ପଞ୍ଚାୟତ ନିର୍ବାଚନ ପାଇଁ ବିଜେପି ପ୍ରସ୍ତୁତ, ସଂଗଠନ ସୁଦୃଢ଼ ହେଉଛି: ଭାସ୍କର ମଡ଼େଇ

ଭୁବନେଶ୍ୱର: ପଞ୍ଚାୟତ ନିର୍ବାଚନକୁ ନେଇ ନିର୍ବାଚନ କମିଶନଙ୍କ ବୈଠକ ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ବିଜେପି ବିଧାୟକ ଭାସ୍କର  ମଡ଼େଇ। ସେ କହିଛନ୍ତି, ବିଜେପି ପାଇଁ “୧୨ ମାସରେ ୧୩ ପର୍ବ” ଭଳି ସବୁବେଳେ ନିର୍ବାଚନୀ ପ୍ରସ୍ତୁତି ଚାଲିଥାଏ। ସରକାର ଗଠନ ପରଠାରୁ ହିଁ ପଞ୍ଚାୟତ ନିର୍ବାଚନ ପାଇଁ ଦଳ ପ୍ରକ୍ରିୟା ଆରମ୍ଭ କରିଛି। ବୁଥ୍, ପଞ୍ଚାୟତ ଓ ମଣ୍ଡଳ ସ୍ତରରେ କମିଟି ଗଠନ କରାଯାଇ ସଂଗଠନକୁ ଆହୁରି ମଜବୁତ କରାଯାଉଛି। ଆଗାମୀ ନିର୍ବାଚନ ପାଇଁ ବିଜେପି ଗ୍ରାଉଣ୍ଡ ଜିରୋରେ କାମ କରୁଛି ବୋଲି ସେ କହିଛନ୍ତି। ପୂର୍ବ ସରକାର ସମୟରେ ବ୍ୟାପକ କେଳେଙ୍କାରୀ ହୋଇଥିବା ଅଭିଯୋଗ କରି ଭାସ୍କର ମଡ଼େଇ କହିଛନ୍ତି, ବର୍ତ୍ତମାନ ବିଜେପି ଦଳ ଓ ସରକାର ଲୋକଙ୍କ ନିକଟକୁ ଯାଇ ବାସ୍ତବ ସ୍ଥିତି ବୁଝୁଛନ୍ତି। ବହି ଛାପା ଭୁଲ୍ ପ୍ରସଙ୍ଗରେ ମଧ୍ୟ ପ୍ରତିକ୍ରିୟା ରଖି ସେ ପ୍ରଶାସନିକ ଅଧିକାରୀଙ୍କ ଉପରେ ପ୍ରଶ୍ନ ଉଠାଇଛନ୍ତି। କିଛି ଅଧିକାରୀଙ୍କ ମଧ୍ୟରେ ଏବେ ବି ପୁରୁଣା ସରକାର ପ୍ରତି ମୋହ ରହିଥିବା ସେ ଅଭିଯୋଗ କରିଛନ୍ତି। ଏହାକୁ କେବଳ ଭୁଲ୍ ଭାବେ ନୁହେଁ, ବରଂ ପୂର୍ବ ସରକାରଙ୍କ କୌଣସି ଷଡ଼ଯନ୍ତ୍ର ବୋଲି ମଧ୍ୟ ଏଡ଼ାଇ ଦିଆଯାଇପାରିବ ନାହିଁ ବୋଲି ସେ କହିଛନ୍ତି। ତେବେ ଲୋକେ ଏହାକୁ ଠିକ୍ ଭାବେ ବୁଝିଛନ୍ତି ବୋଲି ବିଧାୟକ କହିଛନ୍ତି।