ଟିଏମସି ମୁଖ୍ୟ ମମତା ବାନାର୍ଜୀଙ୍କୁ ହାଇକୋର୍ଟ ଝଟକା, ଋତବ୍ରତ ବାନାର୍ଜୀ ହିଁ ବିରୋଧୀ ଦଳନେତା

କୋଲକାତା: ମମତା ବାନାର୍ଜୀଙ୍କୁ ହାଇକୋର୍ଟରୁ ବଡ଼ ଝଟକା । ଟିଏମସିର ବିଦ୍ରୋହୀ ବିଧାୟକ ଋତବ୍ରତ ବାନାର୍ଜୀଙ୍କ ବିଧାନସଭାରେ ବିରୋଧୀ ଦଳ ନେତା ରହିବେ ବୋଲି କହିଲେ କୋଲକତା ହାଇକୋର୍ଟ । ପଶ୍ଚିମବଙ୍ଗ ରାଜନୀତିରେ ଚର୍ଚ୍ଚା ସୃଷ୍ଟି କରିଥିବା ବିରୋଧୀ ଦଳ ନେତା (LoP) ପଦକୁ ନେଇ ଚାଲିଥିବା ବିବାଦରେ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଲାଗିଛି ହାଇକୋର୍ଟ ଝଟକା । କଲିକତା ହାଇକୋର୍ଟ ଗୁରୁବାର ବିଦ୍ରୋହୀ ତୃଣମୂଳ କଂଗ୍ରେସ ବିଧାୟକ ଋତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବେ ସ୍ୱୀକୃତି ଦେଇଥିବା ବିଧାନସଭା ବାଚସ୍ପତି ରଥୀନ୍ଦ୍ର ବୋଷଙ୍କ ନିଷ୍ପତ୍ତି ଉପରେ ଅନ୍ତରୀଣ ସ୍ଥଗିତାଦେଶ ଦେବାକୁ ମନା କରିଛନ୍ତି। ଟିଏମସି ପକ୍ଷରୁ ଶୋଭନଦେବ ଚଟ୍ଟୋପଧ୍ୟାୟ ହାଇକୋର୍ଟରେ ଏକ ଆବେଦନ ଦାଖଲ କରିଥିଲେ ।ନ୍ୟାୟମୂର୍ତ୍ତି କୃଷ୍ଣ ରାଓଙ୍କ ଖଣ୍ଡପୀଠ କହିଛନ୍ତି ଯେ ଟିଏମସି ତରଫରୁ ଦୁଇ ଜଣକ ନାମ ଦିଆଯାଇଥିଲା । ଶୋଭନଦେବ ଚଟ୍ଟୋପାଧ୍ୟାୟଙ୍କ ନାମ ପ୍ରସ୍ତାବ ଟିଏମସିର ଗୋଟିଏ ଗୋଷ୍ଠୀ ପଠାଇଥିବା ବେଳେ ବିଦ୍ରୋହୀ ଗୋଷ୍ଠୀ ଋତବ୍ରତ ବାନାର୍ଜୀଙ୍କ ନାମ ପଠାଇଥିଲା । ଆବେଦନକାରୀଙ୍କ ପକ୍ଷରୁ ଅନ୍ତରୀଣ ନିର୍ଦ୍ଦେଶ ପାଇଁ ପ୍ରାଥମିକ ଭିତ୍ତି ପ୍ରମାଣିତ ହୋଇନାହିଁ। ତେଣୁ ଋତବ୍ରତ ବାନାର୍ଜୀ ବର୍ତ୍ତମାନ ପାଇଁ ବିରୋଧୀ ଦଳ ନେତା ଭାବେ କାମ କରିବେ । ତେବେ ହାଇକୋର୍ଟ ସମସ୍ତ ପକ୍ଷଙ୍କୁ ତିନି ସପ୍ତାହ ମଧ୍ୟରେ ସତ୍ୟପାଠ ଦାଖଲ କରିବାକୁ କହିଛନ୍ତି । ବାଚସ୍ପତି ନିଜ ଅଧିକାର ସୀମା ମଧ୍ୟରେ ରହି ଏହି ନିଷ୍ପତ୍ତି ନେଇଥିଲେ କି ନାହିଁ, ଗୁରୁବାର ଏହି ମାମଲାର ଶୁଣାଣି