ଚିନି ଦରରେ ନିଆଁ: କିଲୋ ପିଛା ୭୦ ଟଙ୍କା, ଖାଉଟିଙ୍କ ଚିନ୍ତା ବଢ଼ାଇଲା ଦରବୃଦ୍ଧି
ପାର୍ବଣ ଋତୁରେ ଚିନି ଦରରେ ହଠାତ୍ ବୃଦ୍ଧି। କିଲୋ ପିଛା ୭୦ ଟଙ୍କା। ୧୨ ଦିନରେ ୨୦% ମହଙ୍ଗା, ରେକର୍ଡ କମ୍ ଷ୍ଟକ୍ ନେଇ ବଢ଼ିଲା ଚିନ୍ତା।
ନୂଆଦିଲ୍ଲୀ: ଦେଶରେ ଚିନି ଦର ଦ୍ରୁତ ଗତିରେ ବଢ଼ିବାରେ ଲାଗିଛି। ଚିନିର ମହଜୁଦ ରେକର୍ଡ ନିମ୍ନସ୍ତରକୁ ଖସିବା ନେଇ ଆଶଙ୍କା ଏବଂ ଆଗକୁ ଆସୁଥିବା ପାର୍ବଣ ଋତୁ ମଧ୍ୟରେ ବଜାରରେ ଦରବୃଦ୍ଧି ଖାଉଟିଙ୍କ ଚିନ୍ତା ବଢ଼ାଇଛି। ଅଗଷ୍ଟ ୭ ପରଠାରୁ ଦେଶର ପ୍ରମୁଖ ସହରଗୁଡ଼ିକରେ ଚିନିର ଖୁଚୁରା ଦର ପ୍ରାୟ ୨୦ ପ୍ରତିଶତ ବଢ଼ିଥିବା ଜଣାପଡ଼ିଛି। ଏହାକୁ ନେଇ ଖାଉଟିଙ୍କ ଚିନ୍ତା ବଢ଼ିଥିବା ବେଳେ ଆଗାମୀ ଦିନରେ ମିଠା, ବେକେରୀ ଓ ଅନ୍ୟ ଖାଦ୍ୟ ସାମଗ୍ରୀର ଦର ଉପରେ ମଧ୍ୟ ଏହାର ପ୍ରଭାବ ପଡ଼ିବା ଆଶଙ୍କା ରହିଛି। ଗତ ୧୨ ଦିନ ମଧ୍ୟରେ ଚିନିର ଖୁଚୁରା ଦର କିଲୋ ପିଛା ପ୍ରାୟ ୫୨ ଟଙ୍କାରୁ ବଢ଼ି ୭୦ ଟଙ୍କା ପହଞ୍ଚିଛି। ଅର୍ଥାତ୍ ଏହି ସମୟ ମଧ୍ୟରେ ଦରରେ ପ୍ରାୟ ୧୯ରୁ ୨୧ ପ୍ରତିଶତ ବୃଦ୍ଧି ହୋଇଛି। ଆଗାମୀ ଦିନରେ ମଧ୍ୟ ଦର ଉପରମୁହାଁ ରହିପାରେ ବୋଲି ବଜାର ବିଶେଷଜ୍ଞମାନେ ଆକଳନ କରୁଛନ୍ତି।
ଚଳିତ ଚିନି ବର୍ଷ ଅକ୍ଟୋବର ୨୦୨୫ରୁ ସେପ୍ଟେମ୍ବର ୨୦୨୬ ପର୍ଯ୍ୟନ୍ତ ରହିଛି। ଏହି ଚିନି ବର୍ଷ ଶେଷରେ ଦେଶରେ ଚିନିର ମହଜୁଦ ପ୍ରାୟ ୩୨ ଲକ୍ଷ ମେଟ୍ରିକ୍ ଟନ୍ (LMT) ରହିପାରେ ବୋଲି ଆକଳନ କରାଯାଉଛି। ସାଧାରଣତଃ ଦେଶରେ ଆବଶ୍ୟକ ଷ୍ଟକ୍ ପ୍ରାୟ ୬୦ LMT ହୋଇଥିବା ବେଳେ ଚଳିତ ବର୍ଷର ଆକଳନ ତାହାଠାରୁ ଯଥେଷ୍ଟ କମ୍। ଏହା ୨୦୧୦ ପରଠାରୁ ସର୍ବନିମ୍ନ କ୍ଲୋଜିଂ ଷ୍ଟକ୍ ହୋଇପାରେ। ଗତ ଚିନି ବର୍ଷ ଶେଷରେ ଦେଶରେ ପ୍ରାୟ ୪୭ ଲକ୍ଷ ମେଟ୍ରିକ୍ ଟନ୍ ଚିନି ମହଜୁଦ ଥିଲା।
