ବିଜେଡିର ବରିଷ୍ଠ ଯୁବନେତା, ପୂର୍ବତନ ମନ୍ତ୍ରୀ ସୁଶାନ୍ତ ସିଂଙ୍କର ଦେହାନ୍ତ

ଭୁବନେଶ୍ୱର: ବିଜୁ ଜନତା ଦଳର ବରିଷ୍ଠ ଯୁବନେତା, ପୂର୍ବତନ କ୍ୟାବିନେଟ୍ ମନ୍ତ୍ରୀ ତଥା ଭଟଲିର ପୂର୍ବତନ ବିଧାୟକ ସୁଶାନ୍ତ ସିଂଙ୍କର ପରଲୋକ ଘଟିଛି। ଭୁବନେଶ୍ୱରସ୍ଥିତ ଆପୋଲୋ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଗତ ରାତିରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ମାତ୍ର ୫୩ ବର୍ଷ ବୟସରେ ତାଙ୍କର ଅକାଳ ବିୟୋଗ ଓଡ଼ିଶା ରାଜନୀତି, ବିଶେଷ କରି ପଶ୍ଚିମ ଓଡ଼ିଶାର ରାଜନୈତିକ ପରିସରକୁ ସ୍ତବ୍ଧ କରିଦେଇଛି। ତାଙ୍କ ବିୟୋଗରେ ବିଜେଡି ଜଣେ ଦକ୍ଷ ସଂଗଠକ, ପରିଶ୍ରମୀ ରାଜନେତା ଓ ଜନପ୍ରିୟ ନେତାଙ୍କୁ ହରାଇଛି। ସୁଶାନ୍ତ ସିଂ ଗତ କିଛି ମାସ ଧରି ଅସୁସ୍ଥ ଥିଲେ। ଉନ୍ନତ ଚିକିତ୍ସା ପାଇଁ ସେ ରାଜ୍ୟ ବାହାରେ ମଧ୍ୟ ଚିକିତ୍ସିତ ହେଉଥିଲେ। ପରେ ସ୍ୱାସ୍ଥ୍ୟାବସ୍ଥାରେ କିଛିଟା ସୁଧାର ଆସିବା ପରେ ସେ ଓଡ଼ିଶା ଫେରିଥିଲେ। ବରଗଡ଼ର ଏକ ଘରୋଇ ହସ୍ପିଟାଲରେ କିଛିଦିନ ଚିକିତ୍ସା ପରେ ତାଙ୍କୁ ଭୁବନେଶ୍ୱରର ଆପୋଲୋ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ମଝିରେ ସେ ସାମାନ୍ୟ ସୁସ୍ଥ ହୋଇ ଭୁବନେଶ୍ୱର ସ୍ଥିତ ବାସଭବନରେ ରହୁଥିଲେ। ମାତ୍ର ଗତକାଲି ରାତିରେ ହଠାତ୍ ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହୋଇପଡ଼ିବାରୁ ତାଙ୍କୁ ପୁଣି ଆପୋଲୋ ହସ୍ପିଟାଲରେ ଭର୍ତ୍ତି କରାଯାଇଥିଲା। ଡାକ୍ତରମାନଙ୍କ ସମସ୍ତ ପ୍ରୟାସ ସତ୍ତ୍ୱେ ତାଙ୍କୁ ବଞ୍ଚାଇ ହୋଇପାରିନଥିଲା। ସୁଶାନ୍ତ ସିଂ କେବଳ ଜଣେ ରାଜନେତା ନୁହେଁ, ପଶ୍ଚିମ ଓଡ଼ିଶାରେ ସେ ଥିଲେ ଜନସାଧାରଣଙ୍କ ଅତି ନିକଟତର ନେତା। ସରଳ ଜୀବନଶୈଳୀ, ପରୋପକାରୀ ମନୋଭାବ ଓ ଲୋକଙ୍କ ସହ ସିଧାସଳଖ ସମ୍ପର୍କ ତାଙ୍କୁ ଏକ ସ୍ୱତନ୍ତ୍ର ପରିଚୟ ଦେଇଥିଲା। ଗ୍ରାମାଞ୍ଚଳରୁ ଆରମ୍ଭ କରି ସହରାଞ୍ଚଳ ପର୍ଯ୍ୟନ୍ତ ସେ ବେଶ୍ ଲୋକପ୍ରିୟ ଥିଲେ। ଲୋକଙ୍କ ସମସ୍ୟା ଶୁଣିବା, ସେମାନଙ୍କ ପାଖରେ ପହଞ୍ଚିବା ଓ ସାଙ୍ଗଠନିକ ଭାବେ ଦଳକୁ ସୁଦୃଢ଼ କରିବାରେ ସେ ସବୁବେଳେ ଆଗରେ ରହୁଥିଲେ। ୨୦୦୯ ମସିହାରେ ଭଟଲି ବିଧାନସଭା ନିର୍ବାଚନମଣ୍ଡଳୀରୁ ବିଜୁ ଜନତା ଦଳ ଟିକେଟରେ ପ୍ରଥମ ଥର ପାଇଁ ବିଧାୟକ ଭାବେ ନିର୍ବାଚିତ ହୋଇଥିଲେ ସୁଶାନ୍ତ ସିଂ। ତାଙ୍କର ସକ୍ରିୟ ଜନସମ୍ପର୍କ ଓ ସଂଗଠନ କ୍ଷମତା ତାଙ୍କୁ ଅଳ୍ପ ସମୟ ମଧ୍ୟରେ ଦଳର ଆଗଧାଡ଼ିର ନେତାରେ ପରିଣତ କରିଥିଲା।

୨୦୧୪ ଏବଂ ୨୦୧୯ ବିଧାନସଭା ନିର୍ବାଚନରେ ମଧ୍ୟ ସେ ଲଗାତାର ବିଜୟୀ ହୋଇ ଭଟଲିରେ ନିଜର ଜନାଧାରକୁ ଆହୁରି ମଜବୁତ କରିଥିଲେ। ତେବେ ୨୦୨୪ ବିଧାନସଭା ନିର୍ବାଚନରେ ସେ ବିଜେପି ପ୍ରାର୍ଥୀ ଇରାଶିଷ ଆଚାର୍ଯ୍ୟଙ୍କଠାରୁ ୨୭,୮୯୨ ଭୋଟରେ ପରାସ୍ତ ହୋଇଥିଲେ। ପରାଜୟ ସତ୍ତ୍ୱେ ସଂଗଠନରେ ତାଙ୍କର ପ୍ରଭାବ ଓ ଗ୍ରହଣୀୟତା କମିନଥିଲା। ବିଜେଡି ସଭାପତି ନବୀନ ପଟ୍ଟନାୟକ ତାଙ୍କର ସାଂଗଠନିକ ଦକ୍ଷତା ଓ ପ୍ରଶାସନିକ କ୍ଷମତାକୁ ବିଚାର କରି ବିଭିନ୍ନ ସମୟରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେଇଥିଲେ। ଚତୁର୍ଥ ପାଳି ବିଜେଡି ସରକାରରେ ସେ ଶ୍ରମ ଓ କର୍ମନିଯୁକ୍ତି ବିଭାଗର ରାଷ୍ଟ୍ରମନ୍ତ୍ରୀ ଭାବେ କାର୍ଯ୍ୟ କରିଥିଲେ। ପରବର୍ତ୍ତୀ ସରକାରରେ ସେ କ୍ୟାବିନେଟ୍ ମନ୍ତ୍ରୀ ଭାବେ ପଦୋନ୍ନତି ପାଇ ଗ୍ରାମ୍ୟ ଉନ୍ନୟନ ଭଳି ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ସମ୍ଭାଳିଥିଲେ। ସେହି ସମୟରେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର କାର୍ଯ୍ୟାନ୍ୱୟନରେ ତାଙ୍କର ସକ୍ରିୟ ଭୂମିକା ରହିଥିଲା। ପଶ୍ଚିମ ଓଡ଼ିଶାରେ ପ୍ରସନ୍ନ ଆଚାର୍ଯ୍ୟଙ୍କ ପରେ ବିଜେଡିର ଅନ୍ୟତମ ପ୍ରମୁଖ ମୁହଁ ଭାବେ ସୁଶାନ୍ତ ସିଂଙ୍କୁ ଦେଖାଯାଉଥିଲା। ସେ କେବଳ ନିର୍ବାଚନୀ ରାଜନୀତିରେ ନୁହେଁ, ସଂଗଠନ ବିସ୍ତାର, କର୍ମୀଙ୍କୁ ଏକାଠି କରିବା ଓ ଦଳକୁ ମଜବୁତ କରିବାରେ ମଧ୍ୟ ଅଗ୍ରଣୀ ଭୂମିକା ନେଉଥିଲେ। ଦଳର ଶୀର୍ଷ ନେତୃତ୍ୱ ତାଙ୍କ ଉପରେ ସର୍ବଦା ଭରସା କରୁଥିଲେ।

ତାଙ୍କ ଦେହାନ୍ତ ଖବର ପ୍ରଚାରିତ ହେବା ପରେ ଭୁବନେଶ୍ୱର ଆପୋଲୋ ହସ୍ପିଟାଲରେ ବିଜେଡିର ବରିଷ୍ଠ ନେତା, କର୍ମୀ, ସମର୍ଥକ ଓ ଶୁଭେଚ୍ଛୁମାନଙ୍କ ଭିଡ଼ ଜମିଥିଲା। ଅନେକ ନେତା ହସ୍ପିଟାଲରେ ପହଞ୍ଚି ତାଙ୍କର ଶେଷ ଦର୍ଶନ କରିଥିଲେ ଏବଂ ପରିବାରବର୍ଗଙ୍କୁ ସମବେଦନା ଜଣାଇଥିଲେ। ବିଜେଡି ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ସୁଶାନ୍ତ ସିଂଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି। ଶୋକବାର୍ତ୍ତାରେ ସେ କହିଛନ୍ତି ଯେ, ସୁଶାନ୍ତ ସିଂଙ୍କ ବିୟୋଗରେ ବିଜୁ ଜନତା ଦଳ ଜଣେ ଦକ୍ଷ ସଂଗଠକ ଓ ଲୋକପ୍ରିୟ ନେତାଙ୍କୁ ହରାଇଲା। ଦଳକୁ ସୁଦୃଢ଼ କରିବା ସହ ଲୋକସେବା କ୍ଷେତ୍ରରେ ତାଙ୍କର ଅବଦାନ ସଦା ସ୍ମରଣୀୟ ହୋଇ ରହିବ। ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାର ପ୍ରତି ସେ ଗଭୀର ସମବେଦନା ଜଣାଇଛନ୍ତି। ସୁଶାନ୍ତ ସିଂଙ୍କ ବିୟୋଗ କେବଳ ବିଜେଡି ପାଇଁ ନୁହେଁ, ସମଗ୍ର ପଶ୍ଚିମ ଓଡ଼ିଶାର ରାଜନୈତିକ ଓ ସାମାଜିକ ଜୀବନ ପାଇଁ ଏକ ଅପୂରଣୀୟ କ୍ଷତି। ଜନସାଧାରଣଙ୍କ ସହ ତାଙ୍କର ନିବିଡ଼ ସମ୍ପର୍କ, ସଂଗଠନ ପ୍ରତି ତାଙ୍କର ନିଷ୍ଠା ଏବଂ ସେବାଭାବ ତାଙ୍କୁ ସବୁବେଳେ ସ୍ମରଣୀୟ କରି ରଖିବ। ତାଙ୍କ ବିୟୋଗରେ ପଶ୍ଚିମ ଓଡ଼ିଶାର ରାଜନୀତିରେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି ହୋଇଛି, ଯାହାକୁ ପୂରଣ କରିବା ସହଜ ହେବ ନାହିଁ।