କେନ୍ଦ୍ରମନ୍ତ୍ରୀ ମଣ୍ଡଳ ଅଦଳ ବଦଳ ପକ୍ରିୟା ଆରମ୍ଭ, ଇସ୍ତଫା ଦେଲେ କେନ୍ଦ୍ରମନ୍ତ୍ରୀ

ନୂଆଦିଲ୍ଲୀ: ଭାରତୀୟ ଜନତା ପାର୍ଟିର ବରିଷ୍ଠ ନେତା ଜର୍ଜ କୁରିଆନ୍ ମଙ୍ଗଳବାର କେନ୍ଦ୍ରମନ୍ତ୍ରୀ ପଦରୁ ଇସ୍ତଫା । ନିଜର ୬ ବର୍ଷର ରାଜ୍ୟସଭା କାର୍ଯ୍ୟକାଳ ଶେଷ ହେବା ପରେ କେନ୍ଦ୍ର ସଂଖ୍ୟାଲଘୁ ବ୍ୟାପାର ଓ ମତ୍ସ୍ୟ ସମ୍ପଦ ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ (MoS) ପଦରୁ ଇସ୍ତଫା ଦେଇଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କର ଇସ୍ତଫା ପତ୍ର ଗ୍ରହଣ କରିଥିବା ନେଇ ରାଷ୍ଟ୍ରପତି ଭବନ ପକ୍ଷରୁ ସୂଚନା ଦିଆଯାଇଛି। ରାଷ୍ଟ୍ରପତି ଭବନ ପକ୍ଷରୁ ଜାରି ବିଜ୍ଞପ୍ତି ଅନୁସାରେ "ପ୍ରଧାନମନ୍ତ୍ରୀଙ୍କ ପରାମର୍ଶ କ୍ରମେ ରାଷ୍ଟ୍ରପତି ସମ୍ବିଧାନର ଧାରା ୭୫ ଖଣ୍ଡ (୨) ଅନ୍ତର୍ଗତ  ଜର୍ଜ କୁରିଆନଙ୍କ କେନ୍ଦ୍ର ମନ୍ତ୍ରୀ ପରିଷଦରୁ ଦେଇଥିବା ଇସ୍ତଫାକୁ ଗ୍ରହଣ କରିଛନ୍ତି।" ୬୫ ବର୍ଷୀୟ କୁରିଆନ୍ ୨୦୨୪ ରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ତୃତୀୟ କେନ୍ଦ୍ର କ୍ୟାବିନେଟ୍‌ରେ ରାଷ୍ଟ୍ରମନ୍ତ୍ରୀ (MoS) ଭାବରେ କାର୍ଯ୍ୟ କରୁଥିଲେ। ଜର୍ଜ ହେଛଛନ୍ତି ବିଜେପିର ଜଣେ ବରିଷ୍ଠ ନେତା । ୧୯୮୦ରେ ଦଳର ଗଠନ ପରଠାରୁ ବର୍ତ୍ତମାନ ଯାଏଁ ସେ ଦଳର ସକ୍ରିୟ ସଦସ୍ୟ ଅଛନ୍ତି । ରାଜନୀତି ବ୍ୟତୀତ ସୁପ୍ରିମକୋର୍ଟର ଜଣେ ଆଇନଜୀବି ଭାବେ ତାଙ୍କର ଖ୍ୟାତି ରହିଛି । ଜୁନ୍ ୨୧ରେ କୁରିଆନଙ୍କ ରାଜ୍ୟସଭା କାର୍ଯ୍ୟକାଳ ସମାପ୍ତ ହୋଇଥିଲା, ଯେଉଁଥିପାଇଁ ତାଙ୍କୁ ନିଜ ପଦ ଛାଡିବାକୁ ପଡିଥିଲା। କେରଳ ବିଧାନସଭା ନିର୍ବାଚନରେ ଦଳର ଖରାପ ପ୍ରଦର୍ଶନ ହେତୁ ତାଙ୍କୁ ପୁନଃ ଦଳ ରାଜ୍ୟସଭାକୁ ପଠାଇ ନଥିବା ଚର୍ଚ୍ଚା ହେଉଛି ।  ସଂଖ୍ୟାଲଘୁ ବ୍ୟାପାର ମନ୍ତ୍ରଣାଳୟର ଅନୁଯାୟୀ, କୁରିଆନ୍ ୧୯୬୦ ମସିହା ସେପ୍ଟେମ୍ବର୨୦ରେ କେରଳର କୋଟାୟମ୍ ଜିଲ୍ଲାର ଏଟ୍ଟୁମାନୁର ପୌରପାଳିକାର ନମ୍ବିଆକୁଲମଠାରେ ଜନ୍ମଗ୍ରହଣ କରିଥିଲେ। ସେ ନିଜ ଜନ୍ମମାଟିରେ ସ୍କୁଲ ଶିକ୍ଷା ସମାପ୍ତ କରିବା ପରେ ଆଇନରେ ସ୍ନାତକ ଏବଂ ସ୍ନାତକୋତ୍ତର ହାସଲ କରିଥିଲେ। ସେ ୯ ଜୁନ୍ ୨୦୨୪ ରେ କେନ୍ଦ୍ର ରାଷ୍ଟ୍ରମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ । ପରେ ୧୧ ଜୁନ୍ ୨୦୨୪ରେ ସଂଖ୍ୟାଲଘୁ ବ୍ୟାପାର ମନ୍ତ୍ରଣାଳୟ ଏବଂ ମତ୍ସ୍ୟ ସମ୍ପଦ, ପଶୁପାଳନ ଓ ଦୁଗ୍ଧ ଉତ୍ପାଦନ ମନ୍ତ୍ରଣାଳୟର ଦାୟିତ୍ୱ ଗ୍ରହଣ କରିଥିଲେ। ଜର୍ଜ କୁରିଆନଙ୍କ ଇସ୍ତଫା ପରେ ଏବେ କେନ୍ଦ୍ରମନ୍ତ୍ରୀ ମଣ୍ଡଳ ଖୁବଶୀଘ୍ର ଅଦଳ ବଦଳ ହେବ ବୋଲ  ଜାତୀୟ ଗଣମାଧମରେ ଚର୍ଚ୍ଚା ଚାଲିଛି ।