AAI Yatri Seva Abhiyan: ୨୪ ଦିନିଆ ଯାତ୍ରୀ ସେବା ଅଭିଯାନ- ସୁଖଦ ଅନୁଭୂତି ଦେଲା AAI

ଶେଷ ହେଲା ଯାତ୍ରୀ ସେବା ଅଭିଯାନ। ସେପ୍ଟେମ୍ୱର ୧୭ରୁ ଆରମ୍ଭ ହୋଇଥିବା ଏହି ଅଭିଯାନ ଆଜି ସରିଛି। ୨୪ ଦିନ ହେଲା ବିଭିନ୍ନ ବିମାନବନ୍ଦରରେ ସେବା, ସମ୍ମାନ ଓ ସୁବିଧା ଉଦ୍ଦେଶ୍ୟରେ ଏହି ଅଭିଯାନ ଆରମ୍ଭ କରିଥିଲା ଭାରତୀୟ ବିମାନସେବା ପ୍ରାଧିକରଣ (AAI)। ବିମାନବନ୍ଦରରେ ଯାତ୍ରୀଙ୍କ ସୁରକ୍ଷା, ସ୍ୱଛତା, ସହଜ ଓ ସୁବିଧାଜନକ ଯାତ୍ରାର ଅନୁଭବ ପ୍ରଦାନ କରିବା ତଥା ସେବାରେ ଗୁଣାବତ୍ତାକୁ ସୁଧାରିବା ଉଦ୍ଦେଶ୍ୟ ଥିଲା। ଟର୍ମିନାଲ ଭବନ, ପ୍ରତୀକ୍ଷାଳୟ ଓ ଶୌଚାଳୟର ସଫେଇ ଉପରେ ପ୍ରାଥମିକତା ଦିଆଯାଇଥିଲା। ଦିବ୍ୟାଙ୍ଗ ଓ ବରିଷ୍ଠ ନାଗରିକଙ୍କ ଲାଗି ହ୍ୱିଲଚେୟାର, ସୁଲଭ ମାର୍ଗ ଓ ପ୍ରାଥମିକତା ଭିତ୍ତିରେ ସହାୟତା ଦିଆଯିବା। ଓ୍ୱାଇଫାଇ, ମୋବାଇଲ ଚାର୍ଜିଂ ପଏଣ୍ଟ ଓ ଡିଜି ସେବାକୁ ଅଧିକ ଭଲ କରିବା ଥିଲା ଉଦ୍ଦେଶ୍ୟ। ସେବା, ସ୍ୱଛତା ଓ ହସହସ ମୁହଁରେ ସୁଗମ ଯାତ୍ରାର ଅନୁଭବ ଦେବାକୁ ଚାଲିଥିଲା ଏହି ଅଭିଯାନ। କର୍ମଚାରୀଙ୍କ ଭିତରେ ଶିଷ୍ଟାଚାରକୁ ପ୍ରାଥମିକତା ଦିଆଯାଇଛି। ଏ ସନ୍ଦର୍ଭରେ ଭୁବନେଶ୍ୱର ବିଜୁ ପଟ୍ଟନାୟକ ଆନ୍ତର୍ଜାତୀୟ ବିମାନବନ୍ଦର ନିର୍ଦ୍ଦେଶକ ପ୍ରସନ୍ନ ପ୍ରଧାନ କହିଛନ୍ତି, ଯାତ୍ରୀଙ୍କୁ ସମସ୍ତ ପ୍ରକାର ସୁବିଧା ଦେବାକୁ ବିମାନବନ୍ଦର କର୍ତ୍ତୃପକ୍ଷ ସଂକଳ୍ପବଦ୍ଧ। ସୁଖଦ ଯାତ୍ରାର ଅନୁଭବ ବିମାନବନ୍ଦରରେ ଯେଭଳି ଯାତ୍ରୀ ପାଇବେ, ତାହା ଥିଲା ପ୍ରାଥମିକତା। ବିମାନବନ୍ଦରରେ ପ୍ରକୃତି ଓ  ପରିବେଶ ସୁରକ୍ଷା ନେଇ ବି ଯାତ୍ରୀଙ୍କୁ ସଚେତନତା କରାଯାଇଥିଲା। ସ୍ୱଛ ବାତାବରଣ, ସୁବ୍ୟବସ୍ଥିତ ପାର୍କିଂ, ସିଟିଂ ବ୍ୟବସ୍ଥା ଓ ବିନା ପ୍ରତିବନ୍ଧକରେ କନେକ୍ଟିଭିଟିକୁ ସୁନିଶ୍ଚିତ କରାଯାଇଛି। ବରିଷ୍ଠ ନାଗରିକ, ମହିଳା ଓ ପିଲାଙ୍କ ଯାତ୍ରାକୁ ଅଧିକ ଆରାମଦାୟକ କରିବାକୁ ବିଶେଷ ଡେସ୍କ କରାଯାଇଛି। ଲମ୍ୱା ଲାଇନରୁ ଯାତ୍ରୀଙ୍କୁ ମୁକ୍ତି ଲାଗି ଡିଜି-ସେବାକୁ ଅଧିକ ପ୍ରୋତ୍ସାହିତ କରାଯାଇଥିଲା। ଏହି ଅଭିଯାନ ଅବସରରେ ଓଡ଼ିଶାର ସମୃଦ୍ଧ କଳା, ସଂସ୍କୃତି, ହସ୍ତଶିଳ୍ପ ଓ ପର୍ଯ୍ୟଟନକୁ ପ୍ରମୁଖ ଏଣ୍ଟ୍ରି ପଏଣ୍ଟରେ ପ୍ରଦର୍ଶିତ କରାଯାଇଥିଲା। ଯାତ୍ରୀଙ୍କ ଭିତରେ ଅତିଥି ଦେବୋ ଭବର ଭାବନାକୁ ଧ୍ୟାନରେ ରଖି ସ୍ଥାନୀୟ ସାଂସ୍କୃତିକ କାର୍ଯ୍ୟକ୍ରମର ଝଲକ ବି ପ୍ରସ୍ତୁତ କରାଯାଇଥିଲା।