ଟିଏମସିରେ ବିଦ୍ରୋହ,ମମତାଙ୍କୁ ଚରମ ବାଣୀ ଶୁଣାଇଲେ ସାଂସଦ କଲ୍ୟାଣ ବାନାର୍ଜୀ

କଲକାତା : ତୃଣମୂଳ କଂଗ୍ରେସ (TMC) ମଧ୍ୟରେ ଚାଲିଥିବା ଆଭ୍ୟନ୍ତରୀଣ ବିଦ୍ରୋହ ମଧ୍ୟରେ, ସାଂସଦ ତଥା ବରିଷ୍ଠ ଆଇନଜୀବୀ କଲ୍ୟାଣ ବାନାର୍ଜୀ ଦଳର ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କ ଉପରେ ବର୍ଷିଛନ୍ତି। ଏକ ସ୍ଵାକ୍ଷର ଜାଲିଆତି ମାମଲାରେ ଅଭିଷେକ ନିଜର ଓକିଲ ବଦଳାଇବାକୁ ନେଇ କଲ୍ୟାଣ ବାନାର୍ଜୀ ଗଭୀର ଅସନ୍ତୋଷ ବ୍ୟକ୍ତ କରିଛନ୍ତି । କଲକାତାରେ ସାମ୍ବାଦିକମାନଙ୍କ ସହ ଆଲୋଚନା ବେଳେ କଲ୍ୟାଣ ବାନାର୍ଜୀ ଟିଏମସି ସୁପ୍ରିମୋ ମମତା ବାନାର୍ଜୀଙ୍କୁ ଚରମବାଣୀ ଶୁଣାଇଛନ୍ତି । ସେ ମମତାଙ୍କୁ ତାଙ୍କୁ କିମ୍ବା ଭଣଜା ଅଭିଷେକ ବାନାର୍ଜୀଙ୍କ ମଧ୍ୟରୁ ଜଣକୁ ବାଛିବା ପାଇଁ କହିଛନ୍ତି। ଦଳର ଜଣେ ପୁରୁଣା ତଥା ବିଶ୍ୱସ୍ତ ନେତା ଭାବେ ଜଣାଶୁଣା କଲ୍ୟାଣ ବାନାର୍ଜୀ, ଅଭିଷେକଙ୍କୁ 'ଅହଂକାରୀ' ବୋଲି କହିବା ସହ ତାଙ୍କ ଯୋଗୁଁ ହିଁ ଦଳ ଆଜି ଏଭଳି ଦ୍ୱନ୍ଦ୍ୱ ଦେଇ ଗତି କରୁଛି ବୋଲି ଅଭିଯୋଗ କରିଛନ୍ତି। କଲ୍ୟାଣ ବାନାର୍ଜୀ କହିଛନ୍ତି "ଗୋଟିଏ କ୍ରିମିନାଲ୍ ରିଭିଜନ୍ ପିଟିସନ୍ ଦାଖଲ କରାଯାଇଥିଲା, ଯାହା ଶୁକ୍ରବାର ଭାକେସନ୍ ବେଞ୍ଚରେ ଶୁଣାଣି ପାଇଁ ତାଲିକାଭୁକ୍ତ ହୋଇଥିଲା। ସେହି ମାମଲା ପାଇଁ ମୁଁ ୬ ଘଣ୍ଟା ବସି ରହିଲି। ମାମଲାର ଶୁଣାଣି ନ ହେବାରୁ ଶେଷରେ ମୁଁ ବିଚାରପତିଙ୍କ ସମ୍ମୁଖରେ ଏହା ଉପସ୍ଥାପନ କଲି। ବିଚାରପତି କହିଲେ ଯେ ବୁଧବାର ଏହି ମାମଲା ଆସିବ। ମଙ୍ଗଳବାର ଦିନ ତଲାସୀ କରାଯାଇଥିଲା, ତା’ପରେ ଗତକାଲି ସକାଳେ ମୁଁ କୋର୍ଟରେ ଏହି ମାମଲା ଅତ୍ୟନ୍ତ ଜରୁରୀ ବୋଲି ଦର୍ଶାଇଥିଲି। କିନ୍ତୁ ଗତକାଲି ଜଣେ ଓକିଲ ଆସି କହିଲେ ଯେ ତାଙ୍କୁ ଅଭିଷେକ ବାନାର୍ଜୀ ପଠାଇଛନ୍ତି। ତା’ପରେ କୁହାଗଲା ଯେ ତଲାସୀ ସମ୍ପର୍କରେ ଆଉ ଏକ ରିଟ୍ ପିଟିସନ୍ ଦାଖଲ କରାଯାଇଛି।"