Tibet Earthquake : ତିବ୍ବତରେ ଭୂମିକମ୍ପର କରୁଣ ଦୃଶ୍ୟ!

ତିବ୍ବତରେ ୭.୦ ତୀବ୍ରତାର ଏକ ଶକ୍ତିଶାଳୀ ଭୂମିକମ୍ପ ହୋଇଛି। ଏହି ଭୂମିକମ୍ପରେ ଏପର୍ଯ୍ୟନ୍ତ ୧୬ ଜଣଙ୍କ ମୃତ୍ୟୁ ହୋଇଥିବାବେଳେ ୩୨ ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୧୧ ଜଣଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି। ଭୂମିକମ୍ପର ପ୍ରବଳ ଝଟକା ଅନୁଭୂତ ହେବା ମାତ୍ରେ ସମଗ୍ର ଅଞ୍ଚଳରେ ଆତଙ୍କ ଖେଳିଯାଇଥିଲା। ଜୀବନ ବଞ୍ଚାଇବା ପାଇଁ ଲୋକମାନେ ଘର ଓ ହୋଟେଲରୁ ବାହାରକୁ ଦୌଡ଼ି ପଳାଇଥିଲେ। ଗତ ରାତିରେ ତିବ୍ବତରେ ଏହି ଶକ୍ତିଶାଳୀ ଭୂମିକମ୍ପ ଯୋଗୁଁ ବ୍ୟାପକ ଧନଜୀବନ ହାନି ହୋଇଛି। ମିଳିଥିବା ସୂଚନା ଅନୁସାରେ, ଭୂମିକମ୍ପରେ ଅନେକ ଘର ଭାଙ୍ଗିଯାଇଛି ଏବଂ ବହୁ ଲୋକ ଆହତ ହୋଇଛନ୍ତି।

୧୭୩ କିଲୋମିଟର ଗଭୀରତାରେ ଥିଲା ଭୂମିକମ୍ପର କେନ୍ଦ୍ର

ନ୍ୟାସନାଲ ସେଣ୍ଟର ଫର୍ ସିସ୍ମୋଲୋଜି (NCS) ଅନୁଯାୟୀ, ଭାରତୀୟ ସମୟ ରାତି ପ୍ରାୟ ୮ଟା ୦୩ ମିନିଟ୍ରେ ଭୂମିକମ୍ପ ହୋଇଥିଲା। ଏହାର କେନ୍ଦ୍ର ତିବ୍ବତର ରାଜଧାନୀ ଲ୍ହାସାଠାରୁ ପ୍ରାୟ ୪୦୦ କିଲୋମିଟର ଦୂରରେ ଥିବା ଉତ୍ତର ତିବ୍ବତର ନାଗକୁ ସହରରେ ଥିଲା। ଭୂପୃଷ୍ଠଠାରୁ ପ୍ରାୟ ୧୭୩ କିଲୋମିଟର ଗଭୀରତାରେ ଭୂମିକମ୍ପର କେନ୍ଦ୍ର ରହିଥିଲା।

ନାଗକୁ ସହରରେ ଶହ ଶହ ଘର ଭୁଶୁଡ଼ିଲା

ଭୂମିକମ୍ପର ଝଟକା ଅନୁଭୂତ ହେବା ମାତ୍ରେ ଲୋକଙ୍କ ମଧ୍ୟରେ ଭୟ ଓ ଆତଙ୍କ ସୃଷ୍ଟି ହୋଇଥିଲା। ଘର ଓ ଗାଡ଼ିଗୁଡ଼ିକ ଦୋହଲିବାକୁ ଲାଗିଥିଲା। ଲୋକମାନେ ଜୀବନ ବଞ୍ଚାଇବା ପାଇଁ ଘର ଓ ହୋଟେଲ ଛାଡ଼ି ଖୋଲା ସ୍ଥାନକୁ ଦୌଡ଼ି ପଳାଇଥିଲେ। ସିସିଟିଭି ଫୁଟେଜ୍ ରେ ଦୋକାନ ଭିତରେ ର୍ୟାକ୍ରେ ରଖାଯାଇଥିବା ସାମଗ୍ରୀ ତଳେ ପଡ଼ିଯାଉଥିବାର ଦୃଶ୍ୟ କଏଦ ହୋଇଛି। ଭୂମିକମ୍ପର ପ୍ରଭାବରେ ଉତ୍ତର ତିବ୍ବତର ନାଗକୁ ସହରରେ ଶହ ଶହ ଘର ଭୁଶୁଡ଼ି ପଡ଼ିଛି।

