Similiguda: ସେମିଳିଗୁଡ଼ା ଅଞ୍ଚଳରେ ମହାବଳ ବାଘ ଆତଙ୍କ, ଟ୍ରାପ୍ କ୍ୟାମେରାରେ କଏଦ ହେଲା ଫଟୋ

ସେମିଳିଗୁଡ଼ା: କୋରାପୁଟ ଜିଲ୍ଲାର ସେମିଳିଗୁଡ଼ା ବ୍ଲକ ଅନ୍ତର୍ଗତ ରାଜପୁଟ ପଞ୍ଚାୟତର ଝରାପୁଟ ଗାଁରେ ମହାବଳ ବାଘକୁ ନେଇ ଆତଙ୍କ ଦେଖାଦେଇଛି। ଗାଁ ନିକଟସ୍ଥ ପାହାଡ଼ରେ ଏକ ହିଂସ୍ର ଜନ୍ତୁ ଆକ୍ରମଣରେ ଗୋଟିଏ ମଇଁଷିର ମୃତ୍ୟୁ ହେବା ପରେ ଗ୍ରାମବାସୀଙ୍କ ମଧ୍ୟରେ ଭୟର ବାତାବରଣ ଖେଳିଯାଇଥିଲା। ତେବେ ବର୍ତ୍ତମାନ ଏହା ଏକ ମହାବଳ ବାଘ ବୋଲି ଜଣାପଡ଼ିବା ସହ ଟ୍ରାପ୍ କ୍ୟାମେରାରେ ଏହାର ଫଟୋ କଏଦ ହୋଇଥିବା ସୂଚନା ମିଳିଛି। ସୂଚନା ଅନୁଯାୟୀ, ଗତ ବୁଧବାର ଦିନ ଗ୍ରାମର କିଛି ଲୋକ ଗାଈ, ଗୋରୁ, ଛେଳି ଓ ମଇଁଷିଙ୍କୁ ଚରାଇବା ପାଇଁ ନିକଟସ୍ଥ ପାହାଡ଼କୁ ଯାଇଥିଲେ। ଅପରାହ୍ନ ପ୍ରାୟ ୫ଟା ସମୟରେ ଗାଁକୁ ଫେରୁଥିବା ବେଳେ ପାହାଡ଼ ଉପରୁ ଏକ ମଇଁଷିର ଚିତ୍କାର ଶୁଣିଥିଲେ। ସନ୍ଧ୍ୟା ହୋଇଯାଇଥିବାରୁ କେହି ପାହାଡ଼ ଉପରକୁ ଯିବାକୁ ସାହସ କରିନଥିଲେ। ପରଦିନ ସକାଳେ ଗ୍ରାମବାସୀ ଏକାଠି ହୋଇ ପାହାଡ଼କୁ ଯାଇ ମଇଁଷିର ମୃତଦେହ ଦେଖିଥିଲେ। ମଇଁଷିର ପଛ ଭାଗକୁ ଜନ୍ତୁଟି ଅଧାରୁ ଅଧିକ ଖାଇଦେଇଥିବା ଦେଖିବାକୁ ମିଳିଥିଲା।

ଖବର ପାଇ ସେମିଳିଗୁଡ଼ା ବନ ବିଭାଗର ଅଧିକାରୀ ସୁଶାନ୍ତ କୁମାର ଦଳେଇଙ୍କ ସମେତ ବନ କର୍ମଚାରୀ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ଜନ୍ତୁର ଗତିବିଧି ଉପରେ ନଜର ରଖିବାକୁ ପାହାଡ଼ର ବିଭିନ୍ନ ସ୍ଥାନରେ ଟ୍ରାପ୍ କ୍ୟାମେରା ଲଗାଯାଇଥିଲା। ଏଥିସହ ଦୁଇଟି ସ୍ୱତନ୍ତ୍ର ଟିମ୍ ଦିନରାତି ପାଳି କରି ନିରୀକ୍ଷଣ କରୁଛନ୍ତି। ରାତିରେ ଘରୁ ବାହାରକୁ ନବାହାରିବା ସହ ସତର୍କତା ଅବଲମ୍ବନ କରିବାକୁ ବନ ବିଭାଗ ପରାମର୍ଶ ଦେଇଛି। ମହାବଳ ବାଘର ଫଟୋ ଟ୍ରାପ୍ କ୍ୟାମେରାରେ କଏଦ ହେବା ପରେ ଅଞ୍ଚଳବାସୀଙ୍କ ମଧ୍ୟରେ ଉତ୍କଣ୍ଠା ସହ ଭୟ ମଧ୍ୟ ବଢ଼ିଛି। ବାଘର ଗତିବିଧି ଉପରେ ବନ ବିଭାଗର ନଜର ଜାରି ରହିଥିବା ବେଳେ ଗ୍ରାମବାସୀଙ୍କୁ ଭୟଭୀତ ନହୋଇ ସତର୍କ ରହିବାକୁ ଅଧିକାରୀମାନେ ଅନୁରୋଧ କରିଛନ୍ତି।