SIR ସର୍ଭେକୁ ଶଙ୍ଖାମେଦି ଗ୍ରାମବାସୀଙ୍କ ବିରୋଧ, ସର୍ଭେ ନକରି ଫେରିଲେ BLO

ବାଲେଶ୍ୱର ଜିଲ୍ଲାର ବିବାଦୀୟ ଶଙ୍ଖାମେଦି ଗ୍ରାମରେ SIR (ସ୍ପେଶାଲ୍ ଇଣ୍ଟେନ୍ସିଭ୍ ରିଭିଜନ୍) ସର୍ଭେକୁ ନେଇ ତୀବ୍ର ବିରୋଧ ଦେଖାଦେଇଛି। ସର୍ଭେ କରିବାକୁ ଯାଇଥିବା BLOଙ୍କୁ ଗ୍ରାମବାସୀ ସିଧାସଳଖ ମନା କରି ଫେରାଇ ଦେଇଥିବା ଜଣାପଡ଼ିଛି। ଗ୍ରାମବାସୀଙ୍କ କହିବା ଅନୁସାରେ, ସେମାନେ ପୂର୍ବରୁ ପଶ୍ଚିମବଙ୍ଗରେ SIR ପ୍ରକ୍ରିୟାରେ ସାମିଲ ହୋଇ ସାରିଛନ୍ତି ଏବଂ ବିଧାନସଭା ନିର୍ବାଚନରେ ଭୋଟ ମଧ୍ୟ ଦେଇଛନ୍ତି। ତେଣୁ ଓଡ଼ିଶାର SIR ସର୍ଭେରେ ଆଉ ଭାଗ ନେବେ ନାହିଁ ବୋଲି ସ୍ପଷ୍ଟ କରିଛନ୍ତି। ସେପଟେ BLO ସୁମତି ମାଝୀଙ୍କ ସ୍ୱାମୀ ଗୋବର୍ଦ୍ଧନ ମାଝୀ କହିଛନ୍ତି ଯେ, ଗ୍ରାମବାସୀଙ୍କ ଭୟ ଓ ଅସନ୍ତୋଷକୁ ଦୃଷ୍ଟିରେ ରଖି ଏହି ଘଟଣା ସମ୍ପର୍କରେ ସେମାନେ ଗଣମାଧ୍ୟମକୁ କୌଣସି ସୂଚନା ଦେବେ ନାହିଁ। ଶଙ୍ଖାମେଦି ଗ୍ରାମକୁ ନେଇ ଦୀର୍ଘ ଦଶନ୍ଧି ଧରି ଓଡ଼ିଶା ଓ ପଶ୍ଚିମବଙ୍ଗ ମଧ୍ୟରେ ବିବାଦ ଲାଗି ରହିଛି। ଐତିହାସିକ ତଥ୍ୟ ଅନୁଯାୟୀ, ୧୯୨୭ ରୁ ୧୯୮୦ ମସିହା ପର୍ଯ୍ୟନ୍ତ ଓଡ଼ିଶା ସରକାର ଏହି ଗ୍ରାମରୁ ରାଜସ୍ୱ ଆଦାୟ କରୁଥିଲେ। କିନ୍ତୁ ପରବର୍ତ୍ତୀ ସମୟରେ ରାଜସ୍ୱ ଆଦାୟ ବନ୍ଦ ହୋଇଯାଇଥିବାରୁ ଗ୍ରାମର ପ୍ରଶାସନିକ ସ୍ଥିତିକୁ ନେଇ ଅନିଶ୍ଚିତତା ବଢ଼ିଛି। ଏହି ସୀମାନ୍ତ ଗ୍ରାମରେ ଉଭୟ ରାଜ୍ୟ ସରକାର ବିଭିନ୍ନ ସୁବିଧା ଯୋଗାଇ ଆସୁଛନ୍ତି। ଓଡ଼ିଶା ସରକାର ପ୍ରାଥମିକ ବିଦ୍ୟାଳୟ, ରାସ୍ତା, ବିଦ୍ୟୁତ୍, ପାନୀୟ ଜଳ ଓ ରାଶନ କାର୍ଡ ବ୍ୟବସ୍ଥା କରିଥିବା ବେଳେ ପଶ୍ଚିମବଙ୍ଗ ସରକାର ମଧ୍ୟ ଆବାସ ଯୋଜନା ସହ ଅନ୍ୟାନ୍ୟ ମୌଳିକ ସୁବିଧା ଯୋଗାଇ ଆସୁଛନ୍ତି। ତେବେ ରାଜସ୍ୱ ସମ୍ବନ୍ଧୀୟ ଜଟିଳତା କାରଣରୁ ଛାତ୍ରଛାତ୍ରୀମାନେ ଜାତିଗତ ପ୍ରମାଣପତ୍ର ଭଳି ଆବଶ୍ୟକ ଦଲିଲ ପାଇବାରେ ସମସ୍ୟାର ସମ୍ମୁଖୀନ ହେଉଛନ୍ତି। ଫଳରେ ଉଚ୍ଚଶିକ୍ଷା ଓ ସରକାରୀ ସୁବିଧା ପାଇବାରେ ବାଧା ସୃଷ୍ଟି ହେଉଛି। ଦୀର୍ଘ ବର୍ଷ ଧରି ଉଭୟ ରାଜ୍ୟର ପ୍ରଭାବ ରହିଥିବାରୁ ଅନେକ ଗ୍ରାମବାସୀଙ୍କ ପାଖରେ ଉଭୟ ରାଜ୍ୟ ସମ୍ପର୍କିତ ଭୋଟର କାର୍ଡ ଓ ଆଧାର କାର୍ଡ ଥିବା ଅଭିଯୋଗ ରହିଛି। ଏଭଳି ପରିସ୍ଥିତିରେ SIR ସର୍ଭେକୁ ନେଇ ଉପୁଜିଥିବା ବିରୋଧ ଶଙ୍ଖାମେଦି ଗ୍ରାମର ଭବିଷ୍ୟତ ପ୍ରଶାସନିକ ସ୍ଥିତି ଓ ଓଡ଼ିଶାର ଭୌଗୋଳିକ ପରିଚୟକୁ ନେଇ ନୂଆ ଚର୍ଚ୍ଚାର ସୃଷ୍ଟି କରିଛି।