ଦେଶରେ ପ୍ରତି ମାସରେ ଚିନିର ଆବଶ୍ୟକତା ପ୍ରାୟ ୨୪ ଲକ୍ଷ ମେଟ୍ରିକ୍ ଟନ୍ ହୋଇଥିବା ବେଳେ ଚଳିତ ବର୍ଷ ପାଇଁ ଚିନି ଶିଳ୍ପ ପକ୍ଷରୁ ମୋଟ ୩୪୨ LMT ଚିନି ଉତ୍ପାଦନର ଆକଳନ କରାଯାଇଥିଲା। ଏହି ଉତ୍ପାଦନ ଆକଳନକୁ ଆଧାର କରି କେନ୍ଦ୍ର ସରକାର ଚଳିତ ଚିନି ବର୍ଷରେ ମୋଟ ୨୦ LMT ଚିନି ରପ୍ତାନୀକୁ ଦୁଇଟି ପର୍ଯ୍ୟାୟରେ ଅନୁମତି ଦେଇଥିଲେ। କିନ୍ତୁ ପରେ ପ୍ରକୃତ ଉତ୍ପାଦନ ଆକଳନଠାରୁ ଯଥେଷ୍ଟ କମ୍ ହୋଇଥିଲା। ଦେଶରେ ପ୍ରକୃତ ଚିନି ଉତ୍ପାଦନ ପ୍ରାୟ ୩୦୮ LMTରେ ସୀମିତ ରହିଛି।
ଇଥାନଲ ପାଇଁ ଗଲା ୨୮ LMT ଚିନି
ମୋଟ ଉତ୍ପାଦନରୁ ପ୍ରାୟ ୨୮ LMT ଚିନି ଇଥାନଲ ଉତ୍ପାଦନ ପାଇଁ ବ୍ୟବହାର କରାଯାଇଛି। ଫଳରେ ଘରୋଇ ଉପଭୋଗ ପାଇଁ ପ୍ରାୟ ୨୮୦ LMT ଚିନି ଉପଲବ୍ଧ ରହିଛି। ଉତ୍ପାଦନ ଆକଳନଠାରୁ କମିବା ପରେ ସରକାର ମେ’ ମାସରେ ଚିନି ରପ୍ତାନୀ ଉପରେ ରୋକ୍ ଲଗାଇଥିଲେ। କିନ୍ତୁ ସେତେବେଳକୁ ପ୍ରାୟ ୮ ଲକ୍ଷ ମେଟ୍ରିକ୍ ଟନ୍ ଚିନି ରପ୍ତାନୀ ହୋଇସାରିଥିଲା।
ଚିନି ଷ୍ଟକ୍କୁ ନେଇ ବଜାରରେ ସ୍ପଷ୍ଟତାର ଅଭାବ ହିଁ ବର୍ତ୍ତମାନର ଦରବୃଦ୍ଧିର ଏକ ବଡ଼ କାରଣ ବୋଲି ଜଣେ ବଜାର ବିଶେଷଜ୍ଞ କହିଛନ୍ତି। ତାଙ୍କ କହିବା ଅନୁସାରେ, ଚିନି ବର୍ଷ ଶେଷରେ ଦେଶରେ ପ୍ରକୃତରେ କେତେ ଚିନି ମହଜୁଦ ରହିବ, ତାହାକୁ ନେଇ ବ୍ୟବସାୟୀ ଓ ଶିଳ୍ପ ମହଲରେ ବ୍ୟାପକ କଳ୍ପନାଜଳ୍ପନା ଚାଲିଛି। ଚିନିର ପ୍ରକୃତ ଉପଲବ୍ଧତା ସମ୍ପର୍କରେ ସ୍ପଷ୍ଟ ତଥ୍ୟ ନଥିବାରୁ ବଜାରରେ ଦର ଉପରେ ଚାପ ବଢ଼ୁଛି।
ଏପଟେ ଦେଶରେ ପର୍ଯ୍ୟାପ୍ତ ଚିନି ଉପଲବ୍ଧ ଥିବା ସରକାର ପୂର୍ବରୁ ଆଶ୍ୱାସନ ଦେଇଛନ୍ତି। ଚିନି ବ୍ୟବସାୟୀଙ୍କ ମହଜୁଦ ଉପରେ ନିୟନ୍ତ୍ରଣ ଲଗାଇବା ପାଇଁ ନଭେମ୍ବର ୩୦, ୨୦୨୬ ପର୍ଯ୍ୟନ୍ତ ଷ୍ଟକ୍ ହୋଲ୍ଡିଂ ଲିମିଟ୍ ମଧ୍ୟ ଲାଗୁ କରାଯାଇଛି।
ତଥାପି ପାର୍ବଣ ଋତୁ ଆଗକୁ ଥିବାରୁ ଚିନିର ଚାହିଦା ଆହୁରି ବଢ଼ିବା ଆଶଙ୍କା ରହିଛି। ଏଭଳି ସ୍ଥିତିରେ ଆଗାମୀ ଦିନରେ ଚିନିର ଯୋଗାଣ ଓ ମହଜୁଦ ସ୍ଥିତି କିପରି ରହିବ ଏବଂ ଦରରେ କେବେ ଲାଗିବ ବ୍ରେକ୍—ଏହା ଉପରେ ଏବେ ସମସ୍ତଙ୍କ ନଜର।