ଦିଲ୍ଲୀ ସରକାରଙ୍କ ବଡ ଘୋଷଣା, ପବ୍ଲିକ ଟ୍ରାନ୍ସପୋର୍ଟ ବ୍ୟବାହର କଲେ କର୍ମଚାରୀଙ୍କୁ ମିଳିବ ପ୍ରୋତ୍ସାହନ ଭତ୍ତା

ନୂଆଦିଲ୍ଲୀ: ସରକାରୀ କର୍ମଚାରୀଙ୍କ ପାଇଁ ଏକ ଖୁସିର ଖବର । ଦିଲ୍ଲୀ ସରକାର ଇନ୍ଧନ ସଞ୍ଚୟ, ପ୍ରଦୂଷଣ ହ୍ରାସ ଏବଂ ପବ୍ଲିକ ଟ୍ରାନ୍ସପୋର୍ଟକୁ ବଢାଇବା ପାଇଁ ଏକ ନୂଆ ଯୋଜନା ଆରମ୍ଭ କରିଛନ୍ତି। ଏହି ଯୋଜନା ଅନୁଯାୟୀ, ସରକାରୀ କର୍ମଚାରୀମାନେ ଯଦି ନିଜର ବ୍ୟକ୍ତିଗତ ଗାଡ଼ି ଛାଡ଼ି ଦିଲ୍ଲୀ ମେଟ୍ରୋ କିମ୍ବା ଦିଲ୍ଲୀ ଟ୍ରାନ୍ସପୋର୍ଟ କର୍ପୋରେସନ ବସ୍ ବ୍ୟବହାର କରି ଅଫିସକୁ ଯାଆନ୍ତି, ତେବେ ସେମାନଙ୍କୁ ଅତିରିକ୍ତ ପ୍ରୋତ୍ସାହନ ଭତ୍ତା ମିଳିବ। ଦିଲ୍ଲୀ ସରକାର ନିଷ୍ପତ୍ତି ନେଇଛି ଯେ, ଯେଉଁ ସରକାରୀ କର୍ମଚାରୀମାନେ ମାସିକ ପରିବହନ ଭତ୍ତାର କମ୍ ସେ କମ୍ ୨୫ ପ୍ରତିଶତ ରାଶି କମନ ମୋବିଲିଟି କାର୍ଡ କିମ୍ବା ସାର୍ବଜନୀନ ପରିବହନରେ ବ୍ୟୟ କରିବେ, ସେମାନେ ଯୋଗ୍ୟ ହେବେ। ଏହା ପରେ ସେମାନଙ୍କୁ ମୋଟ ପରିବହନ ଭତ୍ତାର ୧୦ ପ୍ରତିଶତ ସମାନ ଅତିରିକ୍ତ ରାଶି ପ୍ରତିମାସ ଦରମା ସହିତ ଦିଆଯିବ। ଏହି ଯୋଜନା ଦିଲ୍ଲୀ ସରକାରଙ୍କ କର୍ମଚାରୀଙ୍କ ପାଇଁ ରହିଛି । ଏହି ଯୋଜନା ବର୍ତ୍ତମାନ ଛଅ ମାସର ପ୍ରାରମ୍ଭିକ ଅବଧି ପାଇଁ କାର୍ଯ୍ୟକାରୀ ହେଉଛି । ଏହାଛଡା ଦିଲ୍ଲୀ ସରକାରଙ୍କ ଅଧିନରେ ଆସୁଥିବା ସମସ୍ତ ସରକାରୀ କର୍ମଚାରୀ, ବୋର୍ଡ, ସୋସାଇଟି ଏବଂ ଅନୁଦାନପ୍ରାପ୍ତ ସଂସ୍ଥାର କର୍ମଚାରୀ ନିୟମ ଅନୁସାରେ ଲାଭ ଉଠାଇପାରିବେ । ଗତ ମାସରେ ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା “ମୋ ଭାରତ, ମୋର ଅବଦାନ” ନାମରେ ୯୦ ଦିନିଆ ଇନ୍ଧନ ସଞ୍ଚୟ ଅଭିଯାନ ଆରମ୍ଭ କରିଥିଲେ। ଯାହା ଅଧୀନରେ କର୍ମଚାରୀମାନେ ସାପ୍ତାହିକ ଦୁଇ ଦିନ ଘରୁ କାମ କରିବା ଏବଂ ସାର୍ବଜନୀନ ପରିବହନ ବ୍ୟବହାର କରିବାକୁ ବାଧ୍ୟତାମୂଳକ ବୋଲି ମଧ୍ୟ ଘୋଷଣା କରାଯାଇଥିଲା