ଡ୍ରାଫ୍ଟ ଭୋଟର ତାଲିକାରୁ ରାଘବ ଚଢ଼ାଙ୍କ ନାମ ବାଦ, SIRକୁ ନେଇ ରାଜନୈତିକ ବିବାଦ

ଚଣ୍ଡୀଗଡ଼: ପଞ୍ଜାବରେ ନିର୍ବାଚନ ଆୟୋଗଙ୍କ ବିଶେଷ ଗଭୀର ପୁନଃସଂଶୋଧନ ବା SIR ପ୍ରକ୍ରିୟା ପରେ ପ୍ରକାଶିତ ଡ୍ରାଫ୍ଟ ଭୋଟର ତାଲିକାକୁ ନେଇ ରାଜନୈତିକ ବିବାଦ ତୀବ୍ର ହୋଇଛି। ବିଜେପି ରାଜ୍ୟସଭା ସାଂସଦ ରାଘବ ଚଢ଼ାଙ୍କ ନାମ ଡ୍ରାଫ୍ଟ ତାଲିକାରେ ନଥିବା ଏବଂ ତାଙ୍କୁ “permanently shifted” ଭାବେ ଚିହ୍ନିତ କରାଯାଇଥିବା ଘଟଣାକୁ ନେଇ ସେ ପଞ୍ଜାବର ଆମ୍ ଆଦମୀ ପାର୍ଟି ସରକାର ଉପରେ ରାଜନୈତିକ ପ୍ରତିଶୋଧର ଅଭିଯୋଗ ଆଣିଛନ୍ତି। ରାଘବ ଚଢ଼ାଙ୍କ କହିବା ଅନୁସାରେ, ତାଙ୍କ ଭୋଟର ଆଇଡି ମୋହାଲିରେ ପଞ୍ଜିକୃତ ରହିଛି। ସେ ଜଣେ ପଞ୍ଜାବର ବସିଥିବା ରାଜ୍ୟସଭା ସାଂସଦ ହୋଇଥିବା ସତ୍ତ୍ୱେ ତାଙ୍କ ନାମକୁ “shifted” ଭାବେ ଚିହ୍ନିତ କରାଯିବା ଉପରେ ସେ ପ୍ରଶ୍ନ ଉଠାଇଛନ୍ତି। ଏହା କେବଳ ଏକ ସାଧାରଣ ଭୁଲ୍ ନୁହେଁ, ବରଂ ରାଜନୈତିକ ପ୍ରତିଶୋଧର ଅଂଶ ବୋଲି ସେ ଅଭିଯୋଗ କରିଛନ୍ତି।

ଚଢ଼ା ୨୦୨୨ରେ AAP ପ୍ରାର୍ଥୀ ଭାବେ ପଞ୍ଜାବରୁ ରାଜ୍ୟସଭାକୁ ନିର୍ବାଚିତ ହୋଇଥିଲେ। ତେବେ ୨୦୨୬ ଏପ୍ରିଲରେ ସେ AAP ଛାଡ଼ି ବିଜେପିରେ ଯୋଗ ଦେଇଥିଲେ। ବର୍ତ୍ତମାନ ସେ BJPର ରାଜ୍ୟସଭା ସାଂସଦ। ଅନ୍ୟପକ୍ଷରେ AAP ରାଘବ ଚଢ଼ାଙ୍କ ଅଭିଯୋଗକୁ ଖଣ୍ଡନ କରିଛି। ଦଳର କହିବା କଥା, SIR ପ୍ରକ୍ରିୟା ନିର୍ବାଚନ ଆୟୋଗଙ୍କ ଅଧୀନରେ ହେଉଛି ଏବଂ ଭୋଟର ତାଲିକାରୁ କାହାର ନାମ ରଖିବା କିମ୍ବା ବାଦ ଦେବାରେ ପଞ୍ଜାବ ସରକାରଙ୍କ କୌଣସି ଭୂମିକା ନାହିଁ। AAP ଆହୁରି ଅଭିଯୋଗ କରିଛି ଯେ ଚଢ଼ା ତାଙ୍କ ଭୋଟର ପଞ୍ଜିକରଣକୁ ପଞ୍ଜାବରୁ ଦିଲ୍ଲୀକୁ ସ୍ଥାନାନ୍ତର କରିବା ପାଇଁ ପଛ ତାରିଖରେ ପ୍ରକ୍ରିୟା କରିବାକୁ ଚେଷ୍ଟା କରିଥିଲେ। ଏହି ଅଭିଯୋଗକୁ ନେଇ ଦୁଇ ପକ୍ଷ ମଧ୍ୟରେ ରାଜନୈତିକ ବାକ୍‌ଯୁଦ୍ଧ ତୀବ୍ର ହୋଇଛି।ଗୁରୁତ୍ୱପୂର୍ଣ୍ଣ କଥା ହେଉଛି, ଏହା ଏକ ଡ୍ରାଫ୍ଟ ଭୋଟର ତାଲିକା। ତେଣୁ ନାମ ବାଦ ପଡ଼ିବା ଚୂଡ଼ାନ୍ତ ନିଷ୍ପତ୍ତି ନୁହେଁ। ନିୟମ ଅନୁସାରେ ଯୋଗ୍ୟ ଭୋଟରମାନେ ଦାବି ଓ ଆପତ୍ତି ଦାଖଲ କରି ନିଜ ନାମ ପୁନଃ ଯୋଡ଼ିବା ପାଇଁ ଆବେଦନ କରିପାରିବେ। ରାଘବ ଚଢ଼ାଙ୍କ ମାମଲା ଏବେ SIR ପ୍ରକ୍ରିୟାର ସ୍ୱଚ୍ଛତା ଓ ଭୋଟର ଅଧିକାରକୁ ନେଇ ନୂଆ ରାଜନୈତିକ ଚର୍ଚ୍ଚା ସୃଷ୍ଟି କରିଛି। ତେବେ ଚଢ଼ାଙ୍କ ନାମ ଚୂଡ଼ାନ୍ତ ଭାବେ ଭୋଟର ତାଲିକାରୁ ବାଦ ପଡ଼ିଛି ବୋଲି କହିବା ଏବେ ଠିକ୍ ହେବ ନାହିଁ।