ପାଠ୍ୟପୁସ୍ତକ ତ୍ରୁଟି ପ୍ରସଙ୍ଗରେ ବଡ଼ କାର୍ଯ୍ୟାନୁଷ୍ଠାନ, ୪ ଅଧିକାରୀ ନିଲମ୍ବିତ ।

ପ୍ରାଥମିକ ପାଠ୍ୟପୁସ୍ତକରେ ତ୍ରୁଟି ପ୍ରସଙ୍ଗରେ ବଡ଼ କାର୍ଯ୍ୟାନୁଷ୍ଠାନ । ମାମଲାରେ ସରକାରଙ୍କ ବଡ଼ ପଦକ୍ଷେପ। ତଦନ୍ତ ରିପୋର୍ଟ ପରେ ୪ ଅଧିକାରୀ ନିଲମ୍ବିତ, ୬ ଜଣଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ। ଉନ୍ନୟନ କମିଶନରଙ୍କ ଅଧ୍ୟକ୍ଷତାରେ ଗଠିତ ତଦନ୍ତ କମିଟି ରିପୋର୍ଟ ଆଧାରରେ ଶିକ୍ଷକ ଶିକ୍ଷା ଓ SCERTର ତତ୍କାଳୀନ ନିର୍ଦ୍ଦେଶକ ମନୋଜ ପାଢ଼ୀଙ୍କ ସହ ତିନି ଜଣ ସହକାରୀ ନିର୍ଦେଶକ ପ୍ରଲିପ୍ତା ମିଶ୍ର, ଦିଲୀପ କୁମାର ସାହୁ, ଓ ଭାରତୀ ଟୁଡୁଙ୍କୁ ନିଲମ୍ବିତ କରାଯାଇଛି। ଏହା ସହ ଆଉ ୬ ଜଣ ସହକାରୀ ନିର୍ଦେଶକଙ୍କ ଉପରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏମାନେ ହେଲେ ବନ୍ଦିତା ପଟ୍ଟନାୟକ, ମାନସ ରଞ୍ଜନ ରାଉତ, ମନୋରଞ୍ଜନ ମହାପାତ୍ର, ଡକ୍ଟର ପ୍ରଶାନ୍ତ କୁମାର ସାହୁ, ମାନସ କୁମାର ନାୟକ ଏବଂ ଡକ୍ଟର ସୁଦର୍ଶନ ସନ୍ତରା ।  ଏହା ସହ ଭବିଷ୍ୟତରେ ଏଭଳି ତ୍ରୁଟି ଏଡ଼ାଇବା ପାଇଁ ୧୪ଟି ସଂସ୍କାରମୂଳକ ସୁପାରିଶ କାର୍ଯ୍ୟକାରୀ କରିବାକୁ ସରକାର ନିଷ୍ପତ୍ତି ନେଇଛନ୍ତି। ସରକାର ଏହା ମଧ୍ୟ ବାଧ୍ୟତାମୂଳକ କରିଛନ୍ତି ଯେ ଭାଷା, ଚିତ୍ରଣ, ତଥ୍ୟଗତ ସଠିକତା ଏବଂ ମୁଦ୍ରଣ ଗୁଣବତ୍ତା ସମ୍ବନ୍ଧୀୟ ସମସ୍ତ ଆବଶ୍ୟକୀୟ ଅନୁମୋଦନ ବିନା କୌଣସି ସ୍କୁଲ ପାଠ୍ୟପୁସ୍ତକ ମୁଦ୍ରଣ ପ୍ରେସକୁ ପଠାଯିବ ନାହିଁ।  ସେମାନେ ଏହା ମଧ୍ୟ ନିଶ୍ଚିତ କରିଛନ୍ତି ଯେ ଭବିଷ୍ୟତରେ କୌଣସି ପାଠ୍ୟପୁସ୍ତକକୁ ଚୂଡ଼ାନ୍ତ ଶିକ୍ଷାଗତ, ଭାଷା, ତଥ୍ୟ-ପ୍ରତିଛବି ଏବଂ ଉତ୍ପାଦନ କ୍ଲିୟରାନ୍ସ ବିନା ମୁଦ୍ରଣ ପାଇଁ ନିଆଯିବ ନାହିଁ।