ଢେଙ୍କାନାଳରେ ମା' ବାଟମଙ୍ଗଳାଙ୍କ ମନ୍ଦିରରୁ ଲୁଟ: ସୁନା-ରୂପା ଅଳଙ୍କାର ନେଇ ଫେରାର ଦୁର୍ବୃତ୍ତ, ତଦନ୍ତ ଆରମ୍ଭ

ଢେଙ୍କାନାଳ: ଢେଙ୍କାନାଳ ସହରରେ ପୁଣି ସକ୍ରିୟ ହୋଇଛି ଦେବୀ-ଦେବତାଙ୍କ ଅଙ୍ଗଲାଗି ସୁନା ଅଳଙ୍କାର ଲୁଟେରା ରାକେଟ। ଟାଉନ ଥାନା ଅଞ୍ଚଳର ବାଜିଚୌକସ୍ଥିତ ପ୍ରସିଦ୍ଧ ମା' ବାଟମଙ୍ଗଳା ମନ୍ଦିରରେ ଚୋରି ଘଟଣା ଅଞ୍ଚଳବାସୀଙ୍କୁ ସ୍ତବ୍ଧ କରିଦେଇଛି। ଦୁର୍ବୃତ୍ତମାନେ ମନ୍ଦିରରେ ପଶି ଦେବୀଙ୍କ ଅଙ୍ଗଲାଗି ସୁନା ଓ ରୂପା ଅଳଙ୍କାର ଲୁଟି ନେଇଥିବା ଅଭିଯୋଗ ହୋଇଛି। ସୂଚନା ଅନୁଯାୟୀ, ଦୁର୍ବୃତ୍ତମାନେ ମା' ବାଟମଙ୍ଗଳାଙ୍କ ମକୁଟ, ଟିକିଲି, ପେଣ୍ଡି ସମେତ ଅନ୍ୟାନ୍ୟ ଅଙ୍ଗଲାଗି ସୁନା ଓ ରୂପା ଅଳଙ୍କାର ଚୋରି କରି ନେଇଛନ୍ତି। ଚୋରି ହୋଇଥିବା ଅଳଙ୍କାରର ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ପ୍ରାଥମିକ ଆକଳନ କରାଯାଉଛି। ସକାଳେ ମନ୍ଦିର ଖୋଲିବା ପରେ ଅଳଙ୍କାର ନଥିବା ଦେଖି ସେବାୟତ ଓ ସ୍ଥାନୀୟ ଲୋକେ ଟାଉନ ଥାନା ପୁଲିସକୁ ଖବର ଦେଇଥିଲେ। ଘଟଣାସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ଢେଙ୍କାନାଳ ଟାଉନ ଥାନା ଅଞ୍ଚଳରେ ଗତ କିଛି ଦିନ ଧରି ଦେବୀ-ଦେବତାଙ୍କ ଅଙ୍ଗଲାଗି ସୁନା ଅଳଙ୍କାର ଚୋରି ଘଟଣା ବାରମ୍ବାର ଘଟୁଥିବାରୁ ଏକ ସଂଗଠିତ ଚୋର ରାକେଟ ସକ୍ରିୟ ଥିବା ସନ୍ଦେହ କରାଯାଉଛି। ଏହି କ୍ରମାଗତ ଚୋରି ଘଟଣା ମନ୍ଦିର ପରିଚାଳନା କମିଟି ଓ ଭକ୍ତମାନଙ୍କ ମଧ୍ୟରେ ଉଦ୍‌ବେଗ ସୃଷ୍ଟି କରିଛି। ପୁଲିସ ମନ୍ଦିର ପରିସରର ସିସିଟିଭି ଫୁଟେଜ ଯାଞ୍ଚ କରିବା ସହ ସନ୍ଦିଗ୍ଧ ବ୍ୟକ୍ତିଙ୍କ ଗତିବିଧି ଉପରେ ନଜର ରଖିଛି। ଚୋରି ଘଟଣାରେ ସମ୍ପୃକ୍ତ ଦୁର୍ବୃତ୍ତଙ୍କୁ ଚିହ୍ନଟ କରି ଗିରଫ କରିବା ପାଇଁ ତଦନ୍ତ ଜୋରଦାର କରାଯାଇଛି।