ଦିଲ୍ଲୀରେ ଭୟଙ୍କର ଅଘଟଣ: ଡିମୋଲିସନ୍ ବେଳେ ଭୁଶୁଡ଼ିଲା କୋଠା

ନୂଆଦିଲ୍ଲୀ: ଦିଲ୍ଲୀର କରୋଲବାଗ ଅଞ୍ଚଳରେ ଶୁକ୍ରବାର ଏକ ପୁରୁଣା କୋଠା ଭୁଶୁଡ଼ି ଜଣେ ଶ୍ରମିକଙ୍କ ମୃତ୍ୟୁ ହୋଇଛି। ଆଉ ୩ ଜଣ ଶ୍ରମିକ ଆହତ ହୋଇଛନ୍ତି। ରେଗରପୁରାର ପ୍ୟାରେଲାଲ ରୋଡ୍‌ରେ ଡିମୋଲିସନ୍ କାମ ଚାଲିଥିବା ବେଳେ ପ୍ରାୟ ସକାଳ ୧୧ଟା ୧୫ରେ ଏହି ଅଘଟଣ ଘଟିଥିଲା। ପୋଲିସ ଓ ଦମକଳ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ମଲବା ତଳୁ ଶ୍ରମିକମାନଙ୍କୁ ଉଦ୍ଧାର କରିଥିଲେ। ମୃତ ଶ୍ରମିକଙ୍କୁ ଶେଖ୍ ଶମଶାଦ ବୋଲି ଚିହ୍ନଟ କରାଯାଇଛି। ଆହତ ମହମ୍ମଦ ଆୟୁବଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି।

ପ୍ରାଥମିକ ତଦନ୍ତରୁ ଜଣାପଡ଼ିଛି, ଘର ମାଲିକଙ୍କ ପକ୍ଷରୁ ଜଣେ ଘରୋଇ ଠିକାଦାର ଡିମୋଲିସନ୍ କାମ କରୁଥିଲେ। ଏଥିପାଇଁ ସମ୍ପୃକ୍ତ ସଂସ୍ଥାର ଅନୁମତି ନିଆଯାଇନଥିବା ପୋଲିସ କହିଛି। ଘଟଣାରେ ଘର ମାଲିକ ଓ ଠିକାଦାରଙ୍କୁ ପଚରାଉଚରା ପାଇଁ ଅଟକ ରଖାଯାଇଛି।