥିଲେ ସେହି ପରିବାର। ଏହା ପରେ ସେ ଦୀର୍ଘ ୧୦ ବର୍ଷ ଧରି ଘରକୁ ଫେରିପାରିନଥିଲେ। ହସ୍ତାଙ୍କ କୌଣସି ସନ୍ଧାନ ନ ମିଳିବାରୁ ତାଙ୍କ ପରିବାର ଟିଟିଲାଗଡ଼ ପ୍ରଶାସନର ଦ୍ୱାରସ୍ଥ ହୋଇଥିଲେ।

ଏହି ଘଟଣାରେ ସମାଜସେବୀ ରଞ୍ଜୁ ରାୟମନ ହସ୍ତକ୍ଷେପ କରି ବିଭିନ୍ନ ପ୍ରଶାସନିକ ସ୍ତରରେ ଯୋଗାଯୋଗ କରିଥିଲେ। ଟିଟିଲାଗଡ଼ ଉପଜିଲ୍ଲାପାଳଙ୍କ ମାଧ୍ୟମରେ ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ପରେ ରାଜ୍ୟ ସରକାର କେନ୍ଦ୍ର ସରକାରଙ୍କ ଗୃହ ମନ୍ତ୍ରଣାଳୟର ସହଯୋଗ ଲୋଡ଼ିଥିଲେ। ଏମିତି କି ହସ୍ତାକୁ ଦୁବାଇରୁ ଫେରାଇ ଆଣିବା ନେଇ ରଞ୍ଜୁ ରାଏମନ ଓଡ଼ିଆ ହାଇକୋର୍ଟଙ୍କ ଦ୍ୱାରସ୍ତ ବି ହୋଇଥିଲେ l ପରବର୍ତ୍ତୀ ସମୟରେ କେନ୍ଦ୍ର ସରକାରଙ୍କ ସହଯୋଗରେ ହସ୍ତାଙ୍କୁ ଦୁବାଇରୁ ଭାରତ ଫେରାଇ ଆଣିବା ପ୍ରକ୍ରିୟା ସଫଳ ହୋଇଥିଲା। ନିଜ ଜନ୍ମମାଟିକୁ ଫେରିବା ପରେ ହସ୍ତା ମହାନନ୍ଦ ଭାରତ ସରକାର, ପ୍ରଶାସନ ଏବଂ ତାଙ୍କ ଉଦ୍ଧାରରେ ସହଯୋଗ କରିଥିବା ସମସ୍ତଙ୍କୁ କୃତଜ୍ଞତା ଜଣାଇଛନ୍ତି। ଏହି ଅବସରରେ ସମାଜସେବୀ ରଞ୍ଜୁ ରାୟମନ କହିଛନ୍ତି ଯେ, ରାଜ୍ୟର ଅନେକ ଦାଦନ ଶ୍ରମିକ, ବିଶେଷକରି ମହିଳାମାନେ ବାହାର ରାଜ୍ୟ ଓ ବିଦେଶକୁ ଯାଇ ବିଭିନ୍ନ ପ୍ରକାର ସମସ୍ୟା ଓ ନିର୍ଯାତନାର ସମ୍ମୁଖୀନ ହେଉଛନ୍ତି। ତେଣୁ ସରକାର ଦାଦନ ଶ୍ରମିକଙ୍କ ସଠିକ୍ ତଥ୍ୟ ସଂଗ୍ରହ କରିବା ସହ ଏଭଳି ପୀଡ଼ିତଙ୍କୁ ଚିହ୍ନଟ କରି ଉଦ୍ଧାର ପାଇଁ ଆହୁରି ସକ୍ରିୟ ପଦକ୍ଷେପ ନେବାକୁ ସେ ନିବେଦନ କରିଛନ୍ତି।