ସେ ଆହୁରି କହିଛନ୍ତି ମାମଲାଟିକୁ ଜଣେ ବ୍ୟକ୍ତି ସମ୍ଭାଳିବା ଭଲ। ଯଦି ଆପଣ ଭାବୁଛନ୍ତି ମୁଁ ଏହାକୁ ସମ୍ଭାଳି ପାରିବି ନାହିଁ, ତେବେ ଆପଣ ମାମଲାଟି ନିଜ ହାତକୁ ନିଅନ୍ତୁ, କିନ୍ତୁ ମତେ ଗୋଟିଏ ଡଷ୍ଟବିନ୍ ଭଳି ବ୍ୟବହାର କରନ୍ତୁ ନାହିଁ। ମତେ ଏକ ଘଣ୍ଟା ମଧ୍ୟରେ ଜଣାନ୍ତୁ। ଆଜି ମୋ ପୁଅ ମତେ ଜଣାଇଲା ଯେ ମୁଁ ଆଉ କୋର୍ଟରେ ହାଜର ହେବି ନାହିଁ। ଏଣିକି ମୁଁ ଅଭିଷେକ ବାନାର୍ଜୀଙ୍କ ପକ୍ଷରୁ କୌଣସି ମାମଲାରେ ହାଜର ହେବି ନାହିଁ। ମୁଁ ଏଭଳି ଅହଂକାରୀ ମନୋଭାବ ପସନ୍ଦ କରେ ନାହିଁ। ସିନିୟରମାନଙ୍କୁ ସମ୍ମାନ ଦେବା ଉଚିତ। ସେ ମତେ କେମିତି ଅପମାନିତ କରିପାରିବେ?"ମମତା ବାନାର୍ଜୀଙ୍କୁ ଅନୁରୋଧ କରି କଲ୍ୟାଣ ବାନାର୍ଜୀ କହିଛନ୍ତି ତାଙ୍କୁ ବୁଝିବା ଉଚିତ ଯେ ତାଙ୍କ ଯୋଗୁଁ ହିଁ ଦଳ ସମସ୍ୟାର ସମ୍ମୁଖୀନ ହେଉଛି। କିନ୍ତୁ ସେ ସମସ୍ତଙ୍କୁ ଅସମ୍ମାନ କରିଚାଲିଛନ୍ତି। ଏହା ସହ୍ୟ କରାଯାଇପାରିବ ନାହିଁ। ମୁଁ ଦିଦିଙ୍କୁ ଅନୁରୋଧ କରିବି,ଯଦି ଆପଣ ଅଭିଷେକ ବାନାର୍ଜୀଙ୍କ ଉପରେ ନିର୍ଭର କରି ରହିବାକୁ ଚାହାଁନ୍ତି, ତେବେ ତାଙ୍କ ସହ ରୁହନ୍ତୁ ମତେ ଛାଡ଼ି ଦିଅନ୍ତୁ। କିନ୍ତୁ ଯଦି ଆପଣ ଅଭିଷେକଙ୍କଠାରୁ ଅଲଗା ହେବେ, ତେବେ ମୁଁ ଆପଣଙ୍କ ସହ ଅଛି । କଲ୍ୟାଣ ବାନାର୍ଜୀ ସ୍ପଷ୍ଟ କରିଛନ୍ତି ଯେ ସେ ବରିଷ୍ଠ ଟିଏମସି ନେତା ଡେରେକ୍ ଓ'ବ୍ରାଏନଙ୍କ ସହ କଥା ହୋଇଛନ୍ତି, କିନ୍ତୁ ମମତା ବାନାର୍ଜୀ ଏପର୍ଯ୍ୟନ୍ତ ତାଙ୍କୁ ଫୋନ୍ କରିନାହାଁନ୍ତି। ସେ କହିଛନ୍ତି, ମୁଁ ଅନ୍ୟମାନଙ୍କ ଏବଂ ତୃଣମୂଳ କଂଗ୍ରେସର ସମସ୍ତ କେଶ ବୁଝିବି। ଅଭିଷେକ ବାନାର୍ଜୀ ଏକା ତୃଣମୂଳ କଂଗ୍ରେସ ନୁହଁନ୍ତି।