କରି ଜଷ୍ଟିସ କୃଷ୍ଣ ରାଓଙ୍କ ଖଣ୍ଡପୀଠ କହିଛନ୍ତି ଯେ, କୋର୍ଟ ବାଚସ୍ପତିଙ୍କ ନିଷ୍ପତ୍ତି ଉପରେ କୌଣସି ଅନ୍ତରୀଣ ନିର୍ଦ୍ଦେଶ ଦେବେ ନାହିଁ । କୋର୍ଟ ସମସ୍ତ ପକ୍ଷଙ୍କୁ ଦୁଇ ସପ୍ତାହ ମଧ୍ୟରେ ଜବାବୀ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି । ମାମଲାର ପରବର୍ତ୍ତୀ ଶୁଣାଣି ଆସନ୍ତା ଜୁଲାଇ ୨୮ ତାରିଖରେ ହେବ । ଅନ୍ୟପଟେ, ଋତବ୍ରତ ବାନାର୍ଜୀ ଏହାକୁ ନିଜ ଶିବିର ପାଇଁ “ନୈତିକ ବିଜୟ” ବୋଲି ବର୍ଣ୍ଣନା କରିଛନ୍ତି। ସେ ଦାବି କରିଛନ୍ତି ଯେ ଦଳର ଦୁଇ-ତୃତୀୟାଂଶରୁ ଅଧିକ ବିଧାୟକ ଓ ସାଂସଦ ତାଙ୍କ ସହ ଅଛନ୍ତି। ତାଙ୍କ କହିବା ଅନୁସାରେ, ବିଧାୟକ ଓ ସାଂସଦମାନଙ୍କ ସମର୍ଥନ ସୁନିଶ୍ଚିତ ହେବା ପରେ ବର୍ତ୍ତମାନ ନଜର ପୌରସଂସ୍ଥା, ନଗର ନିଗମ, ଜିଲ୍ଲା ପରିଷଦ ଓ ଦଳର ତୃଣମୂଳ ସଂଗଠନ ଉପରେ ରହିଛି। ଋତବ୍ରତ ବାନାର୍ଜୀ କହିଛନ୍ତି, “ଆମେ ହିଁ ପ୍ରକୃତ ତୃଣମୂଳ କଂଗ୍ରେସ। ଦୁଇ-ତୃତୀୟାଂଶରୁ ଅଧିକ ବିଧାୟକ ଓ ସାଂସଦ ଆମ ସହ ଅଛନ୍ତି। ଆବଶ୍ୟକ ହେଲେ ଆମେ ନିର୍ବାଚନ ଆୟୋଗଙ୍କ ନିକଟକୁ ଯିବୁ।”ସେ ଆହୁରି ଅଭିଯୋଗ କରିଛନ୍ତି ଯେ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସକୁ “କର୍ପୋରେଟ୍ ବ୍ୟୁରୋକ୍ରେସି” ହାଇଜାକ୍ କରିଛି। ତେବେ ଏହି ଆନ୍ଦୋଳନ ମମତା ବାନାର୍ଜୀଙ୍କ ବିରୋଧରେ ନୁହେଁ ବୋଲି କହି ସେ ମୁଖ୍ୟମନ୍ତ୍ରୀଙ୍କୁ ଦଳର ମୁଖ୍ୟ ପରାମର୍ଶଦାତା ଭାବେ ରହିବାକୁ ଅନୁରୋଧ କରିଥିବା ଦୋହରାଇଛନ୍ତି। ଉଲ୍ଲେଖଯୋଗ୍ୟ ଯେ, ବିରୋଧୀ ଦଳ ନେତା ପଦ ପାଇଁ ମମତା ବାନାର୍ଜୀଙ୍କ ପସନ୍ଦ ଥିଲେ ସୋଭନଦେବ ଚଟ୍ଟୋପାଧ୍ୟାୟ। କିନ୍ତୁ ଦଳ ଭିତରେ ବିଦ୍ରୋହ ପରେ ୫୮ ଜଣ ବିଧାୟକଙ୍କ ସମର୍ଥନ ଦାବି କରି ଋତବ୍ରତ ବାନାର୍ଜୀଙ୍କୁ ବାଚସ୍ପତି ବିରୋଧୀ ଦଳ ନେତା ଭାବେ ସ୍ୱୀକୃତି ଦେଇଥିଲେ।