BCJD On GenZ: ‘ଜେନ୍-ଜିଙ୍କୁ କିଣିବାରେ ବିଫଳ ବିଜେପି’, ଇପ୍ସିତାଙ୍କ ବିସ୍ଫୋରକ ବୟାନ

କଲେଜ ନିର୍ବାଚନରେ ବିଜୁ ଛାତ୍ର ଜନତା ଦଳର ସଫଳତାକୁ ନେଇ ବିଜେପିକୁ ଟାର୍ଗେଟ କରିଛନ୍ତି ଛାତ୍ର ସଂଗଠନର ସଭାପତି ଇପ୍ସିତା ସାହୁ। ବିଜେପି ଜେନ୍-ଜିଙ୍କୁ କିଣିବାରେ ବିଫଳ ହୋଇଛି ବୋଲି କହିବା ସହ ଆଗାମୀ ପଞ୍ଚାୟତ ନିର୍ବାଚନରେ ମଧ୍ୟ ଯୁବପିଢ଼ି ଏହାର ଜବାବ ଦେବେ ବୋଲି ସେ ଦାବି କରିଛନ୍ତି।ଇପ୍ସିତାଙ୍କ କହିବା ଅନୁଯାୟୀ, ବିଜେପି ପକ୍ଷରୁ ଅନେକ ନିର୍ଯାତନା ଦିଆଯାଇଥିବା ସତ୍ତ୍ୱେ ଛାତ୍ରଛାତ୍ରୀଙ୍କ କଠିନ ପରିଶ୍ରମ ଯୋଗୁଁ ବିଜୁ ଛାତ୍ର ଜନତା ଦଳ ସଫଳତା ହାସଲ କରିଛି। ପୋଲିସ ଓ ଗୁଣ୍ଡାଙ୍କ ହସ୍ତକ୍ଷେପ ନଥିଲେ ଦଳ କଲେଜ ନିର୍ବାଚନରେ କ୍ଲିନ୍ ସୁଇପ୍ କରିଥାନ୍ତା ବୋଲି ସେ ଅଭିଯୋଗ କରିଛନ୍ତି।

ରେଭେନ୍ସା ବିଶ୍ୱବିଦ୍ୟାଳୟ, ରମାଦେବୀ ମହିଳା ବିଶ୍ୱବିଦ୍ୟାଳୟ ଓ କେନ୍ଦ୍ରାପଡ଼ା ଅଟୋନୋମସ୍ କଲେଜରେ ଦଳର ବିଜୟକୁ ସେ ଏକ ବଡ଼ ସଫଳତା ବୋଲି ଅଭିହିତ କରିଛନ୍ତି। ରାଜ୍ୟର ୧୦୦ରୁ ଅଧିକ କଲେଜରେ ବିଜୁ ଛାତ୍ର ଜନତା ଦଳ ବିଜୟୀ ହୋଇଥିବା ସେ ଦାବି କରିଛନ୍ତି। ଏଥିସହ ଅନେକ ମହିଳା ମହାବିଦ୍ୟାଳୟରେ ମଧ୍ୟ ଦଳ ସଫଳତା ପାଇଥିବା କହିଛନ୍ତି।

ଇପ୍ସିତା କହିଛନ୍ତି, ଏହି ବିଜୟ କେବଳ ଏକ ଛାତ୍ର ସଂଗଠନର ବିଜୟ ନୁହେଁ, ବରଂ ଯୁବପିଢ଼ିଙ୍କ ବିଜୟ। ଦିଲ୍ଲୀଠାରୁ ଓଡ଼ିଶା ପର୍ଯ୍ୟନ୍ତ ଜେନ୍-ଜି ବିଭିନ୍ନ ପ୍ରସଙ୍ଗରେ ନିଜର ଅସନ୍ତୋଷ ଓ ବିରୋଧ ପ୍ରକାଶ କରୁଛନ୍ତି। ଆଗାମୀ ପଞ୍ଚାୟତ ନିର୍ବାଚନରେ ମଧ୍ୟ ଯୁବପିଢ଼ି ବିଜେପିକୁ ଉଚିତ ଜବାବ ଦେବେ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। ଅନ୍ୟପଟେ, ଏବିଭିପିର କିଛି କର୍ମୀ ତାଙ୍କୁ ଆକ୍ରମଣ କରିଥିବା ଏବଂ ପୋଲିସ ତାଙ୍କୁ ଅଟକ ରଖିଥିବା ନେଇ ଇପ୍ସିତା ଅଭିଯୋଗ ଆଣିଛନ୍ତି। ରମାଦେବୀ ବିଶ୍ୱବିଦ୍ୟାଳୟର କୁଳପତିଙ୍କ ବିରୋଧରେ ମଧ୍ୟ ସେ ଅଭିଯୋଗ କରିଛନ୍ତି।

ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଜନ୍ମଦିନରେ କଲେଜ ନିର୍ବାଚନର ଏହି ସଫଳତା ତାଙ୍କ ପାଇଁ ଉପହାର ବୋଲି ଇପ୍ସିତା କହିଛନ୍ତି। ଆଗାମୀ ଦିନରେ ପ୍ରତ୍ୟେକ ନିର୍ବାଚନରେ ବିଜୁ ଛାତ୍ର ଜନତା ଦଳ ଏଭଳି ସଫଳତା ଦୋହରାଇବ ବୋଲି ସେ ଆଶା ପ୍ରକାଶ କରିଛନ୍ତି।