“ଏବେ କେବଳ ଗୋଟିଏ ଶିବସେନା ଅଛି”: କୌଣସି ଗୋଷ୍ଠୀ ନାହିଁ, UBT ଗୋଷ୍ଠୀକୁ ଅମିତ ଶାହଙ୍କ କଟାକ୍ଷ

ମୁମ୍ବାଇ:ମହାରାଷ୍ଟ୍ର ରାଜନୀତିରେ ଶିବସେନାର ଦୁଇ ଗୋଷ୍ଠୀ ମଧ୍ୟରେ ଚାଲିଥିବା ବିବାଦ ମଧ୍ୟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏକ ବଡ଼ ବୟାନ। ଶନିବାର କୋହ୍ଲାପୁର ଗସ୍ତ ସମୟରେ ଅମିତ ଶାହ କାହାରି ନାମ ନନେଇ ଉଦ୍ଧବ ଠାକରେଙ୍କ ଗୋଷ୍ଠୀ ଉପରେ କଡା କଟାକ୍ଷ କରିଛନ୍ତି। ଅମିତ ଶାହ କହିଛନ୍ତି ଯେ, ଏବେ କେବଳ ଗୋଟିଏ ଶିବସେନା ଅଛି, କୌଣସି ଅଲଗା ଗୋଷ୍ଠୀ ରହିନାହିଁ। ମହାଲକ୍ଷ୍ମୀ ଅମ୍ବାବାଈ ମନ୍ଦିର ପରିସରରେ ବିକାଶମୂଳକ କାର୍ଯ୍ୟର ଶୁଭାରମ୍ଭ କରିବା ଅବସରରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ପରିଚୟ କରାଇ ଶାହ ହସି ହସି କହିଥିଲେ, "ପୂର୍ବରୁ ଏକନାଥ ସିନ୍ଦେଙ୍କ ନାମ ଆଗରେ 'ସିନ୍ଦେ ଗୋଷ୍ଠୀ' ଲେଖିବାକୁ ପଡ଼ୁଥିଲା, କିନ୍ତୁ ଏବେ କେବଳ ଗୋଟିଏ ଶିବସେନା ରହିଛି ଏବଂ ଅନ୍ୟ କୌଣସି ଗୋଷ୍ଠୀ ନାହିଁ।" ଅମିତ ଶାହ ନିଜ ପରିବାର ସହିତ ଶନିବାର ସକାଳେ କୋହ୍ଲାପୁର ପହଞ୍ଚି ମହାଲକ୍ଷ୍ମୀ ଅମ୍ବାବାଈଙ୍କ ପୂଜାର୍ଚ୍ଚନା କରିଥିଲେ। ଏହାପରେ ସେ ତୀର୍ଥକ୍ଷେତ୍ର ବିକାଶ ଯୋଜନା ଅନ୍ତର୍ଗତ ପରିକ୍ରମା ମାର୍ଗ ଓ ରାମ ମନ୍ଦିରର ସଂରକ୍ଷଣ ଓ ସମ୍ବର୍ଦ୍ଧନ କାର୍ଯ୍ୟର ଶୁଭାରମ୍ଭ କରିଥିଲେ। ରାଜ୍ୟ ସରକାର ଏହି ବିକାଶ ଯୋଜନା ପାଇଁ ୧,୪୪୨ କୋଟି ଟଙ୍କାର ପାଣ୍ଠି ଅନୁମୋଦନ ଦେଇଛନ୍ତି । ଏନେଇ ଶନିବାର ଗୃହମନ୍ତ୍ରୀ ଅମିତ ଶାହ ଭୂମିପୂଜନ କରିଛନ୍ତି । କାର୍ଯ୍ୟକ୍ରମକୁ ସମ୍ବୋଧିତ କରି ଅମିତ ଶାହ ଉଦ୍ଧବ ଠାକରେଙ୍କୁ କଡ଼ା ସମାଲୋଚନା କରି କହିଛନ୍ତି, "ଉଦ୍ଧବ ଠାକରେ ଆଜି କଂଗ୍ରେସର କୋଳରେ ଯାଇ ବସିଛନ୍ତି। କଂଗ୍ରେସ କାନ ଖୋଲି ଶୁଣିରଖୁ, ଯିଏ ଏହି ଦେଶରେ ଜନ୍ମ ହୋଇଛି, ସିଏ ହିଁ ଏଠାରେ ରହିବ। ଆମେ ସମସ୍ତ ଅନୁପ୍ରବେଶକାରୀଙ୍କୁ ଦେଶରୁ ବାହାର କରିଦେବୁ।" ସେହିପରି ଶାହ କହିଛନ୍ତି ନରେନ୍ଦ୍ର ମୋଦିଙ୍କ ଗତ ୧୨ ବର୍ଷ ମଧ୍ୟରେ ପିଏମ ମୋଦି ଅସମ୍ଭବ କାର୍ଯ୍ୟକୁ ସମ୍ଭବ କରି ଦେଖାଇଛନ୍ତି।  ଅଯୋଧ୍ୟାରେ ଭବ୍ୟ ରାମ ମନ୍ଦିର, କାଶୀ ବିଶ୍ୱନାଥ, କେଦାରନାଥ, ସୋମନାଥ ଏବଂ କାମାଖ୍ୟା ମନ୍ଦିରର ବିକାଶ ସହ ଏବେ କୋହ୍ଲାପୁରର ଅମ୍ବାବାଈ ମନ୍ଦିରର କରିଡର ମଧ୍ୟ ନିର୍ମାଣ ହେବାକୁ ଯାଉଛନ୍ତି । ଦେଶର ଇତିହାସରେ ନରେନ୍ଦ୍ର ମୋଦି ସବୁଠାରୁ ଦୀର୍ଘ ସମୟ ଧରି ନିର୍ବାଚିତ ପ୍ରଧାନମନ୍ତ୍ରୀ ଭାବେ ସ୍ଥାନ ପାଇବେ। ସୋମନାଥଠାରୁ ଆରମ୍ଭ କରି ଗଙ୍ଗାସାଗର ପର୍ଯ୍ୟନ୍ତ ଏବେ ବିକାଶ ଚାଲିଛି। ଏହି କାର୍ଯ୍ୟକ୍ରମରେ ମହାରାଷ୍ଟ୍ର ମୁଖ୍ୟମନ୍ତ୍ରୀ  ଦେବେନ୍ଦ୍ର ଫଡନାଭିସ, ଉପମୁଖ୍ୟମନ୍ତ୍ରୀ ଏକନାଥ ସିନ୍ଧେଙ୍କ ସମେତ ଏକାଧିକ ମନ୍ତ୍ରୀ ଅନ୍ୟ ବରିଷ୍ଠ ନେତା ଉପସ୍ଥିତ ଥିଲେ । ସୂଚନାଯୋଗ୍ୟଯେ , ଉଦ୍ଧବ  ଠାକରେଙ୍କ ଶିବସେନା ଗୋଷ୍ଠୀର ୬ ଜଣ ସାଂସଦ ଯେକୌଣସି ସମୟରେ ଏକନାଥ ସିନ୍ଦେଙ୍କ ଗୋଷ୍ଠୀରେ ସାମିଲ ହୋଇପାରନ୍ତି। ଏଥିପାଇଁ ବିଦ୍ରୋହୀ ସାଂସଦ ମାନେ ଲୋକସଭା ବାଚସ୍ପତିଙ୍କୁ ସାକ୍ଷାତ କରି ଚିଠି ଦେଇଛନ୍ତି । ଯାହାକୁ ନେଇ ଏବେ ମହାରାଷ୍ଟ୍ର ରାଜନୀତିରେ ବଡ ଧରଣର ଭୂକମ୍ପ ଆସିବାକୁ ଯାଉଛି ।