୨କୋଟି ବୀମା ରାଶି ହଡ଼ପ ପାଇଁ ପ୍ରେମିକ ସହ ମିଶି ସ୍ୱାମୀକୁ ବିଷ ଦେଇ ମାରିଦେଲା

୨ କୋଟି ଟଙ୍କାର ବୀମା ପାଇଁ ସ୍ୱାମୀକୁ ମାରିଦେଲା। ତା ପୁଣି ପ୍ରେମିକ ସହ ମିଶି। କର୍ଣ୍ଣାଟକରୁ ଆସିଛି ଏଭଳି ଅଭାବନୀୟ ଘଟଣା। ବେଲଗାବିରେ ପୂର୍ବତନ ସୈନିକ ସନ୍ଦୀପ ମଞ୍ଜରଗି ମର୍ଡର ମାମଲାର ଖୁଲାସା କରିଛି ପୁଲିସ। ପତ୍ନୀ ସୁମା, ସୁମାର ପ୍ରେମିକ ପୁଣ୍ଡଲିକ ସମେତ ୯ ଜଣଙ୍କୁ ଗିରଫ କରିଛି ପୁଲିସ। ଆରମ୍ଭରୁ ମାମୁଲି ବାଇକ ଦୁର୍ଘଟଣାରେ ମୃତ୍ୟୁ ଲାଗୁଥିବା ମାମଲା ବାସ୍ତବରେ ଥିଲା ଏକ ସୁଚିନ୍ତିତ ଷଡ଼ଯନ୍ତ୍ର ଓ ଜଘନ୍ୟ ହତ୍ୟାକାଣ୍ଡ। ହସ୍ପିଟାଲ ଭିତରେ ହିଁ ପତ୍ନୀ ଓ ପ୍ରେମିକ ମିଶି ହତ୍ୟା କରିଦେଲେ। ଏ ହତ୍ୟାକାଣ୍ଡର ସତ୍ୟତା ପଦାକୁ ଆସିବା ପରେ ପୁରା କାହାଣୀ ବଦଳିଗଲା। ଏହି ମର୍ଡରକୁ ହାର୍ଟ-ଆଟାକ ରୂପ ଦେବାକୁ ହସ୍ପିଟାଲ ଓ ଲ୍ୟାବର କର୍ମଚାରୀଙ୍କୁ ଲାଞ୍ଚ ଦିଆଯାଇଥିଲା। ଯେମିତିକି ୨ କୋଟି ଟଙ୍କାର ବୀମା କ୍ଲେମ୍ କରାଯାଇପାରିବ। ପୁଲିସ ପୁରା ମାମଲାର ଖୁଲାସା କରିଛି। ମାର୍ଚ୍ଚ ୧୩ର ଘଟଣା। ସନ୍ଦୀପ ଏକ ମାମୁଲି ବାଇକ ଦୁର୍ଘଟଣାର ଶୀକାର ହୋଇଥିଲେ। ତାଙ୍କୁ ଆଗ ହୁକ୍କେରୀ ସରକାରୀ ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ପରେ ତାଙ୍କୁ ପତ୍ନୀ ସୁମା ଘାଟାପ୍ରଭାର ଜେଜି ହସ୍ପିଟାଲକୁ ସିଫ୍ଟ କରିଦେଲେ। ମାର୍ଚ୍ଚ ୧୫ରେ ଡାକ୍ତର ସନ୍ଦୀପଙ୍କୁ ମୃତ ଘୋଷିତ କରି ହାର୍ଟଆଟାକ କାରଣରୁ ଏହା ହୋଇଛି ବୋଲି ରିପୋର୍ଟ ଦେଲେ। ଏପରିକି ପୋଷ୍ଟମର୍ଟମ ରିପୋର୍ଟରେ ବି ଆରମ୍ଭରୁ କୁହାଗଲା, ଶରୀରରେ କୌଣସି ବିଷ ନାହିଁ ଆଉ ହୃଦଘାତରେ ମୃତ୍ୟୁ ହୋଇଛି। ଏ ପୁରା ମାମଲାକୁ ନେଇ ସନ୍ଦୀପଙ୍କ ପରିବାର ଆଶ୍ଚର୍ଯ୍ୟ ହୋଇଥିଲେ। କାରଣ ସନ୍ଦୀପ ପୁରା ସୁସ୍ଥ ଥିଲେ ଓ ଦୁର୍ଘଟଣାରେ ବି କୌଣସି ଗମ୍ଭୀର ଆଘାତ ଲାଗିନଥିଲା। ସେଥିଲାଗି ପୁଲିସକୁ ବି ଆରମ୍ଭରୁ କିଛି