Bribe Trap : ଭିଜିଲାନ୍ସ ଜାଲରେ ପ୍ରୋଗ୍ରାମର

ଓଡ଼ିଶା ଭିଜିଲାନ୍ସ ଆଜି ଜଗତସିଂହପୁରସ୍ଥିତ ଡିଇଓ-କମ୍-ଡିପିସି (ଜିଲ୍ଲା ପ୍ରକଳ୍ପ ସଂଯୋଜକ), ସମଗ୍ର ଶିକ୍ଷା ଅଭିଯାନ (SSA) କାର୍ଯ୍ୟାଳୟରେ କାର୍ଯ୍ୟରତ ପ୍ରୋଗ୍ରାମର ଚନ୍ଦ୍ରଜିତ ପରିଜାଙ୍କୁ ୩୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ଗିରଫ କରିଛି | “ଭିଜିଲାନ୍ସର ସୂଚନା ଅନୁଯାୟୀ, ପରୀଜା ଜଗତସିଂହପୁର ଜିଲ୍ଲାର ବିଭିନ୍ନ ସ୍କୁଲରେ ଡିଜିଟାଲ ବ୍ଲାକବୋର୍ଡ ଲଗାଇବା କାମ କରୁଥିବା ଜଣେ ଏକ୍ଜିକ୍ୟୁଟାଣ୍ଟଙ୍କଠାରୁ ବକେୟା ବିଲ୍‌ଗୁଡ଼ିକ ମଞ୍ଜୁର କରାଇବା ବଦଳରେ ୩୦ ହଜାର ଟଙ୍କା ଲାଞ୍ଚ ଦାବି କରିଥିଲେ |” କୁହାଯାଇଛି ଯେ, ଅଭିଯୁକ୍ତ ଚନ୍ଦ୍ରଜିତ ପରୀଜା କ୍ରୟ ଓ ବୈଷୟିକ କମିଟିର ସଦସ୍ୟ ଭାବେ ସ୍କୁଲଗୁଡ଼ିକରେ କରାଯାଇଥିବା ଡିଜିଟାଲ ବ୍ଲାକବୋର୍ଡ ସ୍ଥାପନ କାର୍ଯ୍ୟର ଯାଞ୍ଚ କରୁଥିଲେ | ତାଙ୍କ ଯାଞ୍ଚ ଓ ପ୍ରମାଣୀକରଣ ପରେ ହିଁ ସମ୍ପୃକ୍ତ ଏକ୍ଜିକ୍ୟୁଟାଣ୍ଟଙ୍କ ପକ୍ଷରେ ବିଲ୍ ଜାରି କରାଯିବାର ଥିଲା | ଅଭିଯୋଗକାରୀଙ୍କ କହିବା ଅନୁଯାୟୀ, କାମ ସମ୍ପୂର୍ଣ୍ଣ ହୋଇଥିଲେ ମଧ୍ୟ ବାରମ୍ବାର ଅନୁରୋଧ କରାଯିବା ସତ୍ତ୍ୱେ ଅଭିଯୁକ୍ତ ଯାଞ୍ଚ ପାଇଁ କୌଣସି ପଦକ୍ଷେପ ନେଉନଥିଲେ | ଏହାପରେ ବିଲ୍ ଜାରି କରାଇବା ପାଇଁ ସେ ୩୦ ହଜାର ଟଙ୍କା ଲାଞ୍ଚ ଦାବି କରିଥିବା ଅଭିଯୋଗ ହୋଇଥିଲା | ଲାଞ୍ଚ ଦାବିରେ ଅସନ୍ତୁଷ୍ଟ ହୋଇ ଅଭିଯୋଗକାରୀ ଏହି ଘଟଣା ସମ୍ପର୍କରେ ଭିଜିଲାନ୍ସ ଅଧିକାରୀଙ୍କୁ ଜଣାଇଥିଲେ | ଅଭିଯୋଗର ସତ୍ୟତା ଯାଞ୍ଚ ପରେ ଓଡ଼ିଶା ଭିଜିଲାନ୍ସ ଟିମ୍ ଜାଲ ବିଛାଇଥିଲା | ଆଜି ଚନ୍ଦ୍ରଜିତ ପରୀଜା ଅଭିଯୋଗକାରୀଙ୍କଠାରୁ ୩୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ଧରାପଡ଼ିଥିଲେ | ଭିଜିଲାନ୍ସ ଅଭିଯୁକ୍ତଙ୍କ କବଳରୁ ଲାଞ୍ଚର ସମ୍ପୂର୍ଣ୍ଣ ୩୦ ହଜାର ଟଙ୍କା ଉଦ୍ଧାର କରି ଜବତ କରିଛି | ଟ୍ରାପ କାର୍ଯ୍ୟାନୁଷ୍ଠାନ ପରେ ଅଭିଯୁକ୍ତଙ୍କ ତିନୋଟି ସ୍ଥାନରେ ଏକକାଳୀନ ଚଢ଼ଉ କରାଯାଉଛି | ଏହି ଚଢ଼ାଉ ଆୟଠାରୁ ଅଧିକ ସମ୍ପତ୍ତି (DA) ଦିଗକୁ ନଜରରେ ରଖି କରାଯାଉଛି | ଏହି ମାମଲାରେ କଟକ ଭିଜିଲାନ୍ସ ଥାନାରେ କେସ ନମ୍ବର ୩୯ , ଦୁର୍ନୀତି ନିବାରଣ ଆଇନ (P.C. Amendment Act, 2018) ର ଧାରା ୭ ଅନୁଯାୟୀ ମାମଲା ରୁଜୁ କରାଯାଇଛି | ଏହି ମାମଲାରେ ପୋଲିସ ତଦନ୍ତ ଜାରି ରହିଛି |