ସୁବର୍ଣ୍ଣରେଖାରେ ବଢୁଛି ବନ୍ୟା ଆଶଙ୍କା; ସାରସକଣାର ୧୦ରୁ ଊର୍ଦ୍ଧ୍ୱ ଗାଁ ପ୍ରତି ବିପଦ

ସାରସକଣା: ଉପରମୁଣ୍ଡ ଝାଡ଼ଖଣ୍ଡରେ ଲଘୁଚାପଜନିତ ଲଗାଣ ବର୍ଷା ଯୋଗୁଁ ସୁବର୍ଣ୍ଣରେଖା ନଦୀର ଜଳସ୍ତର ଦ୍ରୁତଗତିରେ ବୃଦ୍ଧି ପାଉଛି। ଏହାସହ ଉପରମୁଣ୍ଡର ବିଭିନ୍ନ ଡ୍ୟାମ୍ ଓ ବ୍ୟାରେଜରୁ ବିପୁଳ ପରିମାଣର ବନ୍ୟାଜଳ ନିଷ୍କାସନ ହେଉଥିବାରୁ ଓଡ଼ିଶା-ଝାଡ଼ଖଣ୍ଡ ସୀମାନ୍ତ ମୟୂରଭଞ୍ଜ ଜିଲ୍ଲାର ସାରସକଣା ବ୍ଲକର ନଦୀକୂଳିଆ ଅଞ୍ଚଳରେ ବନ୍ୟା ଆଶଙ୍କା ଦେଖାଦେଇଛି। ବିଶେଷକରି ସାରସକଣା ବ୍ଲକର ୧୦ରୁ ଊର୍ଦ୍ଧ୍ୱ ଗାଁ ପ୍ରତି ବିପଦ ସୃଷ୍ଟି ହୋଇଥିବାବେଳେ ତଳିଆ ଅଞ୍ଚଳରେ ରହୁଥିବା ଲୋକଙ୍କ ମଧ୍ୟରେ ଭୟ ଓ ଆତଙ୍କ ଖେଳିଯାଇଛି। ଜଳ ନିଷ୍କାସନ ଏଭଳି ଭାବେ ଜାରି ରହିଲେ ନଦୀକୂଳିଆ ଗାଁଗୁଡ଼ିକ ଜଳବନ୍ଦୀ ହେବା ସହ ଯୋଗାଯୋଗ ବିଚ୍ଛିନ୍ନ ହେବାର ଆଶଙ୍କା ରହିଛି। ସୂଚନା ଅନୁଯାୟୀ, ଉପରମୁଣ୍ଡରେ ଜଳପତ୍ତନ ବୃଦ୍ଧି ପରେ ଝାଡ଼ଖଣ୍ଡ ପ୍ରଶାସନ ପକ୍ଷରୁ ଗାଲୁଡ଼ିହି ବ୍ୟାରେଜର ୧୦ଟି ଏବଂ ଚାଣ୍ଡିଲ ଡ୍ୟାମର ୧୩ଟି ଗେଟ୍ ଖୋଲାଯାଇଛି।

ଏଥିସହ ଖଡ଼ଖାଇ ଡ୍ୟାମର ଜଳସ୍ତର ମଧ୍ୟ ବଢ଼ିଥିବାରୁ ସେଠାରୁ ଅତିରିକ୍ତ ଜଳ ନିଷ୍କାସନ କରାଯାଉଛି। ଗାଲୁଡ଼ିହି ବ୍ୟାରେଜର ଜଳସ୍ତର ୯୨.୪୦ ମିଟରରେ ପହଞ୍ଚିଥିବାବେଳେ ୧୦ଟି ସ୍ପିଲୱେ ଗେଟ୍ ଦେଇ ପ୍ରତି ସେକେଣ୍ଡରେ ପ୍ରାୟ ୪୨୪୦.୮୭ କ୍ୟୁମେକ୍ସ ବନ୍ୟାଜଳ ସୁବର୍ଣ୍ଣରେଖା ନଦୀକୁ ଛଡ଼ାଯାଉଛି। ଏଥିସହ ଜିଆରଏମସି କେନାଲ ଦେଇ ପ୍ରାୟ ୧୪.୯୯୩ କ୍ୟୁମେକ୍ସ ଜଳ ନିଷ୍କାସିତ ହେଉଥିବା ସୂଚନା ମିଳିଛି। ଏହି ବିପୁଳ ଜଳରାଶି ମୟୂରଭଞ୍ଜ ସୀମାନ୍ତ ଦେଇ ପ୍ରବାହିତ ହେଉଥିବାରୁ ସୁବର୍ଣ୍ଣରେଖା ନଦୀର ଉଭୟ ପାର୍ଶ୍ୱରେ ଥିବା ତଳିଆ ଅଞ୍ଚଳରେ ବନ୍ୟାଜଳ ପ୍ରବେଶ ଆଶଙ୍କା ବଢ଼ିଛି। ନଦୀର ଜଳସ୍ତର ଆହୁରି ବୃଦ୍ଧି ପାଇଲେ ସାରସକଣା ବ୍ଲକର ତଳିଆ ଅଞ୍ଚଳରେ ବନ୍ୟା ପରିସ୍ଥିତି ଗମ୍ଭୀର ହେବାର ସମ୍ଭାବନା ରହିଛି। ପରିସ୍ଥିତି ଉପରେ ପ୍ରଶାସନ ପକ୍ଷରୁ ନଜର ରଖାଯାଇଥିବାବେଳେ ନଦୀକୂଳିଆ ଅଞ୍ଚଳର ଲୋକଙ୍କୁ ସତର୍କ ରହିବାକୁ କୁହାଯାଇଛି। ବର୍ଷା ଓ ଉପରମୁଣ୍ଡରୁ ଆସୁଥିବା ଜଳରାଶି ଯୋଗୁଁ ଆଗାମୀ ସମୟରେ ସୁବର୍ଣ୍ଣରେଖାର ଜଳସ୍ତର ଉପରେ ସମସ୍ତଙ୍କ ନଜର ରହିଛି।