ସନ୍ଦେହ ଥିଲା। ଏହାରି ଭିତରେ ସୁମାର ପ୍ରେମିକ ପୁଣ୍ଡଲିକ ଡୋମ୍ୱର ସୋସିଆଲ ମିଡିଆରେ ଏକ ଅଜବ ଷ୍ଟାଟୟ ପୋଷ୍ଟ କରିଥିଲା। ଲେଖିଥିଲା, ଦୁର୍ଘଟଣାରେ ଆହତ ବ୍ୟକ୍ତିର ଅଚାନକ କେମିତି ମୃତ୍ୟୁ ହୋଇଗଲା। ଏହି ପୋଷ୍ଟ ପୁଲିସର ସନ୍ଦେହକୁ ସତରେ ବଦଳାଇଦେଲା। ପୁଲିସ ପୁଣ୍ଡଲିକକୁ ହେପାଜତକୁ ନେଇ ଜେରା ପରେ ପୁରା ଷଡ଼ଯନ୍ତ୍ର କଥା ଓଗାଳିଦେଇଥିଲା। ତଦନ୍ତରୁ ଜଣାପଡ଼ିଲା। ସନ୍ଦୀପ ଓ ପୁଣ୍ଡଲିକ ସାଙ୍ଗ ଥିଲେ। ଦୁହେଁ ମିଶି ଏକ ହୋଟେଲ ଆରମ୍ଭ କରିଥିଲେ। ଏହାରି ଭିତରେ ସନ୍ଦୀପର ପତ୍ନୀ ସୁମା ସହ ପୁଣ୍ଡଲିକର ପ୍ରେମସମ୍ପର୍କ ଗଢ଼ିଉଠିଥିଲା। ସନ୍ଦୀପ ନାଁରେ ୩ଟି ଅଲଗା ଅଲଗା କମ୍ପାନୀରୁ ପ୍ରାୟ ୨ କୋଟି ଟଙ୍କାର ବୀମା ପଲିସି ନେଇଥିଲେ। ଆଉ ଏହି ଟଙ୍କାକୁ ହଡ଼ପ କରିବାକୁ ସନ୍ଦୀପକୁ ରାସ୍ତାରୁ ହଟାଇବାକୁ ମର୍ଡର ପ୍ଲାନ କରିଥିଲେ। ସନ୍ଦୀପର ହସ୍ପିଟାଲରେ ଚିକିତ୍ସା ଚାଲିଥିଲା ବେଳେ ହସ୍ପିଟାଲ କର୍ମଚାରୀଙ୍କ ସହ ମିଶି ସନ୍ଦୀପ ସାଲାଇନରେ ବିଷ ମିଶାଇଥିଲେ। ଏହା ସହ ନିଦ ବଟିକା ବି ଦିଆଗଲା। ପୁଲିସ ତଦନ୍ତରେ ଏ କଥା ବି ସାମ୍ନାକୁ ଆସିଛି ଯେ, ପ୍ରମାଣ ନଷ୍ଟ କରିବାକୁ ବଡ଼ ଧରଣର ସେଟିଂ ହୋଇଥିଲା। ହସ୍ପିଟାଲ ଷ୍ଟାଫ, ଲ୍ୟାବ୍ କର୍ମଚାରୀ ଓ ସରକାରୀ ଅଧିକାରୀଙ୍କୁ ୩ଲକ୍ଷରୁ ଅଧିକ ଟଙ୍କା ଲାଞ୍ଚ ଦିଆଯାଇଥିଲା। ପୋଷ୍ଟମର୍ଟମ ଓ  ଫରେନସିକ ରିପୋର୍ଟରେ ଯେମିତି ବିଷ କଥା ସାମ୍ନାକୁ ନ ଆସେ। ପୁଲିସ ଏବେ ବିଷ ଡବା, ସିରିଞ୍ଜ, ମୋବାଇଲ ଫୋନ ସମେତ ଅନେକ ଆପତ୍ତିଜନକ ସାମଗ୍ରୀ ସିଜ୍ କରିଛି। ଗିରଫ ହୋଇଥିବା ବ୍ୟକ୍ତି ହେଲେ ପତ୍ନୀ ସୁମା, ପ୍ରେମିକ ପୁଣ୍ଡଲିକ, ଆରଏମସି ଡାକ୍ତର ବସବରାଜ ଭସ୍ମେ, ଏଫଡିଏ ଅଧିକାରୀ ଅଶୋକ ଗୁଜନାଲ, ଏଫଏସଏଲ କିରାଣୀ ଅପ୍ପାସାହେବ ନାଏକ, ଲ୍ୟାବ୍ ଆସିଷ୍ଟାଣ୍ଟ ଚନ୍ୟାୟା, ସିନିୟର ସାଇଣ୍ଟିଫିକ ଅଫିସର ପିଏନ ନାଗରାଜ ଓ ପୁଣ୍ଡଲିକର ଦୁଇ ସାଙ୍ଗ।