୫ ବର୍ଷ ମଧ୍ୟରେ ତିବ୍ବତର ସବୁଠାରୁ ବଡ଼ ଭୂମିକମ୍ପ

ଗତ ୫ ବର୍ଷ ମଧ୍ୟରେ ତିବ୍ବତ ଅଞ୍ଚଳରେ ଏହା ସବୁଠାରୁ ବଡ଼ ଭୂମିକମ୍ପ ବୋଲି କୁହାଯାଉଛି। ନାଗକୁ ମିଡିଆ କାର୍ଯ୍ୟାଳୟ ସହର ସରକାରୀ ଅଧିକାରୀଙ୍କ ସୂଚନାକୁ ଉଦ୍ଧୃତ କରି କହିଛି ଯେ, ଭୂମିକମ୍ପ ପରେ ଅତି କମ୍ରେ ୩୩୯ଟି ଘର ଭୁଶୁଡ଼ି ପଡ଼ିଛି।ଭଗ୍ନାବଶେଷ ତଳେ ଫସି ରହିଥିବା ଲୋକଙ୍କୁ ଖୋଜିବା ଏବଂ ଉଦ୍ଧାର କରିବା ପାଇଁ ଅଭିଯାନ ଜାରି ରହିଛି। ଘର ହରାଇଥିବା ଲୋକଙ୍କ ରହିବା ପାଇଁ ଅସ୍ଥାୟୀ ଟେଣ୍ଟ୍ର ବ୍ୟବସ୍ଥା ମଧ୍ୟ କରାଯାଉଛି।

ନିକଟରେ ବନ୍ୟାରେ ପ୍ରଭାବିତ ହୋଇଥିଲା ଏହି ଅଞ୍ଚଳ

ତିବ୍ବତରେ ଏହି ଭୂମିକମ୍ପ ଏପରି ଏକ ସମୟରେ ହୋଇଛି, ଯେତେବେଳେ କିଛି ସପ୍ତାହ ପୂର୍ବରୁ ନେପାଳ ଓ ଚୀନ୍ର ତିବ୍ବତ ସ୍ୱାୟତ୍ତଶାସିତ ଅଞ୍ଚଳର ସୀମା ନିକଟରେ ବନ୍ୟା ଏବଂ ଭୂସ୍ଖଳନ ବ୍ୟାପକ କ୍ଷୟକ୍ଷତି ଘଟାଇଥିଲା। ଏହି ପ୍ରାକୃତିକ ବିପର୍ଯ୍ୟୟରେ ୧,୪୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ଏବଂ ହଜାର ହଜାର ଲୋକ ନିଖୋଜ ଥିବା ଖବର ମିଳିଥିଲା।

ତିବ୍ବତରେ କାହିଁକି ବାରମ୍ବାର ଭୂମିକମ୍ପ ହୁଏ?

ତିବ୍ବତ ବିଶ୍ୱର ଏପରି ଏକ ଅଞ୍ଚଳ, ଯେଉଁଠାରେ ଭୂମିକମ୍ପ ହେବାର ଆଶଙ୍କା ଅଧିକ ରହିଛି। ଏହାର ମୁଖ୍ୟ କାରଣ ହେଉଛି ଭାରତୀୟ ଟେକ୍ଟୋନିକ୍ ପ୍ଲେଟ୍ ଏବଂ ୟୁରେସିଆନ୍ ଟେକ୍ଟୋନିକ୍ ପ୍ଲେଟ୍ ମଧ୍ୟରେ ଧକ୍କା।ଏହି ଦୁଇଟି ପ୍ଲେଟ୍ର ନିରନ୍ତର ଗତି ଓ ପରସ୍ପର ଉପରେ ଚାପ ସୃଷ୍ଟି ହେବା ଯୋଗୁଁ ହିମାଳୟ ପର୍ବତମାଳାର ସୃଷ୍ଟି ହୋଇଛି। ଏହି ଭୂଗର୍ଭୀୟ ଗତିବିଧି ଯୋଗୁଁ ତିବ୍ବତ ଏବଂ ଏହାର ଆଖପାଖ ଅଞ୍ଚଳରେ ବାରମ୍ବାର ଭୂମିକମ୍ପ ହୋଇଥାଏ।ଏହା ପୂର୍ବରୁ ତିବ୍ବତ ସୀମା ନିକଟ ପଶ୍ଚିମ ନେପାଳର ହିମଲୁଙ୍ଗ ହିମାଳର ବେସ୍ କ୍ୟାମ୍ପରେ ହିମସ୍ଖଳନ ଘଟିଥିବା ଖବର ମିଳିଥିଲା। ଏହି ଘଟଣାରେ ୧୦ ଜଣ ନିଖୋଜ ହୋଇଯାଇଥିଲେ।